مصر موتورز مجتمع السيارات - اشهر مشاكل التكييف الدارجه

السلام عليكم
فيه اسباب كتير تخلي التكييف يفضي (بصفه عامه)

حضرتك بتركب عربيتك وتشغل التكييف (يا يطلع هواء سخن أو ميطلعش حاجه خالص)

اول حاجه تعملها انك تروح لبتاع تكييف بيضغط هواء فى التكييف ويشوف لو فيه تسريب أو لو فيه مشكله فى الكمبروسير
اشهرهم

- السربنتينه تتخرم من طوبه صغيره جدا (الناس أللي بتسافر كتير)
الحل انك بتحل السربنتينه عنده بعد تحديد مكان الخرم وتلحمها فى ورشه لحام وترجع يشيك تانى بالهواء وبعدين يحوط الفريون , غيه عربيات السربنتينه مش امام شبكه التهويه الأماميه للسياره (يبقى ده مستبعد ليهم)

- السربنتينه بتكون مش مربوطه صح (فى المره أللي فاتت) فتتهز وتتحك من طرفها فى الريداتير أو بودي العربيه وطبعا نفس الخطوات اللي فاتت (تحلها وتلحم وتركب وتشحن)

- بيكون فيه تسريب فى بلف الفريون (بيشيك عليه بالصابون ويغيره و يشحن فريون وانت عنده)

- خرم او شق فى مواسير الفريون (نفس أللي فات) بس ممكن تتعطل فى قطعه الغيار

- سير التكييف بايظ أو بليه شداد السير مقطومه (هنا بتغير البليه بالشداد طبعا وبيكون الفريون سليم) فى حالت فيه هواء سخن طالع من الهوايات داخل السياره يعنى السير سليم والبليه والشداد ايضا سلام)

- ابعد المشاكل ان الكهرباء بتاعت العربيه مش بتقوم الكمبروسور بتاع التكييف بالتالي السير بيشتغل اكنه مروحه بس من غير تكييف

- اغلس حاجه ان وهوا بيكشف يلاقى كله سليم وصوت التنفيس من داخل الطبلوه (حل يا معلم وامشي بالصابون ورا المواسير حتى تجد الخرم )

اسعار الفريون عن تجربه شخصيه من 120 الي 160 طبعا ده يرجع لمكان الورشه فيه ناس اتعاملت معاهم (كنت مضطر) قالي 210 الفريون + المصنعيه , طبعا قلتله (معطلكش) و جيت علي نفسي اني امشى مشوار حتي الراجل ألي بتعامل معاه

بصفه عامه يفضل تشغيل التكييف صيف وشتاء (انا بشغله السنه كلها)
الشتاء عموما او لما تكون بتمطر (بتشتي بالأسكندراني) طبيعى بتقفل الشبابيك ولآن العربيه فيها نفس واسخن من الخارج هيتكون ضباب من الداخل
طبعا متجبش منديل وتمسح بشوف عربيات احدث موديلات بيعملوا كده(غلط غلط غلط غلط) لأنك بتبهدل الرؤيا , اول ما تفتح الزجاج مره تانيه بتلاقى الزجاج الأمامي بقي مزيت ومتبهدل + مش بتركز فى القياده
الحل البسيط والسهل انك بتفتح التكييف علي واحد فقط وتخلي الريش علي الهوايات (يعنى تكييف علي الزجاج فقط) هتلاقى الزجاج نضف لوحده من غير مشاكل والرؤيه تمام ان شاء الله ومش هتسقع من التكييف

يارب اكون افدتكم ولو بحاجه بسيطه
:loveu: