رد: اعلانات وعروض البيع والشراء
 

بص ياجميل انا مش اعرف انتا منين وموضوع قطع الغيار ده نادر في انواع زي السوزوكي والكوازكي والياماها الموديلات القديمه فقط انما الهوندا قطع غيارها كلها استيراد ومش هتتعب فيها وال15 اللي معاك ممكن تجيبلك 250 عاده افراج او 250 فاير مرخصه او كمان ممكن تجيبلك 400 عاده مرخصه حالتها معقوله بس نصيحه خليك في الافراج والاستيراد عشان تستلم حاجه مضمونه الي حد ما وربنا يوفقك

رد: اعلانات وعروض البيع والشراء
 

بص يا عم jackbox يا كبير قسم البايكس كنت عايز اسال شوية اسالة معلش ممكن تحسها غبية بس عشان انا معرفش حاجة عن البايكس
بفكر اجيب واحد السنة الجاية بس مابعرفش اسوقو وعمري ماجربت يا ريت تقولي التفاصيل يعني مثلا ليه رخصة قيادة غير بتاعة العربية ومين ممكن يعلمني سواقتو و قطع غيار الهوندا بيبقي موجود واسعارها في رينج اد ايه و يعني ايه افراج و ايه رايك في ال250 العادي ده حلو ولا بطي وميت وهل يقدر يشيل 2 وممكن اقدر اسافر بيه مثلا وايه رينج الاسعار بتاعتو و بيتحطلو بنزين كام ز ايه احسن نوع في مصر يعني يكون في حدود 15 الي 20الف وسوال اخير يا كبير هو مفيش موتسيكلات اتوماتيك يعني كلو مانيوال وهي سواقة المانيوال صعبة
معلش طولت عليك ووجعت دماغك بس اعمل ايه انا مليش في البايكس خالص تعلالي في قسم العربيات وانا اخدمك يا كبير والف شكر ليك ولمعلوماتك الجميلة

رد: اعلانات وعروض البيع والشراء
 

هههههههههه حيلك حيلك ياعم ايه كل ده هههههه عموما انا تحت امرك بص ياباشا هردلك علي كل حاجه بالترتيب
1- رخصه القياده غير الرخصه الخاصه ودي بتبقي مكتوب مكان رخصه قياده خاصه - رخصه قياده دراجه ناريه وخلي بالك انك مينفعش تسوقه برخصه خاصه لان فيها مخالفه .
2- بالنسبه لسواقته طالما انتا مبتديء يبقي احلي حاجه ليك هي ال250 العاده ودي معقول جدا كبدايه ومتقلقش هي مكنه جرايه وبتسافر وزي الفل طالما كل حاجه فيها سليمه ودوره التبريد سليمه.
3-اسعار ال250 العاده بتبدا من 14 ال 15 لو افراج و11 ال 13 لو معلقه نمر وحالتها كويسه
4- كلمه افراج معناها ان البايك لسه معلقش نمر ومفيش حد ركبه في مصر استيراد يعني.
5-ال250 زي ما قولتلك جميله ليك كبدايه .
6- قطع الغيار متوفره جدا لموديلات هوندا .
7- ال250 بيشيل اتنين بس حاول علي اد ما تقدر متركبش اي حد وخلاص وراك عشان لما تبقي متمكن من السواقه وحبيت تاخد غرزه علي سرعه عاليه واللي وراك ده مالوش في الركوب ممكن النهايه تبقي وحشه لكن لازم اللي راكب وراك يبقي ركيب عشان يبقي فاهم يمسك ازاي ولما تيجي تناور يعرف يمسك نفسه.
8- بالنسبه لل250 بتاخد بنزين 90 او 92 وبلاش 95 عشان متسلخش البساتم لكن لو ربنا كرمك بموديل عالي ابقي حط 95 لان كفاءته ممتاااااااااازه
9- وفي حدود 15 ممكن 250 وحدود 20 ممكن 400 عاده ومتنساس ان بيبقي في حاجات لقطه طبعا.
10- مفيش موتوسيكلات اتوماتيك نهائي غير نوع هندي شبه الفيزبا كده وتعبان اخر حاجه .

شوفت بقي 10 اسئله يامفتري هههههههههههههههه انا تحت امرك ياقمر

رد: اعلانات وعروض البيع والشراء
 

واللي عايز يتعلم سواقه الموتسيكلات يعمل ايه بقي بس ماعندوش مشكله في التوازن المشكله في النقل و الغيارات و كده يعني

رد: اعلانات وعروض البيع والشراء
 

الف شكر ليك يا باشا والله ما عارف اقولك ايه انا عارف اني دوشتك بس تعمل ايه بقي انت الاب الروحي لقسم البايكس ان و injection ربنا يكرمكو انت كده جاوبت علي كل الاسئلة اللي كانت بتدور في مخي بجد ربنا يكرمك بس ليا سؤال اخير انا بعرف اسوق عربيات مانيوال وبعرف اسوق عجل هل موضوع سواقة ال 250 المانيوال هيبقي سهل وهاتعلمه بسرعة ؟؟
انا كده بعون الله علي السنة الجاية اشدلي واحد 250 بس باقي اصعب خطوة اني اقنع الحاج والحاجة انت عارف بقي يعني ايه تقولهم عايز اجيب موتوسيكل POLICEE