مصر موتورز مجتمع السيارات - تقرير عن صيانة عفشة أكسنت موديل 2006

ربنا كرمني الحمد لله و رحت يوم الجمعة اللي فاتت عملت صيانة لعفشة عربيتي الأكسنت موديل 2006 (الشكل القديم) :fun_36_3_9[1]: .. أنا باتعامل مع مركز صيانة جنب بيتي في حلمية الزيتون عنده صناعية شطار و عنده كمان ضبط الزوايا و الترصيص.. المهم أنا غيرت بعض أجزاء العفشة بقطع جديدة كالتالي:

- طقم مساعدين ألماني, و كان فيه الكوري و الصيني و الياباني.. طبعاً الصيني تعبان جداً و للأسف الكوري مش أحسن منه بمراحل يعني :125935~148:.. الياباني اللي هو KYB ممتاز و ناعم بس مابيديش الثبات المطلوب في السرعات العالية و خصوصاً إن العربية خفيفة على الرغم من إن فيها جنط حلو يعني ممكن يكون مناسب لعربيات تانية وعمره الإفتراضي أقل من الألماني و أغلى منه كمان :1336:... أما الألماني فناشف حبتين بس مش لدرجة مزعجة لكن مخلي العربية لازقة في الأرض و عمره الإفتراضي كبير.. و سعر الطقم 800 جنيه (400 أمامي و زيهم خلفي)

- جوز مقصات كوري أصلي.. سعرهم 370 جنيه

- تيل أمامي بـ 65 جنيه

- صباعين ميزان بـ 100 جنيه

- بارات طرف الدريكسيون بـ 130 جنيه

- مصنعية (شاملة ضبط الزوايا و تشحيم العفشة و مسح الطنابير) 280 جنيه

و الحمد لله بعد ما إستلمت العربية حسيت بفرق كبير مع ملاحظة إن القطع اللي غيرتها ماكنتش باظت تماماً بس أنا دايماً مابحبش أستنى لما العربية تعيط علشان أعملها صيانة.. لو حد عنده سؤال في حدود معلوماتي أنا تحت أمره و يا رب يكون التقرير مفيد لملاك الأكسنت :0369B3~177: