مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   بروتون PROTON (https://www.masrmotors.com/vb/forumdisplay.php?f=40)
-   -   بخصوص قطع الغيار واخر التطورات في التوكيل (https://www.masrmotors.com/vb/showthread.php?t=58823)

تويتي26980 07-06-2011 02:07 AM

بخصوص قطع الغيار واخر التطورات في التوكيل
 
الأخوه الكرام الاعضاء

السلام عليكم ورحمة الله وبركاته

اغلبكم يعلم عن الجروب الموجود على الفيس بوك

( معا ضد غلاء قطع غيار سيارات بروتون في توكيل عز العرب )

واللذي انشيء من حوالي 4 اشهر ونصف واللذي كان من اهدافه الوقوف أمام غلاء قطع الغيار والمصنعيات وعدم توافرها احيانا في توكيل سياراتنا

واغلبكم يعلم انه تم عقد اجتماع بيننا وبين الساده مديري توكيل عز العرب وانهم وعدونا بتحقيق اهداف الجروب خلال 3 أشهر

ولكن المفاجأه سوف تستنتجوها مما دار في الحوار الاتي بيني وبين التوكيل وخاصة السيد الموقر البشمهندس أمير سابا بصفته مدير بروتون في مصر في توكيل عز العرب


اني من حوالي شهر اتصلت بالتوكيل لأسال على بلية الكاتينه وسير الكاتينه لسيارتي الجن 2 موديل 2008

وكان الرد انهم مش موجودين وهييجوا كمان اسبوع وانا كنت مش محتاجهم وقتها ولكن فقط لانني كنت داخل على صيانة ال 120000 كلم

ومن كام يوم قررت عمل الصيانه في مركز عصام وصفا التابع للتوكيل والمعتمد منه وذهبت الى المركز لعمل الصيانه وفوجئت بان البليه والسير غير موجودين ايضا فقلت اتصل بالتوكيل واشوفهم

وكلمت التوكيل قالي انهم مش موجودين وهييجوا كمان 10 ايام

قفلت واتصلت بالبشمهندس امير سابا وبلغته باللي حصل

وكان رده انها جات وخلصت

قلتله طيب يعني جات كميه قليله وانا وصلي كعميل انها مش موجوده
قاللي حصل عليها ضغط وخلصت فجاه !

طيب دي قطعه استهلاكيه وموجوده في جدول الصيانه ازاي اسال عليها والاقيها مش موجوده

يعني اسال على تيل فرامل مالاقيش !

المهم قاللي كنت حجزتها لما اتصلت اول مره

قلتله وهل اصبح من الطبيعي اني لما احتاج قطعه احجزها واستناها لما تيجي ولا الطبيعي تكون موجوده ؟

قاللي لو هتيجي الاجتماع القادم بالتفكير ده يبقى مش هنوصل لحل !

طبعا بعد كل ده انا ركنت عربيتي وغطيتها وبستعمل عربية اخويا

ولكن طبعا مش عاجبني اني اخد عربية اخويا وانا عربيتي واقفه عشان بليه وسير مش موجودين في التوكيل ومش بتتباع البليه دي تحديدا بره في اي مكان

وهل انا اشتريت عربيه عشان اركنها واركب عربية اخويا

والله مهزله !

ولكن صدقوني انا والله على اتم الاستعداد اني ابيع العربيه دي واشتري عربيه وكيلها بيحترم ملاكها وبيقدرهم ده ان وجد للاسف في مصر

والله ندمت للحظه اني اشتريت العربيه دي لما حصلي الموضوع ده ولكن بعد ماهديت لقيت ان العربيه محترمه وحلوه ولكن وكيلها مسوء سمعتها بسياسته واسعاره

المفاجاه التانيه من التوكيل بأه

انه غلى اسعار المصنعيات من 88 جنيه للساعه الى 100 جنيه للساعه من اول الشهر ده

يااااااااااه

هما طلبوا مننا نديهم مهله لتحقيق الاهداف !

صدقوني طول ماحنا كملاك واقفين نتفرج على التوكيل وهو بيعمل اللي هو عاوزه ومش بنعمل حاجه ولا هيتغير ولا مصر كلها هتتغير

انا اسف لو كلامي ضايق حد ولكن والله انا بعمل كده عشانكم وعشاني وعشان بلدنا اللي نفسي تبقى نضيفه

احنا راكبين عربيه بسعر عربيه الماني بره مصر وبردو التوكيلات بتبهدلنا

اخيرا
اتمنى نتغير ونبقى ايد واحده كلنا كملاك واخوه

انا مايهمنيش احنا على الجروب كام ولا هنا كام لانها مش بالعدد لأ

بالجديه والتعاون

اتمنى يكون كلامي ماضايقش حد ولكن والله من قلبي اتكلمت وكاني بكلم ناس عارفها من زماااان


تقبلوا تحياتي جميعا

أحمد الشاعر

علاء عزمي 11-06-2011 07:03 PM

رد: بخصوص قطع الغيار واخر التطورات في التوكيل
 
والله كلامك يا استاذ احمد ممتاز
واحب اعرف حضرتك ان الساعة بقت 110 مش 100 زي ماحضرتك قلت والله العربية ممتازة لكن دايما كده الحلو ما بيكملش ولازم بجد نقف واقفة واحدة عشان نتقدم وشكرا يا استاذ احمد

تويتي26980 13-06-2011 02:10 PM

رد: بخصوص قطع الغيار واخر التطورات في التوكيل
 
شكرا استاذ علاء وهي بالفعل اصبحت ب 110 بالضريبه

وبالمناسبه على الجروب على الفيس بوك

ماليزيا ردوا علينا والخطاب موجود على الوول في الجروب

ويارب بس الناس كلها تبقى ايجابيه ومانبقاش قاعدين بنتفرج على الاهمال وساكتين


تقبلوا تحياتي جميعا

abzeid 14-06-2011 12:17 PM

رد: بخصوص قطع الغيار واخر التطورات في التوكيل
 
بسيطة على فكرة، كلنا نبعت للشركة الأم في ماليزيا ونخلي التوكيل يتسحب من الوكيل اللي مش عارف يقدر النعمة اللي في ايديه، هاكتب الصيغة النهاردة إن شاء الله، وهانشوف، الناس دي مش بتيجي غير بالعين الحمرا أصلاً والله لنوريه

تويتي26980 15-06-2011 04:13 AM

رد: بخصوص قطع الغيار واخر التطورات في التوكيل
 
اقتباس:

المشاركة الأصلية كتبت بواسطة abzeid (المشاركة 452676)
بسيطة على فكرة، كلنا نبعت للشركة الأم في ماليزيا ونخلي التوكيل يتسحب من الوكيل اللي مش عارف يقدر النعمة اللي في ايديه، هاكتب الصيغة النهاردة إن شاء الله، وهانشوف، الناس دي مش بتيجي غير بالعين الحمرا أصلاً والله لنوريه


يااستاذي العزيز احنا بعتنا بالفعل والمدير العام رد علينا من يومين

والرد على الجروب

وقريبا هتلاقي تقدم وتغيير ملحوووووظ ان شاء الله

ولكن انا اتمنى الكل يبقى متواجد على الجروب عشان نتابع مع بعض ونعرف المستجدات والتطورات

تقبلوا تحياتي جميعا


الساعة الآن 05:15 AM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017