|
هل اصبحت البونتو لا تصلح لجو مصر الحار ؟
السلام عليكم
أهل الخبرة الكرام .... محتار جدا ومحتاج رأي حضراتكم معايا بونتو 2003 .... العربية بتسخن مع التكيف .... ومؤشر الحرارة بيعدي النص لفيت لفة كبير ( مياكنيكي - كهربائي - بتاع تكيفات - بتاع ريداتيرات ) وغسلت الريداتير وحطيت ميه خضرا وغسلت السربنتينه والمرواح شغاله كويس السرعتين الاولي والتانية و .... خلاصة الكلام ...محدش عارف ايه سبب المشكلة !! الميكانيكي بيقولي للاسف دي مش اول عربية بونتو تجيله فيها نفس المشكلة والحل ف الايام الحر متشغلش التكيف ! ... وقالي غير الريداتير بواحد جديد تكون قمصان التبريد فيه اوسع ! وده علي سبيل التجربة طبعا ! والعربية كويسة جدا ...بليل مع التكيف او بالنهار بدون التكيف ومبتسخنش .... اما في يوم حار نهارا ومشغل التكيف بتبدأ العربية تسخن والمروحة تشتغل علي السرعة التانية العالية باستمرار ومؤشر الحرارة يعدي النص ولما اقفل التكيف تبرد العربية تاني فهل فعلا بقينا زي الخليج ... واصبحت البونتو لا تتحمل جو مصر الحار الجديد ؟ ام لديكم حلول لهذه المشكلة ؟ وشكرا مقدما علي اهتمامكم ... |
رد: هل اصبحت البونتو لا تصلح لجو مصر الحار ؟
انا عندي برضه نفس العربية و نفس الموديل و عندي نفس المشكلة
لو ده بيحصل عندك قوللي العربية ما بتسخنش خالص طول ما التكييف مقفول ؟ و طول ما التكييف شغال بالليل ما بتسخنش ؟ لو مسافر مثلا في الظهر و مش مشغل التكييف و مشيت اكتر من 120 كم/س هتعلي معاك شرطة ؟ لو ده بيحصل معاك يبقي المشكلة هي عدم ملائمة جو مصر للعربية و بالذات في الصيف الحل ؟؟ دورة التبريد مش بتقدر تبرد العربية في الظروف دي و علشان كده انا بفكر مبدئيا اعمل نظام مروحتين واحد للتبريد سرعتين و التانية للتكييف سرعة واحدة او مانيوال |
رد: هل اصبحت البونتو لا تصلح لجو مصر الحار ؟
اه اللي بتوصفه ده بالظبط بيحصل ... وخصوصا موضوع السفر وازود عن ال 120 ..او بشكل ادق ....لما ال RPM بيعلي عن 3000 وانت جايب الخامس بتبدا تسخن برده وتعدي النص ... ارجع لل 3000 تهدي وتبرد تاني
انا وديت العربية مؤخرا تاني لبتاع ريداتيرات ... وفك الريداتير وسلكه مواسيره ولقي فعلا 3 مواسير مسدودة ده طبعا كان مأثر علي دورة التبريد بشكل عام ... لكن برده لسه مسافرتش بيها مشوار طويل ... عشان احكم واجرب |
رد: هل اصبحت البونتو لا تصلح لجو مصر الحار ؟
hعتقد العربيات الاروبى كلها فيها نفس المشاكل علشان كدة اخوانا فى الخليج بيفضلو العربيات اليابانى والامريكانى
|
رد: هل اصبحت البونتو لا تصلح لجو مصر الحار ؟
اللي حضرتك بتوصفه ده هو السبب الرئيسي في فشل سيارات فيات في الخليج وكل الدول برا أوروبا ومحيط البحر المتوسط. أنا أفتكر لما كنت صغير ووالدي اشترى فيات 131 1600 بالتكييف عالزيرو سنة 1977 وكنا ساعتها عايشين في الكويت. طبعا اشترى الفيات زي كل المصريين. ما افتكرش إن كان فيه مشوار كنا بنروحه من غير ما العربية تقف علشان سخنت... ده غير المكيف اللي يدوب بالكاد بيسقع. العربية قعدت عندنا 5 سنين... واتباعت غير مأسوف عليها بعد ما اشترينا بدالها تويوتا كريسيدا (زي اللي في التوقيع بتاعي) طبعا مش محتاج أقوللك قد إيه العربية كانت بتروح أي مشوار بدون أي مشاكل.. ده غير التكييف اللي ممكن تسقع منه بالليل.. بالإضافة إلى الوسع وكمية من الأوبشنز ما كانتش موجودة في الفيات. الفيات 131 كانت عالزيرو بـحوالي 5000 دينار.. واتباعت بـ300 (مش 3000) الكريسيدا كانت بـ2500 دينار.. ونزلنا بيها مصر.. وبعتها في 2009. وسلملي عالفيات ... |
| الساعة الآن 02:50 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017