عاوز أشتري عربية نصف نقل 1.5طن ممكن مقترحات
 

عاوز أشتري عربية نصف نقل 1.5طن ممكن مقترحات
بس للأسف أنا حاططلها ميزانية من 25 ل 30 ألف بس
يعني تكون مستعملة
و ياريت حد يوضح لي الأحسن الي بتشتغل بالبنزين و لا السولار ؟
و أيه الموديلات المتاحة في حدود السعر ده أو أقل كمان لو أمكن ؟
و هل في أسواق تباع فيها السيارات النقل مستعملة زي سوق الجمعه بتاع مدينة نصر كده و فين ؟
مع الشكر

رد: عاوز أشتري عربية نصف نقل 1.5طن ممكن مقترحات
 

يا جماعه أنا مش هأشغلها في السوق
أنا هأخليها لطلبات المطبعة عندي بس و كمان هأعمل لها صندوق بإذن الله

رد: عاوز أشتري عربية نصف نقل 1.5طن ممكن مقترحات
 

الله يدلك علخير

رد: عاوز أشتري عربية نصف نقل 1.5طن ممكن مقترحات
 

النص نقل للاسف ترخيصه بيكون غالي قووووي وعشان كده لازم تشتغل بيها كتير عشان يجيب همه ف الاخر
ومادمت هتحمل شغل خاص ليك انت انا انصحك تجيب الميكروباص الصيني الصغير اللي هو شيفروليه الجوكر وتشيل منه الكراسي وتقلبه نص نقل زي ما انت عاوز وكمان بيتلاخص ملاكي وسعره مش معدي ال 60 الف زيرو يعني ممكن تدفع ال 30 اللي معاك وتقسك ال30 الباقيين ممكن تدفع ف الشهر يعني 700 جنيه علي 3 سنين او 4 ومش هتحس بيهم خااالص
لكن حوار نص نقل مستعمله ب 30 الف اعتقد صعبه ولو لقيت الحاله هتكون وحشه جداااا لان رخص النقل اعتقد ليها تمن لوحدها زي رخص التاكسي كده الرخصه لوحدها بمبلغ وقدره فمابالك برخصه وعربيه وحشه يبقي هتكرهك ف الشغل كله
اما بخصو ص لو عاوز بنزين او جاز السولار بيكون موفر عن البنزين بس لو موديل قديم هتلاقيها بتشتغل ببنزين 80 عادي جداااا لكن لو جديد او موديل قريب مثلا هتلاقي السولار اغلي من البنزين وموفر عنه كمان لان الجديد عاوز بنزين 92 فبالتالي فرق سعر البنزين 92 من السولار كبير لكن ف المقابل عمره موتور البنزين ارخص كتير من عمره موتور السولار
عمره موتور البنزين اخره 2000 جنيه لكن موتور السولار لو فتح بقه بيدخل له ف 5000 جنيه كحد ادني
نصيحتي لك فكر ف موضوع الميكروباص ده وان شاء اللله ربنا يوفقك للخير

رد: عاوز أشتري عربية نصف نقل 1.5طن ممكن مقترحات
 

متشكر لأهتمامك
لكن في أكتر من ملحوظة
- انا هأرخصها تبع البطاقة الضريبية للمطبعة و أفتكر ده هيخفض تكلفة الضريبة عليها و ياريت حد بيفهم في النقطة دي يفيدنا
- بالنسبة للعربيات الصيني الرخيصة منها عمومآ لا أعتقد انها ممكن يعتمد عليها لمدة معقولة و ده بالأخص لو ضيفنا عليه انها هتكون في عهدة سواق و في الأكيد سعر إعادة البيع هيكون ضعيف جدآ
- بالنسبة للفان عمومآ لي ملحوظة هامة هي أن بعض الشغل عندي يتم تحميله أو تعتيقه بالكلارك و ده مستحيل مع السيارة الفان بسبب فتحة الباب الخفي هتكون مش كاملة للأعلى لكن مع النقل حتى لو كان سوزوكي ربع نقل هيكون ممكن لو مش فان
- بالنسبة للبنزين أو السولار فأنا على قد معلوماتي المتواضعة بأفهم بنسبة في البنزين و لو العربية كانت كربراتير يبقى هتحطلها 80 عادي و التفضيل بين الأتنين يحتاج خبير مجرب الأتنين اعتقد وجهة نظرة هتكون في غاية الواقعية
- اختيار العربية و النوع و الموديل يحتاج خبير مجرب عشان الأعتمادية و سهولة الصيانة و مدى توافر قطع الغيارو سعرها
- بالنسبة لتكلفة العمرة فده محتاج رأي مجرب لمعرفة التكلفة الحقيقية و مدى إمكانية تغيير الموتور لو كان ارخص بموتور أستيراد
لكل ما سبق يا ريت لو حد سواق او مالك عربية يفيدنا
و شكرآ حضرتك مرة تانيه