مصر موتورز مجتمع السيارات - تجربتي مع قيادة اللوجان و الاوبشنز الي عرفتها

السلام عليكم
الحمد لله استلمت العربية امبارح بالليل الساعة 8 من التوكيل
هي رينو لوجان فول اوبشنز مانوال
و سوقتها نص سساعة بس لحد البيت و اهي مركونة في الجراج من ساعتها و مستني الفرج عشان اعلق النمر ان شاء الله
المهم انا هقولكم علي شوية ملاحظات و اتمني من الملاك القدامي الرد علي
انا بصراحة حاولت ادور علي المنتدي عن موضوع لتجربة قيادة اللوجان ملقتش
فارجو من المشرف لو فيه موضوع سابق يدمج موضوعي معاه

انا استلمت العربية من التوكيل و هي عاملة 9 كيلو بس و ده شيء كويس
استلمت من شركة "عربيات" الي في المهندسين قدام الحامدية الشاذلية و بصراحة الناس هناك محترمين اوي

خلاصة تقييمي للسيارة انها ممتازة جدا من حيث المبلغ المدفوع مقابل الامكانيات التي تحصل عليها (بغض النظر عن ان اسعار جميع السيارات في مصر مبالغ فيها اصلا و بغض النظر عن ان المفروض لوجان تتباع اقل من كدة بكتير بافتراض ان مفيش عليها جمارك)

أولا: الموتور
انطباعي الشخصي ان صوته مش عالي خالص زي ما قريت قبل كدة

ثانيا: العفشة
العفشة ناعمة جدااااااااااااااااا مقارنة بالعربياات الي ركبتها قبل كدة كتاكسي مثلا (فيرنا - اسبيرانزا - لادا - لانوس) او كعربيات تانية سوقتها (أوبل فيكترا B 1997)

ثالثا: التابلوة و الصالون
الخامات جيدة جدا سواء خامات التابلوة او الفرش

رابعا: امكانيات لم اكن اعلم بوجودها قبل شراء السيارة
1- ايموبيليزر
طبعا انا كنت مرعوب اني اركن العربية في الجراج او تحت البيت لانها من غير نمر و ممكن اي حد يطمع يسرقها
الحمد لله عرفت من التوكيل ثم الكاتالوج ان فيها نظام ايموبيليزر و ده معناه ان الموتور لا يمكن يدور من غير المفتاح الاصلي لان المفتاح مشفر

2- مراية الصالون فيها تعتيم
بالصدفة غيرت وضعية مراية الصالون و لقيت انها معتمة و الحمد لله
و دي ريحتني من كم ميكروباص غبي كانوا رافعين العالي في وشي علي الرغم من ان العربية باين جدا انها لسة خارجة من التوكيل و ان طبيعي الي سايقها لسة مش متعود عليها و ممكن يرتكب اخطاء كتير و هو سايق

خامسا: ملاحظات اثناء القيادة
1- الدواسات كلها خفيفة جدا
- يعني لازم تدوس بالشعرة علي البنزين لان اي زيادة هتلاقي العربية بتجري او ال RPM علي معاك جدا

- الدبرياج لازم تدوس عليه للاخر

- الفرامل كنت بسمع صوت زي خبطة او رزعة لما ادوس عليها و مش عارف اذا كان ده مشكلة او عيب و لا ده طبيعي
بس الفرامل بتكلبش العربية في مكانها