|
مساعدة في صيانة 20000 كم مازدا 3 2010
السلام عليكم شوية استفسارات بسيطة بما اني داخل على صيانة ال 20000 كم و زي مانتم عارفين اني قررت أبعد عن الش .... قصدي غبور ( لحسن حد يفتكر إني باسب و بالعن في غبور ولا حاجة ) 1- المفروض إني حاغير زيت و فلتر 10000 كم ايه احسن نوع زيت 10000 هل هو موبيل 1 ولا شل الترا ولا حاجة تانية ( سمعت عن زيوت كاسترول بس معرفش عنها حاجة ) و هل من الأحسن اني أنزل الزيت من الطبة ولا أشفطه و بعد التغيير هل من المستحسن يتحط على الزيت إضافات ولا بلاش أحسن 2- المفروض حسب الجدول إني أغير فلتر التكييف و أنا حاسس إنه ملوش داعي , مع العلم باني مش حاسس ان اداء التكييف اتأثر 3- الباقي تربيطات عفشة و فحص لجميع أجزاء السيارة تقريبا وبالنسبة لمقص الكاوتش و الزوايا و الترصيص هل يتعملوا ولا لو فيه مشكلة فقط ؟؟ هل فيه حاجات معينة ممكن تتعمل زيادة ؟؟ أو حاجات اخد بالي منها ؟ و لو حبيت أغسل الموتور أستعمل ايه بالضبط ؟ و هل من المستحسن وضع إضافة على البنزين أو مادة لتنضيف الرشاشات و لا مش وقته ( لسة بدري ) ؟؟ محتاج اراءكم و مقترحاتكم |
رد: مساعدة في صيانة 20000 كم مازدا 3 2010
1- المفروض إني حاغير زيت و فلتر 10000 كم ايه احسن نوع زيت 10000 هل هو موبيل 1 ولا شل الترا ولا حاجة تانية ( سمعت عن زيوت كاسترول بس معرفش عنها حاجة ) لو فعلا كاسترول مصنع و معبأ فى الخارج يبقى احسن المهم يبقى مواصفة بقدر الامكان زى او قريبة من الموصى بها فى الكتالوج و هل من الأحسن اني أنزل الزيت من الطبة ولا أشفطه الطبة افضل و بعد التغيير هل من المستحسن يتحط على الزيت إضافات ولا بلاش أحسن بلاش أحسن 2- المفروض حسب الجدول إني أغير فلتر التكييف و أنا حاسس إنه ملوش داعي , مع العلم باني مش حاسس ان اداء التكييف اتأثر ملوش داعي لو امكن يتفك و يتنفخ فيه من الناحية التانية يعنى ناحية عكس دخول الهوا ليه لطرد الاتربة منه و زيادة كفائته 3- الباقي تربيطات عفشة و فحص لجميع أجزاء السيارة تقريبا وبالنسبة لمقص الكاوتش و الزوايا و الترصيص هل يتعملوا ولا لو فيه مشكلة فقط ؟؟ لو فيه مشكلة فقط بس مفيش ضرر من مراجعة تربيط العفشة هل فيه حاجات معينة ممكن تتعمل زيادة ؟؟ أو حاجات اخد بالي منها ؟ طالما مفيش شكوى يبقى تمام كده و لو حبيت أغسل الموتور أستعمل ايه بالضبط ؟ بلاش غسيل ماتور خالص و اذا كان و لا بد يبقى حوض الماتور فقط اما اجزاء الماتور فبالفوم الخاص و هل من المستحسن وضع إضافة على البنزين أو مادة لتنضيف الرشاشات و لا مش وقته ( لسة بدري ) ؟؟ ممكن عند 40 الف منظف رشاشات انتاج امريكى |
رد: مساعدة في صيانة 20000 كم مازدا 3 2010
بص يا هندسة صيانة العشرين ديه فى رائى من اهم الصيانات للعربيه وبصراحة عايز اوعز لك تروح تعملها فى التوكيل بس علشان الكشف على الجهاز لكن كل حاجة تتعمل بره احسن ما تتعمل فى التوكيل وقدام عينيك ديه بنود الصيانة تغيير زيت المحرك - زيت الباور - زيت فرامل - زيت الفتيس ** ولو حابب تحط اى اضافات لتنظيف المحرك او الرشاشات حطها قبل الصيانة مثلا منظف الرشااشات تجيب علبة تفضيها على نص التانك ولما تخلص نص التنك روح اعمل الصيانة - زيت الفتيس يفضل الكشف عليه وتزويدة ان لزم الامر فقط بدون تغيير خاصة الاوتوماتيك غير فلتر زيت المحرك - تغيير فلتر هواء - تغيير فتر التكييف وانت بتغيير فلتر التكييف او لو هتغير السير بتاعة خليه يقيس الفريون ولو محتاج يتزود زودة بس انا رائى لو التكييف شغال كويس غير فلتر وبس - الفلاتر عامة فى بلدنا وجونا ده اكيد بتقاسى فانصحك تغييرهم كلهم وتجيب الانواع الاصلية - فلتر التكييف مهم لانه بيحوش تراب وبكتيريا فميقلش اهمية عن باقى الفلاتر حتى لو التكييف شغال كويس فحص سيور المحرك (كاتينة - دينمو - تكييف - باور ,, دول يتبص عليهم بس ميتغيروش لسه دلوقتى تغيير بوجيهات فحص / تغيير الفريون تغيير مياة الريداتير (غسيلة) وفحص المروحة والتوصيلات الخاصة به تزويد مياة المساحات وفحص الكاوتش الخاص بها او تغييرة فحص البطارية وتزويدها ان كانت سائلة وده شغل العفشة فحص / تغيير تيل فرامل امامى وخلفى والاسطوانا ت او الطنابير تغيير او تزويد زيت الفرامل فحص العفشة وتربيطها (كبالن - مقصات - مساعدين - سوست - جلب ،،، الكشف على الكاوتش واعادة ترصيصة ان لزم الكشف على الزوايا واعادة ضبطها ان لزم الكشف على انابيب ومواسير التكييف والتبريد والعادم كشف ظاهرى بس كده مراجعة ضبط رجلاش الدبرياج والسلك بالنسبة للسيارات المانيوال مراجعة قراءه كمبيوتر السيارات ومسح الاعطال بس يا سيدى وتطلعها من الفرن وبالهناء والشفاء :01FDAB~189: |
رد: مساعدة في صيانة 20000 كم مازدا 3 2010
بالنسبة لاسئلتك
1- زيوت المواتير كها متاشبهه بنسبة 99و9% طالما نفس المواصفة الهندسية فى رائى غير الزيت بالمواصفة المناسبة حسب الكاتلوج ومتحطتش اى اضافات انا فى رائى كمان تغيير الزيوت الغير تخليقيية افضل لانه بيتم كل وقت اقل وده فرصة لتنظيف الموتور وتغيير الفلتر وبفضل تحديدا الزيوت اللى بتتغير كل 5000 زى شيل الاصفر او الازرق 2- بالنسبة للعفشة لو مش عايز تعمل فيها حاجة روح اكشف على الكاوتش بس والزوايا ولو فيه حاجة فى العفشة هيرجعك للعفشجى مفيش يبقى اطمنت 3- وبالنسبة لغسيل الموتور ( او بالاحرى غسيل الحوض) انسب حاجة متغسلوش اصلا لو نظيف وحسب الحالة تدرج بداية من فوطة زفرة مساعد الميكانيكى يلمعلك بيها الحوض اثناء وبعد الشغل فى الصيانة تنظيف بالهواء المضغوط ( مضغوط مضغوط مش هواء كمبروسور عجلاتى ) تنظيف بالفوم وبعديه الهواء تنظيف بالسؤائل الخاصة وديه علبة بتتباع فى محلات الاكسسوارات بيترش بيها على الموتور والحوض والمناطق العرقانة زيت اكتر لتذويب الاوساخ والزيوت وبعدها تستخدم الهواء لو فضل الموتور مش نضيف اوى بعد كل ده سيبة على كده غسيل الحوض بالمية او بالجاز من اكتر الحاجات المضرة لمكونات حوض العربيه عموما ويفضل تجنبة قدر المستطاع |
رد: مساعدة في صيانة 20000 كم مازدا 3 2010
اقتباس:
اقتباس:
الرد في القتباس اقتباس:
|
| الساعة الآن 03:07 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017