عربيتى السويفت عملت حادثه
 

السلام عليكم ورحمة الله وبركاته

عندى عربية سوزوكى سويفت 93
من يومين العربيه خبطت فى رصيف عالى حوالى 40 سم
والخبطه كانت فى مثلث الرصيف بالعجله اليمين
بعد الخبطه العجله لقيتها رجعت لورا ومش راضيه تمشى لانها بتحك جامد فى الدلايه والصاج اللى وراها
المهم اخدتها وروحت لعفشجى
قال العربيه مفيهاش حاجه فى العفشه روح لسمكرى
روحت لسمكرى قال لى ان الخبطه اثرت على الركبه بتاع العربيه
ولازم يسترجعها مكانها
وحط العربية بين شجرتين وشدها بين جنزيرين والجنزير الامامى موصل بونش
ولف الونش لحد ما على حد كلامه ان الركبه وصلت لاحسن درجة من التحسن
وقال لى ان العربيه من تحت ورا الركبه فيها برومه
وطلب منى انى اروح للعفشجى يظبطها لى اكتر
روحت للعفشجى حاول فيها
بس العربيه لسه العجله الاماميه اليمين مانظبطتش
كنت عايز استفسر من حضراتكم دلوقتى

اولا
اتصرف ازاى عشان احل المشكله دى
ثانيا
اعالج البرومه دى ولا اسيبها مع العلم انه قال ان الجزء صغير جدا
ولو هعالجها ايه افضل طريقه لعلاجها
ثالثا
هل استرجاع الركبه هياثر على متانة العربيه على الطريق
وهل دا يعتبر عيب فى العربيه وقت بيعها مره اخرى

يا ريت اسمع منكم اجابات شافيه
اسف على الاطاله
و جزاكم الله خيرا

رد: عربيتى السويفت عملت حادثه
 

الحقيقه

أنت محتاج سمكرى درجه أولى يظبطلك بيت الركبه فى حوض المكنه صح

وبالمره يعالجلك البارومه اللى خلف الركبه

طالما العفشجى شاف مكونات العفشه فى المنطقه دى بحاله جيده

رد: عربيتى السويفت عملت حادثه
 

شكرا جزيلا لرد حضرتك يا بشمهندس سمير
كنت عايز اعرف من حضرتك الطريقه اللى ممكن يظبطها بيها
وهل ممكن الركبه دى تتغير مثلا
انا زى ما قلت قبل كدا ان السمكرى اللى روحت له حاول
بس بطريقه عشوائيه اجتهاديه مبنيه على الخبره
لكن مش على مقاسات دقيقه بدليل انه عدل الركبه للامام لكن لسه العجله مقلوبه لبره من فوق

رد: عربيتى السويفت عملت حادثه
 

ومعلهش سؤال كمان
هل سبب رجوع الركبه لورا هو البارومه
ولا الخبطه مع العلم ان الخبطه مكانتش جامده للدرجه

رد: عربيتى السويفت عملت حادثه
 

للأسف الخبطات اللى زى دى بتتظبط بطريقه تقريبيه

زى نظام الشداد اللى أتعمل معاك عند السمكرى أياه

ولكن هنا مطلوب صنايعى أكثر مهاره ودقه

ممكن تكون محتاجه للتغيير ..........حسب حجم التأثر من الخبطه

وممكن تكون اللوحه الحاليه بسبب أعوجاج ولوحه فى مقص الركبه دى

وأنا متوقع هذا

ولذا أنت محتاج فعلا لصنايعيه مهره ( سواء عفشجى أو سمكرى )

للكشف على الحاله صح وتحديد العلاج المناسب

ما أنا عارفهم وعارف طرق شغلهم بالبركه

بدون حسابات صح أو حتى بوجهة نظر ومقارنات صح

معظمهم للأسف معندهمش نظر فى تحقيق مقارنه صح بين جانبين هندسيين

زى الركبه الشمال وزميلتها اليمين

لا أعتقد ...ولاتوجد علاقه

فالخبطه وعدم تحمل بيت الكرتيره أو حدوث لوحه فى المقص أو تأثر عمود مساعد الركبه هما السبب فى ماحدث للركبه

على فكره

لازم حتروح لمتخصص زوايا بعد عمل الازم للركبه ومكونات العفشه فى تلك المنطقه وكذلك بعد تحديد مدى الأصابه التى تأثرت بها بيت الركبه ( الكرتيره إللى بيبات فيها بطاحة الركبه )

وقدر الله وماشاء فعل