مصر موتورز مجتمع السيارات - تجربة شراء من جوميا مصر Jumia

اصدقائى الاعزاء اعضاء اسرة مصر موتورز انهارده هحكيلكم عن تجربة خارج اطار عالم السيارات بس قريب جدا انا مؤمن ان هيكون ليها علاقة بالسيارات وتحديدا الشراء من خلال الانترنت واللى متوقع ليه فى المستقبل القريب جدا يشمل شراء قطع غيار السيارات او حتى السيارات نفسها من خلال الانترنت

https://static.jumia.com.eg/cms/Icons/jumia--logo-.png

تجربة شراء من جوميا مصر Jumia
موقع جوميا بداء فى 2006 مع ازدهار الانترنت فى مصر فى الفترة ديه كموقع قوى ومنافس الى ان وصل للصدارة مع موقع سوق وغيره من المواقع الاشهر فى مجال التسوق من خلال الانترنت
الموقع دلوقتى بيبيع مجموعة كبيرة من المنتجات ومن ضمنها كماليات واكسسوارات السيارات https://www.jumia.com.eg/cars-accessories/
تجربتى كانت كالتالى
سجلت فى الموقع عن طريق حساب الفيسبوك ..
عملت اوردر لفلاشة USB 32G
1x 32GB DataTraveler USB 2.0 Flash Drive - Silver
EGP 95
سعرها ع الموقع كان 95 وده احسن سعر للنوع ده Kingstone
وفيه محلات بتبيعها باسعار متفاوته من 100 - 140 جنية
وبالتالى حتى مع قيمة الشحن هيبقى سعرها معقول كتجربة

بعد ما بتعمل الاوردر بيبان فى صفحة حسابك الاوردر ورقمة وتقدر تستعلم بعد كدة عنه بالرقم وتشوف وصل فين
المشكلة هنا بس ان بعد ما بتعمل الاوردر مينفعش تعدل حاجة فمهم تراجع الاوردر كويس قبل ما تبعته

الشحن والتسليم
طبعا المواقع بتاعة بره لسه متقدمة بالاف السنين الضوئيه فى الموضوع ده تحديدا فيديك امكانيات متطورة لمتابعة مراحل الشحن والتسليم وامكانيات لتجميع اكتر من اوردر فى شحنه واحدة او تجميع اوردرات الى حد معين وبعدين ارسالها ودنيا تانية خالص ناهيك عن السرعة والدقة فى تحديد المواعيد
انا فى تجربتى معاهم فى المواعيد للاسف كانت سيئه انا طلبت فى يوم 17 وعلى كلام الموقع ان الاوردر وصل لشركة الشحن يوم 22 فمبدئيا كتير اوى اربع خمس ايام لتنفيذ الاوردر اما التسليم فكان يوم 25 يعنى كمان شركة الشحن اخدت 3 ايام لتوصيل الاوردر
بس اجمالاً مش كارثة ممكن يكون معقول بس اخشى لو فيه ضغط على الشركة بعد كدة يبقى فيه تاخير اكتر ومشاكل اكتر

اخيرا التعبئه بالنسبة للفلاشة كانت لفه فى ورق تغليف (اللى فيه كور هواء بتفرقع ده :) واللفة ديه جوة شنطة مغلقة عليها شعار جوميا

المتابعة .. من ناحية جوميا صفر محدش اتصل ياكد الاوردر مثلا او اى حاجة الاتصال الوحيد كان من شركة الشحن يوم التسليم من المندوب علشان يعرف العنوان بالظبط وبس

التسليم .. المندوب بيديك فاتورة (صورة ضوئيه ) او مطبوعة بدون اختام
الورقة نفسها اقل ما يقال عنها انها ((عررة )) ده حتى الحبر يظهر كان بيخلص من البرنتر اللى طبعتها
وكمان المندوب مبيسلمكش الاوردر الا لما يستلم الفلوس وملوش دعوة باى حاجة غير دورة كمندوب شركة شحن يسلم ويستلم
ملحوظة اخيرة هما بيدوك على الموقع بس امكانية تحديد معاد التسليم وانا كنت مختار من 8 مساء ل 11 لكن فعليا الراجل جالى 3 العصر :D
من حيث الخدمة اجمالا نقدر نقول معقولة لا هى مميزة ولا هى سيئه فى الاخر الحاجة وصلت سليمة والسعر بعد قيمة الشحن |(30جنية) برضو معقول واجمالاً التجربة جيدة لكن اتمنى تكون افضل ولسه جوميا قصادها حاجات كتير تطورها للوصول للريادة