مصر موتورز مجتمع السيارات - سؤال في الابيزا ال 98 المتحوله

اقتباس:

المشاركة الأصلية كتبت بواسطة RAMY_MOSTAFAA (المشاركة 121904)

السلام عليكم ورحمه الله وبركاته
دي أول مشاركه ليا في المنتدى وانا بصراحه جاي على السمعه الطيبه........
انا معايا ابيزا 98 موتور 1000 سي سي
اللي انا اشتريتها منه كان شايل الانجيكشن اللي كان فيها ومركبلها كربراتير اصلي بتاعها مش مولف اي حاجه
و العربيه كويسه وزي الفل مافيهاش مشاكل كبيره غير شويه حاجات بسيطه حابب اعرفها
وبتمنى من ربنا ثم منكم تدلوني عليها عشان انا احترت
1 تجميع العربيه في البدايه وانا على الاولاني مش قد كده يعني ممكن تكون مخنوقه شويه
2 صوت تاكيهاتها عالي مش عارف دا من ايه
3 عايز اعرف بتاخد كام كيلو زيت في ناس تقولي 4 بالفلتر وناس تقول 3.5 مابقيتش عارف
4 دركسيونها مش باور بس تقيل جدا يعني كأني راكب لادا ولا بولونيز
5 وده المهم جدا بتسحب بنزين كأنها 8 سلندر مع اني بحطلها بنزين 92 بفكر احط 80 واريح نفسي عايز اعرف ايه مشكله البنزين واحلها ازاي بتستهلك حوالي 160 كيلو في الصفيحه
6 اللي انا شاريها منه كان مركبلها عفشه سبور بس بترزع جامد في الهادي لكن راسيه جدا على السرعه العاليه
هل الترزيع ده عادي ولا مشكله في العفشه
7 وهل موضوع الكربراتير ده وحش على المكنه ولا ارجعها انجيكشن
معلش انا اسف طولت عليكم جدا بس انا فعلا الحاجات دي هاتجنني وخصوصا موضوع البنزين

بص يا باشا

عموما الالماني كله تجميعه في الاول مش شديد بيبدأ يفوق من التاني تمام دي حاجة

ممكن عندك العربية تكون مخنوقه يبقي هتعملها صيانة فلاتر و بوجيهات و تنضف الكربراتير

بالنسبة للزيت لما تغير الزيت غير الفلتر معاه لان الفلتر القديم بيتحوش فيه الرايش الناتج عن احتكاك البساتم بالشمايز فا غير الاتنين مع بعض و الموتور بياخد الجركن كله (4 كيلو) لو مغيرتش الفلتر هياخد 3.5 فعلا

الابيزا حتي لو مش باور دركسيونها مش تقيل بالطريقة الغريبة دي ! فا انت كده محتاج عفشجي يبصلك علي الاسكاترا لو بايظه هتتشال و يتحط غيرها و تظبط زوايا و هتلاقيه ظبط معاك و لو العربية فيها كاوتش عريض فا ده بيتقل الدركسيون شوية بس مش بالصورة اللي انت بتقولها برضه

لو تعرف تتصل بالمالك القديم و تقوله اي كلمة تيجي في بالك تخليه يحس انه غبي قولهاله ! حد يشيل الانجكشن و يركب كربراتير !! الانجكشن اوفر بكتير في البنزين موتورك اصلا انجكشن و استهلاكه بيتراوح بين 350-380 كيلو في الصفيحة !! هو اكيد شال الرشاشات و الكنترول و الحساسات و ممكن يكون غير المنافولد و حط كربراتير جولف او ابيزا 94 فا انت محتاج ميكانيكي متخصص يشوف الحاجة الملغيه عندك و يقولك تجيب ايه بس خلي بالك عشان ترجعها انجكشن العملية هتتكلف يعني الاكيد انك هتشتري كنترول و 4 رشاشات دول تمنهم معتقدش انه هيقل عن 1000 جنيه غير الحساسات و لو غير منافولد يبقي هترجع المنافولد الاصلي بتاعها و الحاجة اللي هتطلع من عندك بيعها الكربراتير بيعه في حدود 250 جنيه و هكذا

و عموما الكربراتير في عربيتي (ابيزا 94 1300 سي سي كربراتير) بيعمل 200 كيلو في الصفيحة و ده و العربية كانت في اسوأ حالاتها و الفلاتر مش كويسه و الكربراتير مش نضيف و بوجيهات قديمة و هكذا

اما بخصوص العفشه السبور لو عايز ترجعها لارتفاعها الطبيعي و تحس بالمرونة ده في حالة لو مش عاجبك العفشه السبور هتنزل تجيب جوز مساعدين ادام و جوز ورا بالسوست بتاعتها بتوع الابيزا الاصليين و تركبهم بدل اللي عندك و طبيعي السبور مش بيحسسك بالراحة بالعكس بتحس بكل زلطه في الارض بس في المقابل ثبات رائع في السرعات

لو في ترزيع غير طبيعي يبقي و انت عند العفشجي خليه يبصلك علي بيض و جلب المقصات و بارات الدركسيون لو بايظين غيرهم هيفرقوا معاك جامد اوي

الكربراتير مش وحش علي الموتور ولا حاجة بس بيستهلك بنزين اكتر من الانجكشن و ده طبيعي فا شوف هتقدر تستحمل الكربراتير ولا لا و انا من رأيي لو انت عايز ترجعها انجكشن اشتري موتور 1000 سي سي هيبقي في حدود 800-1000 بالكنترول بتاعه برشاشاته بالحساسات اوفرلك ما تشتري الحاجة بالقطعه يعني و ممكن تشيل موتورك و تحط الجديد او تفك من الجديد و تركب عندك علي طول و متنساش انها عايزه ميكانيكي متخصص عشان يبقي فاهم كل حاجة و يعرف يرجع كل حاجة لاصلها تاني و الدنيا متتعكش و ترجع تقول ما الكربراتير كان ماشي و مقرفنيش كده !

و ربنا يباركلك فيها ان شاء الله :)