مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   BMW (https://www.masrmotors.com/vb/forumdisplay.php?f=24)
-   -   زيارتى للبافارية احدث عروض الاكسسوارات الاصلية (https://www.masrmotors.com/vb/showthread.php?t=75682)

AbOnOrA 28-12-2011 05:07 PM

زيارتى للبافارية احدث عروض الاكسسوارات الاصلية
 

مساء الخير على احلى شباب فى اجمد منتديات فى الدنيا

امبارح كان معاد الصيانة الدورية وبالرغم من قرب مركز ابوغالى اللى فى العبور لى وبالرغم من معرفتى بالناس هناك ومعرفتهم بمصر موتورز بس حبيت اروح المركز الرئيسى اللى فى ابو رواش واجرب النظام ايه هناك خاصة ان معنديش حاجة بشتكى منها فى العربيه وانها مجرد صيانة روتينية وتغير زيت

توكلت على الله واتحركت حوالى الساعة 7 من الشروق لاصل لابو رواش فى تمام الساعة 9 وفى خلال نص ساعة بالكتير من وصوولى كانت العربيه اتسلمت ودخلت لجراج الصيانة

علشان تبقو فاهمين الموضوع ماشى ازاى

فيه جراج عام قدام المبنى اى حد يركن فيه
وبعدين بيخرج مهندس الاستقبال يستلم العربيه ويكتب جوب الاستلام ويجيب معاه كام كيس اسود عليهم علامة بى ام ويجمع بنفسه كل حاجة موجودة فى العربيه من متعلقات شخصية ويسلمهالك بنفسه

حاولت حتى اقوله عنك مفيش فايدة الناس عايزة تتعب نفسها مش عارف ليه

طبعاً انا كالعادة عامل العربيه محل خردوات والراجل قعد يلم فى الحاجات يجى ربع ساعة

بعد كده بيسملك المتعلقات الشخصية ويدخل العربيه جراج تانى بتاخد دورها فيه لحد ما تخش الورشة وتخرج من الورشة للمغسلة بعدين للجراج ده تانى

نظام ظريف طبعاً

المهم انا زى ما قولتكم مكانش عندى شكاوى فى العربيه ومكنتش حابب اتفذلك واطلع عيوب او شكاوى هلامية وقولت ليه لاء مستمتعش بالصيانة ولو مرة واحدة فى حياتى من غير شكاوى ولا مشاكل

وقد كان سلمت العربيه بدون اى ملاحظات منى وتوجهت لداخل المبنى بعد ما شربت عشرتاشر سيجارة برة تمهيداً للفترة اللى هقعدها جوه بدون تدخين

طبعاً الناس منسيوش ديه وزى ما هما مانعين التدخين بداخل المبنى عاملين ساحة انتظار للعملاء خارج المبنى للمدخنين وهى ظريفة فعلاً زى جوه بس الهواء هناك صواريخ يا معلم فتغور السجاير الدفاء جوه احسن

دخلت جوة وبدات اتجول بعينى فى المكان وتجهيزاتة ونظامة فاذا باحد المسؤلين فى التوكيل ( معرفة قديمة) بيرحب بيا ويدعونى للانتظار فى ما يسمى بالبيزنس سنتر

البيزنس سنتر ده فى الدور التانى فوق مجهز كساحة انتظار شيك جداً تطل على الورشة مباشرة

طبعاً شىء ممتع انك تبقى قاعد فى رفاهية كاملة وشايف قدامك اكتر من 10 اوناش عمالين يطلعو وينزلو فى اجمل عربيات فى الدنيا قدامك كانك فى ملاهى كوكى بارك :balloons71:

http://www.masr1.com/?di=1Y8S

http://www.masr1.com/?di=DY71

والممتع اكتر هو الورشة نفسها

هى اقرب ما تكون لشارع كامل يتسع لحوالى 40 - 50 عربيه فى وقت واحد كل واحدة فى باكية مخصصة

فيه بواكى فيها اوناش ( حوالى 10 اوناش )

وفيه منطقة مخصصة للدهان والسمكرة تسع لحوالى 10 عربيات مع كابينة دهان كبيرة

واللى لاحظتة ان اكتر العربيات من موديلات حديثة (2006 وانت طالع) حتى اخر موديل من الفئه الخامسة اللى مبقالوش كام اسبوع لقيت منه عربيتين بيعملو صيانة
الموديلات القديمة تقريباً من موجودة ملقيتش غير عربيتين بس فى اليوم كله e46
والباقى كله E90 او x3 X5 X6 وواحدة الفئه السابعة واتنين كوبية وواحدة Z لكن الاغلبية الفئه التالتة او الخامسة

وبعد قرابة ال 3 ساعات انتظار قضتيهم بكل الاستمتاع بمتابعة ما يحدث فى الورشة جالى مهندس الاستقبال يبلغنى ان العربيه خلصت وبتتغسل وبيعرفنى باللى تم فى العربيه

نزلت اشوف العربيه وعرفت انها لسه فى المغسلة فساقنى الفضول انى ادخل الورشة نفسها اتفرج عن قرب خاصة انى كنت هموت واعرف العربيات البرليانس والماهيندارا بيتصلحو فين لانى شايف فى الجراج الخارجى كذا عربية واقفة بس مش شايف فى الورشة ولا عربيه غير عربيات بى ام ومينى

ولما نزلت الورشة عرفت وشوفت ان فيه ورشة تانية كبيرة برضو ورا الورشة الرئيسية وديه مخصصة للماركات التانية وفيها بتتم صيانة البرليانس والماهيندارا وماركة ميكروباصات صينى كده مش فاكر اسمها وحتى كان فيه عربيه اوبترا كمان فى الورشة

وعرفت وشوفت كمان ان الورشة التانية ليها جراج تانى فى ظهرها كمان مخصص للعربيات بتاعتها

يعنى ورشتين كبار وكل ورشة ليها جراج كبير ده غير الجراج الرئيسى والمساحات الخضراء وباقى المخازن والابنية الادارية ماشاء الله مساحة كبيرة جداً وتنظيم ممتاز

الاجمل كمان ان الورشة نظيفة بجد لا تلاقى بقعة زيت ولا بقعة شحم ولا اجهزة ومفكات متبعترة فى كل حتة يادوب كل باكية فيها عربيه وعليها فنى ولا اتنين ولا تلاتة حتى ومعاهم صندوق حديدى كده فيه ادراج فيها العدة خلص شغلة يرجع عدته مكانانها ويجر الصندوق لعربيه تانية

او لو هتغير زيت بيتم باجهزة شفط تترفع العربيه ويتوصل الجهاز وبس

وطبعاً فيه بواكى لظبط العجل والكاوتش والزوايا وخلافة

ده غير منطقة خارج الورشة لغسيل وتجهيز السيارة وجمبها باكية تانية مسمينها فاست لان FAST LANE معرفش ديه بتاعة ايه بالظبط بس لاقيت فيها عربيه 330 بتغير زيت فقولت يمكن مكان مخصص للعربيات الجامدة بس :0959C9~155:

طبعاً لميت كل ما تيسر من كاتلوجات وعروض مع شوية صور وان شاء الله هنزلها تباعاً فى الموضوع

واخيراً دفعت فاتورة الصيانة 165 جنية فقط

بواقع 34 جنية رسوم صيانة قياسية Service standard scope مكتوبة كده
و51 جنية تغيير زيت Engine oil service
و 65 جنية فلتر زيت اصلى Fill element - BMW- Parts
تقريباً بعد الضريبة وصلو 165

يابلاش ارخص من اللى كنت بدفعة فى توكيل الادا والله

باعتذر للاطالة بس حبيت احكيلكم باكبر قد ممكن من التفاصيل وان شاء الله هنزلكم اخر العروض من التوكيل تباعاً

AbOnOrA 28-12-2011 05:31 PM

عروض اسعار الاكسسوارات الاصلية BMW
 
نيجى بقى لعروض اسعار الاكسسوارات الاصلية من التوكيل

اولاً عروض اكسسوارات الفئه التالتة

العرض الاول


يشمل على طقم بدالات الومنيوم اوتوماتيك
وعصا فتيس رياضية بخامات كروم وجلد
وعصا فرامل يد بخامات من الكروم

بسعر 3800 جنية


واليكم الصور

http://www.masr1.com/?di=645O

http://www.masr1.com/?di=A5VY

http://www.masr1.com/?di=Y8IL

http://www.masr1.com/?di=IE3P

http://www.masr1.com/?di=BR72

http://www.masr1.com/?di=1XGE




حازم شاهين 28-12-2011 05:51 PM

رد: زيارتى للبافارية احدث عروض الاكسسوارات الاصلية
 
شكرا على التقرير بس كان ناقصك الصور يا زعيم

AbOnOrA 28-12-2011 05:59 PM

رد: زيارتى للبافارية احدث عروض الاكسسوارات الاصلية
 
العرض الثانى

للفئه التالتة وبالاخص 316 اللى بتنزل فااااااضيااااااااااااااه

العرض يشمل

طقم بدالات الومنيوم كما فى العرض السابق
وطقم جنوط سبور 16 شكل رقك 283
وسبويلر خلفى بلون العربيه

http://www.slickcar.com/products/es-bmw3lip-0607.jpg

السعر 20.287

ايووووووه عشرين الف جنية وكسور



AbOnOrA 28-12-2011 06:00 PM

رد: زيارتى للبافارية احدث عروض الاكسسوارات الاصلية
 
العفو يا باشا وان شاء الله الصور فى السكة


الساعة الآن 03:09 AM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017