مصر موتورز مجتمع السيارات - المفيد فى تركيب الكاوتش الجديد بالصور

الكاوتش اهم واخطر جزء فى السياره وتقريباٌ 70 % من حوادث السيارات سببها مشاكل فى الكاوتش وده لأنه الجزء الوحيد من السياره اللى متصل بالأرض

ولخطورة وأهميه الكاوتش حبيت اعمل موضوع بسيط اوى عن ازاى تنقى كاوتش جديد وازاى يكون مناسب لسيارتك ويرفع من آدائها ( تماسك على الطريق , مسافة توقف , اتزان ) مش يقلل منه

اكيد قبل كل شىء لازم نلتزم بالمقاسات اللى مقررها صانع السياره ليها

ودى بتبقى موجوده على آيم السياره بتاع السواق او فى درج التابلوه او فى غطاء تانك البنزين الخارجى من جوه وطبعاٌ موجوده فى الكاتلوج الخاص بالسياره

http://i757.photobucket.com/albums/x...ps1224145f.jpg

طبعاٌ كلنا عارفين ان اللعب فى المقاسات بيؤدى الى خلل كبير فى آداء السياره وايضاٌ فى قرائات العدادات والأهم من كده بيخل آداء الفرامل وكمان بيفرق فى استهلاك البنزين

بس اذاى الكلام ده

لو فرضنا ان مقاس العربيه الآصلى 185\60\14

لو حبينا نغير هنلتزم بالمقاس

طيب لو غيرنا وجبنا مقاس 195\60\14 ايه اللى يحصل

اولاٌ ارتفاع العربيه الأجمالى هيزيد 0.6 سم

ثانياٌ قارية العدادات هتختل يعنى لما العداد يقرا سرعتك 100 كيلو هتكون سرعتك الحقيقيه 105 تقريباٌ

طيب لو حبينا نعمل UP GRADE للعربيه

يعنى هنفترض ان مقاس العربيه الأصلى 175\70\13 زى اغلب العربيات ( فيرنا , لانوس ) وهنغير جنوط نحط مقاس كام

اولاٌ 185\60\14 وده متوازن آداء معقول وراحه معقوله فى المشى

ثانياٌ 195\50\15 وده زياده آداء وناقص راحه بس ماشى الحال

ثالثا 205\40\16 وده غير مقبول وخاصه مع شوارعنا الجميله

يعنى نحاول دايماٌ ان ارتفاع جانب الأطار ميقلش بأى حال من الأحوال عن 10 سم

طيب كتير هيقولى تأثير الجنوط ايه على العفشه

وهل فيها ضرر ؟

ممكن واحد مركب مقاس 195\50\15 والعفشه معاه ممتازه ومفيش اى مشكله

وواحد تانى مركب نفس المقاس وتلاقيه كل يوم بيربط فى العفشه والدنيا بايظه معاه والكاوتش بيحك فى الفجاوى اللى وراه مع اى مطب

ايه الفرق ؟

الفرق هنا فى الرقم السحرى ال ET

ما هو ال ET ؟؟؟

هو الرقم الذى يبين خروج ودخول الجنط من جسم السياره

ومدى التحرك الآمن لينا مع تركيب الجنط السبور هو ( - 10 )

يعنى لو الجنط الأصلى رقم ال ET ليه هو 49 ( دايو لانوس )

يبقى ممكن نركب جنط اسبور رقم ال ET ليه 39 بحد اقصى

وده معناه الجنط والكاوتش خرجوا بره 10 مم او 1 سم

غير كده العفشه هتزعل وانت كمان هتزعل

الصوره دى بتوضح مكان الرقم فى الجنط الحديد الأصلى للسياره

http://i757.photobucket.com/albums/x...0091117612.jpg

والصوره دى بتوضح مكانه فى الجنط الأسبور

http://i757.photobucket.com/albums/x...0091114593.jpg

علشان نفهم اكتر هنبص على الصوره الجايه
اللى هتوضحلنا كل الرموز اللى بتبقى على الكاوتش وبعدين هنتكلم على اللى يهمنا منها بالترتيب

http://i757.photobucket.com/albums/x...ps9ea4b2dd.jpg

فيه رموز مش هذكرها لعدم اهميتها للمستخدم العادى

اولاٌ

تاريخ الأنتاج

فرضاٌ فى الصوره مكتوب 4807

يعنى الأسبوع ال 48 من سنة 2007

48 \ 4 = 12 يعنى الكاوتش ده انتاج شهر 12 سنة 2007

مهم اوى يكون انتاج حديث يعنى نفس سنة الأستخدام

وده لأن الكاوتش يفسد بعد 5 سنين من انتاجه حتى لو لم يستخدم

ويفضل تغييره بعد استخدامه لمسافه 50 الف كيلو مع الحفاظ على تبديل مكان الكاوتش فى العربيه كل 10 آلاف كيلو بطريقة المقص ( نبدل ورا يمين مع قدام شمال والعكس )

طبعاٌ ماركة الكاوتش فارقه كتير بس الأهم من الماركه معاملات الآداء الخاصه بالماركه

يعنى ايه الكلام ده ؟

يعنى مثلاٌ الجوديير من اعرق الماركات العالميه فى الكاوتش والكومهو اقل منها فى الشهره واكيد فى الأسعار تقريباٌ نصف السعر

بس مثلاٌ ال Kumho Ecsta SPT (KU31) بمعاملات آداء ( تماسك tracion AA ومعامل سرعه V )

http://i757.photobucket.com/albums/x...04091057-1.jpg

اعلى بمراحل من الجوديير GT3 بمعاملات آداء tracion A و معامل سرعه T

نفهم من الكلام ده ان اهم معاملين آداء نبص عليهم فى الكاوتش الجديد ال TRACION و معامل السرعه

الصوره بالأعلى موضحه كل رمز سرعه بيدل على سرعه كام

مثلاٌ الرمز V بيدل على سرعه 240 كيلو فى الساعه ودى اعلى سرعه ممكن الكاوتش يتحملها ولفتره قصيره

لذلك انا بفضل اجيب رمز سرعه عالى لأن كل ما زاد معامل السرعه زادت قوة بنية الأطار

اكيد طبعاٌ نقشة الأطار بتفرق

يعنى فى اطارات شتوى و اخرى صيفى واخرى كل المواسم

دى صورة نقشة اطار كل المواسم

http://i757.photobucket.com/albums/x...pse44276eb.jpg

ودى صورة نقشة اطار صيفى والفرده دى تحديداٌ انا بفضلها

http://i757.photobucket.com/albums/x...psbfa8bc60.jpg

طبعاٌ احنا بيناسبنا الصيفى اكتر

هنيجى بقى للتركيب على الجنط وده اهم جزء

اى كاوتش جديد عليه علامتين حمراء وصفراء

http://i757.photobucket.com/albums/x...ps07337ef6.jpg

واختلف الآطباء فى معناهم وفائدتهم فى التركيب

بعد البحث والفحص والتمحيص توصلت الى الآتى

العلامه الحمراء

http://i757.photobucket.com/albums/x...ps3a786b59.jpg

فى الكاوتش الجديد بتدل على اعلى نقطه فى دوران فردة الكاوتش لأننا عارفين ان مهما كانت جودة صناعه الفرده مش هتبقى بدوران مستوى 100 % لازم يبقى فيها بيضاويه سنه بسيطه اعلى نقطه فى البيضاويه دى بيحددوا مكانها بنقطه حمراء

where the tyre's high spot is. Manufacturers typically mark this point with a red dot on the tyre sidewall

يقابل العلامه الحمراء دى نقطه مفحوره فى الجنط بتدل على اوطى نقطه فى دوران الجنط وطبعاٌ لما بنظبط الأتنين على بعض بناخد دوران مكتمل ممتاز وده بيريح جامد اوى فى مشى العربيه

http://i757.photobucket.com/albums/x...ps6d35a268.jpg

العلامه على الجنط مش بتبقى موجوده الا على الجنوط الآصلى و الجنوط الأسبور النضيفه بس ( تيوانى و بعض الأندونيسى ) لايوجد على الجنوط الصينى اى علامات

http://i757.photobucket.com/albums/x...psd548db7a.jpg

اما العلامه الصفراء

العلامه الصفراء على الكاوتش الجديد بتدل على اخف نقطه فى ترصيص الفرده بدون جنط ودى لما بنركب بنظبطها مقابله لمكان البلف فى الجنط لأن مكان البلف هو اتقل نقطه فى داير الجنط لو رصصناه بدون كاوتش
corresponding to the light spot. Typically this is a yellow dot

طيب لما نلاقى الكاوتش الجديد فيه العلامتين الآولويه لمين فى التركيب ؟

العلامه الآهم فى التركيب هى العلامه الحمراء

اما فى حالة عدم وجودها

فنظبط العلامه الصفراء على البلف وبس

ارجو يكون الموضوع اعجبكم وافادكم

و طبعاٌ تحت امركم فى اى استفسار