|
رد: دهان فالتوكيل،،إثبات انها مش حادثة؟
صباح الخير يا دكتورة ويارب خير الف سلامة على العربية
خلونى احاول ارد كالخبراء زى ما استاذنا الباشمهندس احمد ما قال واشرح شوية الفرق بين ما يعرف ب " دهان الفابريكا " واى دهان تانى وخلونا برضو الاول نفرق بين الدهان كعملية هدفها تغطية صاج العربيه بطبقات لحمايتة اولاً واعطائه شكل جمالى ثانياً وبين السمكرة اللى هى عملية استعدال الصاج واعادة تشكيلة بعد الحوادث ربنا يحفظكم جميعاً 1- دهان الفابريكا : بيتم بشكل ألى (مميكن ) باستخدام ربوتات التحكم فى خطوط التجميع وبدون تدخل بشرى مباشر وبالتالى نسب الخطاء ومعاملات الجودة اعلى بكتيييييييير من اى طريقة تانية لا بوية زيادة ولا ناقص بيتم على العربيه بعد معالجة الصاج باحدث الوسائل اللى بتضمن افضل التصاق بين الصاج والبوية وفى بيئه معزولة عن الاتربه والشوائب بيتم باستخدام دهانات اصلية وقياسية معتمدة من مصنع السيارة بيتم على جسم العربيه وهى صاج فقط وبالتالى مفيش احتمالية ان حاجة تانية تدهن بالغلط زى باقى الاجهزة او الاكسسوارات اللى راكبه على العربيه واللى دايما فى الدهان العادى بيطولها من الحب جانب وتبقى دليل على الجريمة والنتيجة انه بيعيش اكتر وبيتحمل اكتر ومن امثلة ده لما تبقى العربيه بدهان الفابريكا وتاخد خبطة ممكن تترد على البارد والسمكرى يدق على البوية للصبح من غير ما البوية تقشر على عكس الدهانات العادية لو دق عليها السمكرى تقع كمان بقى متوفر اجهزة لاكتشاف الدهانات العادية وديه فكرتها انها بتقيس المسافة العازلة بين الصاج والجهاز وطبعاً مع دهان الفابريكا طبقة الدهان بتبقى مقاسها مظبوط فى كل العربيه طولها وعرضها لكن مع الدهان العادى بتبقى مش مظبوطة واعلى (اكثر سمكاً) من دهان الفابريكا وده اللى بيخلى الجهاز يحدد الاجزاء الفابريكا من اللى تم دهانها علشان كدة نقدر نقول ان افضل دهان على الاطلاق هو دهان الفابريكا يليه اللى بنقول عليه ( وش نظافة) وده معناه ان العربيه صاجها سليم بس اخدت وش دهان اضافى على الدهان الاصلى والاسواء هو ان العربيه يبقى فيها خبطات فيضطر السمكرى يشيل بوية الفابريكا تماماً ويعالجها بالمعجون ثم الدهان ده فيديو بيوضح نموذج لعملية دهان الفابريكا فى المصنع Paint Factory - 2015 Mercedes Benz C Class - YouTube BMW Production Paint Shop - YouTube E-DIP automobile paint line system - YouTube خدو بالكو كل ده احنا بنتكلم عن الدهان فقط مجبناش سيرة السمكرة لان العربية الفابريكا صاجها خارج من المكنه بيتلحم ويركب ويدهن وبس لا حد بيدقه ولا يسخن عليه لكن اى عملية استعدال بتم باستخدام الدق والتسخين وبالتالى بتختلف تماما عن حال الفابريكا باختصار دهان الفابريكا حاجة واى دهان تانى حاجة تانية خالص الدهان فى التوكيل يعنى دهان اضمن علشان شركة كبيرة والمفروض بتستخدم خامات بجودة عالية بس لكن هو برضو دهان وسمكرة ومش هتبقى فابريكا تانى وطبعاً مكلف اكتر اتمنى تكون الفكرة وصلت وتحت امركم فى اى استفسار او توضيح |
رد: دهان فالتوكيل،،إثبات انها مش حادثة؟
اقتباس:
امال الرد الى انت رديته ده ... انت تبقى ايه ؟! ربنا يباركلك فى المعلومات و الشرح انا لسه حبدأ قصة الدوكو دى ان شاء الله بعد ما اخلص عزل داخلى .... يدينا و يديك طولة العمر |
رد: دهان فالتوكيل،،إثبات انها مش حادثة؟
شكرا يا بشمهندس وائل فهمت حاجات كتير فعلا
بس معني الكلام اني غالبا لازم اعمل سمكرة واضطر اشيل الفابريقة من بعض الاماكن عشان كدة بسأل لو فالتوكيل اعتقد هيشوفو انها خبطات بسيطة ولكنها مش حادثة ويثبت دة فسجل العربية عندهم عشان لو بعتها بعد كدة ميتقالش عليها عاملة حادثة ؟ ولا زي راي الباشمهندس احمد ان بالعكس معني اني اعمل الكلام دة في التوكيل يشكك الي هيشتريها بعدي اني عملتها فالتوكيل لان الموضوع كان كبير وممكن تكون حادثة كبيرة ؟ شكرا مقدما :) |
رد: دهان فالتوكيل،،إثبات انها مش حادثة؟
اقتباس:
|
رد: دهان فالتوكيل،،إثبات انها مش حادثة؟
اقتباس:
1 - اللى بيتسجل فى ملف العربيه بوضوح هو اوامر الاصلاح يعنى سمكرة على البارد للرفرف الامامى يمين او سمكرة على السخن باب خلفى شمال كدة حتى الرسم الكروكى اللى بيتعمل غالباً بيتدشت مش بيتحفظ فى ملف العربيه على الكمبيوتر فالخلاصة انا كمشترى لما اروح اشوف الملف بتاعها هلاقيها اتسمكرت واترشت وبس كان السبب ايه وخطورته ايه معرفش 2- اغلب العربيات اللى بتتعمل سمكرة فى التوكيل بيبقى السيناريو بتاعها انها مؤمن عليها والحادثة كبيرة ( تكلفتها 5 الاف فيما فوق) فصاحب العربيه يعملها فى التوكيل علشان ميدفعش حاجة وشركة التامين والتوكيل يكش يولعو فى بعض هو ملوش دعوة يعنى زى ما قال استاذنا برضو احمد انها شبهه اكتر منها ضمانه 3- اغلب التجار او المشترين الشطار لما يلعبو على حته انها مرشوشة ((بره تحديداً )) بيبقى الهدف ينزل من سعرها وان شاء الله تكون مدهونة فى معامل ناسا للفضاء برضو هينزل من تمنها ويفاصل فيها 4-الفيصل فى تحديد اذا ماكنت العربيه اترشت نظافة لخرابيش او حكات وخبطات بسيطة او كونها سمكرة ودهان ناتجة عن حادثة كبيرة هو الاتى 4-1- الكشف على الدواخل ( مثلا ) الرفرف القدامانى يتبص عليه من الحوض لو فيه اثار (بنط لحام او لاء) لو فيه يبقى الرفرف كان معجون (مخبوط جامد) واترد على السخن الرفرف الامامى مثلا سهل شوية يتفك وترش جوة وبره لكن الرفرف الخلفى مثلاً مش بتفك ولو واخد حموات هيبان من ناحية الشنطة الخلفية بعد ما يتشاال الفرش بتاعها وكذلك الابواب 4-2- اذا كانت السمكرة مش تمام وسوك (زوايا) الصاج مش مظبوطة بعد السمكرة والدهان 4-3- اذا كان الدهان تحتيه طبقة معجون كبيرة 4-4 اذا كان فيه اثار (زراجين فى الشاسية والقوائم) والزارجين ديه عبارة عن عملية استعدال قاسية شوية لما يكون الصاج متطبق جامد بتتعمل بابسط صورها بان مثلا القائم بتاع الباب يتربط بجنزير حديد ويتربط فى شجرة ولا حاجة ويتشد كده واحدة واحدة لحد ما الصاج يرجع مكانة وده طبعاً بيسيب اثار فى مكان شد الزرجينة يعرفها المتخصصين 4-5 فيه حاجات فى تفقيل صاج الفابريكا مميزة زى (البرشام) لحامات الصاج بواسطة مكن الفابريكا وال(فليتو) وديه فينش للحامات بتاعة الفابريكا غالباً (بتتفور) تتشال لما السمكرى يفك الصاج من بعضة دلوقتى ممكن الفليتو والبرشام يتقلدو برضو على فكرة لو سمكرى ((صايع)) حبتين باختصار احسن ان العربيه تتعمل فى مكان نظيف وبنفينش نظيف وبس وساعة البيع ربنا يكفيكى شر المبخسين والمتفزلكين غير كدة انا شخصياً بقالى سنين مبشتريش غير مستعمل ومبشتريش غير عربيات رشة بره واتاكد من ان الرش كان نظافه او لخبطات فى الجنبين بسيطة مش ماثرة على قوائم ولا اساسيات لان انا برضو هخبطها وببيعها برضو وهى راشة نظافة وده حال معظم الشعب المصرى عادى خالص مش فيها اى حاجة تعيب العربيه انها راشة نظافة طالما مرشوشة صح والفينش سليم |
| الساعة الآن 02:38 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017