|
استفسار عن طريق دمياط الساحلى الدولى ؟
السلام عليكم
الاخوة الاعضاء الكرام سافرت قبل رمضان للغردقة فى اجازة استمرت عشرة ايام ولان الاسعار مرتفعة جدا هناك :shwt: الميزانية خربت منى على الاخر :pty: والاولاد محتاجين اجازة مصيف بعد عناء الامتحانات الايام اللى فاتت فلذلك قررت اسافر لرأس البر بعد العيد مباشرة فهى تجمع ما بين المصيف الشعبى الجميل والسعر المناسب والمعقول وانا سافرت من قبل اليها من خلال الطريق الساحلى الدولى وصراحة طريق رائع ومفتوح ورايق حيث انى بطلع من جسر السويس بالقاهرة وبمسك طريق الاسماعيلية الصحراوى لنهايتة وبكمل على طريق القنطرة وبعدها الى طريق الاسماعيلية بورسعيد وقبل دخول بورسعيد باخذ الملف شمال وامسك الطريق الساحلى حتى الوصول لدمياط محتاج اتأكد اذا كان فى اصلاحات فى الطريق او مشاكل هذة الايام ولا لا ؟ اذا فى احد الزملاء راجع او رايح على الطريق خلال هذة الايام يطمنا ؟ لان الطريق الساحلى كان فية تطويرات من فترة ولا اعلم اذا كانت خلصت ولا لسة ؟ . |
رد: استفسار عن طريق دمياط الساحلى الدولى ؟
انا لسة راجع من هناك الشهر اللى فات
بالفعل فى اصلاحات فى طريق بور سعيد دمياط فى عدد 2 كوبرى علوى والاتنين للاسف فى نهايتهم مطبات للاسفل وحشة جدااااااااا خلى بالك لانك بتطلع الكوبرى وبتنزل بسرعتك فخليك حريص اوى فى المنزل وكمان فى المطلع فى نقر كبيرة جدا نفس الكلام فى الكوبرى التانى على طريق الملاحات بقى فى اعوجاج فى الارض لمسافات كبيرة ....كيلوهات هتلاقى العربية بتعوم جامد اوى فخلى بالك وما تزودتش فى الحتت دى عن 60 كم كمان فى الكوبرى لما تدخل دميط هاتطلعة وتنذل على شان تدخل راس البر الكوبرى دة كان اتجاه واحد للطالع والنازل لكن كانو شغالين فية اتعشم انة يكون خلص اما طريق مصر الاسماعيلية فانتهو من التوسعات عند الكوبرى الاول والتانى لمداخل العاشر من رمضان والطريق هتلاقية واسع جدا واتسفلت كويس اوى توصل بالسلامة ان شاء الله ومصيف سعيد عليك وعلى اسرتك الكريمة |
رد: استفسار عن طريق دمياط الساحلى الدولى ؟
اة نسيت
فى حوالى 30 كم على القناه الجيش واخد نصف الطريق لحمياه المجرى المائي والطريق فردة واحد ة فقط ....يعنى لو حظك كان خلف عربية نقل هاتفضل ماشى وراها المسافة الطويلة كلها |
رد: استفسار عن طريق دمياط الساحلى الدولى ؟
اشكرك كثيرا اخى الكريم مستر استرا على تفاعلك واهتمامك
لكن بكدة يعتبر الطريق كما هو سابقا المسافة الخالية والسليمة فقط هى طريق مصر الاسماعيلية والباقى يحتاج لحرص شديد وتوقع اى مفاجئات هحاول بقدر المستطاع اتحرك فى وقت مبكر للغاية بحيث انى اتفادى الزحام المتوقع على الطريق وربك يسترها |
رد: استفسار عن طريق دمياط الساحلى الدولى ؟
سافرت ورجعت ونسيت احدث الموضوع للافادة الطريق من القاهرة للاسماعيلية ممتاز والطريق الساحلى من مدخل بورسعيد الى دمياط كذلك ممتاز لكن الوصلة من القنطرة لبداية الطريق الساحلى بالفعل كما ذكر الاخ mr_astra الطريق فردة واحدة وخطر جدا محاولة التخطى فية انا شخصيا ربنا نجانى من حادث محقق حيث كنت خلف سيارة نقل بمقطورة ومللت السير خلفها وجدت الطريق اتسع فحاولت التخطى ولكن لم اتمكن لان الطريق ضيق مرة اخرى بشكل مفاجئ وطبعا النقل مستمر فى السير ما جعلنى ادخل فى الرمال وكنت على وشك الدخول فى الحاجز الخرسانى هربا من عجلات المقطورة التى كادت تأخذ السيارة من الخلف لولا عناية الله ثم تمكنى من السيطرة على السيارة فنصيحة لوجة الله من يمشى على هذا الطريق لا يتخطى النقل باى شكل حتى لو اخذت هذة الوصلة ساعة وصولك متأخر بأمان افضل من عواقب اخرى شديدة وبالمناسبة وجدت رأس البر سيئة جدا جدا تغيرت عن السابق بكثير ولكن للاسواء كانت زمان جميلة جدا وكانت مصيف شعبى بطابع جميل لكن الان للاسف اختلفت جدا جدا ! ولن افكر فى الذهاب اليها مرة اخرى الامر الذى جعلنى اسافر بعد عودتى منها الى الغردقة مرةاخرى قبل دخول المدارس مباشرة بعد خيبة الامل لى وللاسرة فى رحلة رأس البر الفاشلة ارجوا ان اكون قد افدتكم واى استفسار |
| الساعة الآن 04:31 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017