|
باركولى اشتريت رينو لوجان
اولا انا اسف جدا لغيابى عن المنتدى لفتره طويله اكتر من شهر لان النت كان فصل عندى وانشغلت فى حاجات كتير وطبعا كل رجاله المنتدى وحشونى جدا خصوصا حبيبى وصديقى حازم خضر حبيت انى اشرككم معايا فى فرحتى بالعربيه الجديده هى عربيه الاسره يعنى مش بتاعتى انا لوحدى مواصفات السيارة رينو لوجان E1 1600 هاف اوبشن تكيف 4 سرعات قوى جدا باور ستيرنج 2 زجاج كهرباء امامى راديو CD تقريبا اوديو + سماعتين بس جامدين 2 حامل اكواب سنتر فى المفتاح بس من غير ريموت ان شاء الله هاركبه هو والانذار فى التوكيل ستوب خلفى طاسات عجل رينو والكاوتش من نوع ميشلان القوى المزايا المساحه الداخليه جيده جدا جدا خصوصا من ورا تشيل ورا 3 كبار بالراحه تكيف قوى جدا ومكنتش متوقع ده لانى بخاف من تكييفات الاوروبى عامه الموتور والسحب بسم الله ماشاء الله حاجه وهميه الموتور شديد 1600 والعربيه صغيره فبتجمع معايا بطريقه فظيعه والدبرياج خفيف جدا مش تقيل والفرامل برضه جامده بتسعفنى فى اوقات زنقه الثبات ماشاء الله مع انى والله ماعديت 120 كم لانى بخاف من السرعات اوى بس العربيه الحمد لله ثباتها معقول الشنطه واسعه جدا جدا جدا الفوانيس الاماميه ممتازه خصوصا العالى عداد السرعه رائع على اليمين السرعه وعلى الشمال ال RBM وفى النص الحراره والزيت ديجيتال عباره عن عمود من 8 شرط البنزين شمال والحراره يمين واضاره العدادات لونها برتقالى العيوب طبعا لازم بعض التقاليع الفرنسيه الرخمه زى ان الكلاكس مش فى الطاره وانما فى دراع النور اللى على الشمال حركه غبيه جدا محسسانى انى راكب بيجو 504 موديل 77 وللاسف العربيه اللوجان الفول اوبشن بس هى اللى بتيجى بدركسيون زى بتاع الكليو والكلاكس فيه وفيها ايرباج صوت العربيه عالى شويه لو واقف بره جنبها او لو سايقها وفاتح الشباك على الاخر مش عارف ليه بتبقى مزعجه فتح الشنطه والتنك مش من جوه العربيه ودى حركه غبيه جدا جدا جدا مش عارف ليه لا وكمان التنك لما بفتحه بيفضل المفتاح فيه ميطلعش الا ما اغطيه تانى التقفيل اكيد مش كويس اوى يعنى بشوف فى الحواف بتاعت القوايم حاجات مش عجبانى كده حاجه برضه مضايقانى جدا ان الباب اللى ورا شمال مش بيفتح من جوه لازم افتحه من بره ليه معرفش بس مستنى فى صيانه ال5000 هاخليهم يزبطوه منظر الكبوت كويس ومنظم والموتور تقريبا متبطن ومكتوب عليه Renault 1.6 Injection منظره فخم شويه ويوحى بالقوه العربيه عامله دلوقتى 1550 كم تقريبا وان شاء الله فى صيانه ال5000 كم احاول ازبطها شويه فعلا يا جماعه الاوروبى اوروبى من الاخر بالرغم برضه من عشقى لكل ما هو يابانى بس كون ان العربيه دى تنزل بالسعر ده والامكانيات دى فى شريحه اسعار تحت ال70000 ده انجاز بجد وفعلا بدات تنتشر عندنا فى دمياط بكثره اكيد برضه عايز نصايحكم لانى بالرغم من انى بفهم كويس فى العربيات ومن زمان الا انى سواق جديد بسوق من حوالى شهر بس وميكانيكيا مش اد كده الراديتير مثلا هو مملى حوالى ربعه ماء ملون امتى املاه ولحد فين لان فيه شرطه قبل لفتحه بحاجه بسيطه ولو العربيه لا قدر الله سخنت اعمل ايه يارت تجاوبونى يا جماعه ... انتظروا منى مجموعه صور شامله للعربيه قريبا http://dc02.arabsh.com/i/00608/cstozht3zkzw.GIF |
رد: باركولى على اللوجان
الف الف مليون مبروك على العربية وان شاء الله اختيار موفق
اهم حاجة اتبع تعليمات التليين واهم حاجة ماتعديش 3500 ار بى ام الماتور صوته حيهدى مع مرور الوقت وحيهدى اكتر بعد تخطى حاجز ال 5000 كيلو ماتقلش من اى حاجة فى صيانة ال 5000 كله حيتظبط اكتر ولسة اداء العربية حيوصل لاعلى معدلاته وهى عربية جميلة وتستحق كل بريزة مدغوعة فيها والف شكر لحياديتك |
رد: باركولى على اللوجان
اقتباس:
الله يبارك فيك يا رينجو وربنا يكرمك فعلا العربيه دى انا حاسس انها الاختيار الصح |
رد: باركولى على اللوجان
باشا اولا الف مبروك عليك اللوجان وعلينا عضو جديد فى عصابه الرينو
من ناحيه الكلاكس دى حركه فرنسيه عاديه ومش مشكله اوى كده مع الوقت هتتعود عليها ودى متعتبرش عيب يعنى صوت العربيه هيكون عالى شويه وعلى صيانه ال5000 هتلاقى صوته هدى ونعم واستهلاك البنزين هيقل معاك كمان الشنطه بتتفتح مع السنتر دى اول نقطه تانى حاجه فتح التانك من بره ودى حاجه امان مش غباء ولا حاجه ده بيتأكد انك تكون قافل التانك عشان الحوادث لا قدر الله عشان العربيه متدورش وتانك البنزين مفتوح ده زياده امان مش غباء خالص هل تقفيل اللانوس والفيرنا والاسبيرانزا 516 تقفيلهم رائع بالنسبه للفئه السعريه دى؟؟؟؟ الباب مبيتفتحش من جوه ده لوك الاطفال برضه زياده امان مش حاجه عطلانه ولما تروح الصيانه هيتفتح فى ثوانى وده امان عشان لو مركب اطفال ورا ميفتحوش الباب من جوه يا باشا استمتع بعربيتك لانها فعلا عربيه جميله ومحترمه تحياتى يا باشا |
رد: باركولى على اللوجان
اقتباس:
الله يبارك فيك يا بوب وانا سعيد جدا بانضمامى لعصابه الرينو بالنسبه للعيوب اللى انا ذكرتها دى بالنسبه لى مش عيوب جوهريه يعنى حاجات مش ههاتخلينى اكره العربيه بالعكس انا بحبها جدا اول مره اعرف موضوع الشنطه مع السنتر ده يعنى لو العربيه مقفوله والشنطه برضه مقفوله وانا فتحت الباب بالسنتر الشنطه القفل بتاعها يفتح ؟ وهل بيحصل العكس يعنى لوقفلت الباب بالسنتر الشنطه بتسك ولا لا ؟ شكرا ليك يا بوب |
| الساعة الآن 08:30 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017