|
استفسار لمالكى الاكسيل ؟
انا بفكر اشترى اكسيل علشان سعرها مناسب وشنطتها واسعة وناعمة وقطع غيارها وتصليحها مش مكلف على ما انا فهمت من الاخوة بالمنتدى ولكن فيه موضوع قالقنى قوى هو التشريخ اللى بيحصل فيها ومعلش انا مش فاهم هو ده عيب فيها ولازم يحصل ؟ وهل ديه مشكلة كبيرة يعنى وممكن تعمل صداع للواحد من العربية ؟
وفى حالة انى مش حقدر اشترى الاكسيل ايهما افضل اللانوس الكورى أم الاكسنت ؟ وايه الزيادة فيهم عن الاكسيل ؟ وايه حال ثبات العربية بالنسبة للموديلات الثلاثة ؟ ومعلش تقلت عليكوا بس انا معنديش خبرة خالص فى العربيات وديه حتكون اول عربية اشتريها |
رد: استفسار لمالكى الاكسيل ؟
اقتباس:
بص حضرتك اولا الانوس افضل من الاكسيل والاكسنت بمراحل من حيث اسعار قطع الغيار وتوافرها ارخص من من اى عربيه اخرى حتى الفيرنا اللانوس قطع غيارها ارخص منها و الوسع و الاعتمادية وقلة الاعطال وان كان الثلاثة يعتبروا متقاربين فى قلة الاعطال بس اللانوس افضل و الرفاهية فى اللانوس اعلى من حيث النعومة فى القياده والهدوء و تكيف قوى و زجاج كهرباء للاربع ابواب وان كان فى الثلاثة موديلات زجاج كهربا على حسب الاوبشن اما بالنسبه للاكسنت فسيارة كويسه ولكن يعبها ان بسعرها ممكن تشترى لانوس موديل 99 الى 2002 اما بالنسبه للاكسيل فسيارة نقدر نقول للوسط بحيث ان اسعارها تبداء من 25 الف للهاتش باك الى حوالى 33 الف للسيدان فول اوبشن حالة نضيفه والاكسيل سيارة حلوه جدا من خلال تجربتى لها اسعار قطع غيارها رخيصه ومتوفرة ولكن هناك بعض العيوب 1: ان تكيفها للاسف مشاكله كتير ومش قوى زى تكيف اللانوس مثلا ويفضل لو عاوز فيها تكيف حلو ترمى تكيفها وتركب تكيف جديد ساندن هيبقى كويس جدا معاها وهيديك اداء ممتاز 2:مشكلة التشريخ ديه للاسف موجوده فى مكان واحد بس فى العربيه من نحية المساعد الامامى اللى امام الراكب الامامى وعموما طول ما حضرتك محافظ على المساعدين والسوست تعمل بكفائة ومرونة يبقى خلاص مش هيشرخ ان شاء الله بس لو طنشت للمساعدين يبقى اعرف انه هيشرخ منك فى اقرب وقت بس برضوا زى ما بنقول هو شرخ واحد مش مثلا زى ال 128 مفيهاش مكان مبيشرخش ههههههههههههههههه وعموما انا انصحك بالاتى اللانوس ثم اللانوس ثم اللانوس ثم الاكسنت ثم الاكسيل وربنا يوفقك ان شاء الله |
رد: استفسار لمالكى الاكسيل ؟
اقتباس:
معاك ان اللانوس اوسع واعتماديه اكبر لكن قطع غيار الفيرنا والاكسنت ارخص اسعار لقطع الغيار فى مصر وبيشتغل فيهم بليه مش الميكانيكى عكس اللانوس مش اى حد بيشتغل فيها سعر اعاده البيع فى الهيونداى افضل بكثير وممكن تكسب فى العربيه كمان اقل شغل ممكن تعمله فى الهيونداى بيبان عليه عكس الانوس والله العظيم بقول بمنتهى الحياديه وليس دفاعا عن الفيرنا لانى سايقها ولكن طبعا اللانوس تتميز فى الوسع والعلو عن الارض وممكن يكون عزلها افضل شوى |
رد: استفسار لمالكى الاكسيل ؟
هو على فكره انا احترم راى حضرتك جداااااا ولكن انا عموما لا عندى فيرنا ولا لانوس ولكن فعلا لقيت ان اللانوس هى ارخص عربيه فى مصر حتى من اسعار قطع غيار الفيرنا نفسهم وده يرجع لكذا سبب 1:ان العربيه ديه موجوده فى العالم من اكثر من 13 سنه 2:موجوده فى جميع انحاء العالم بكثرة ولذلك تلاقى كل حاجتها استيراد بسهولة فائقه 3:لها انتشار واسع فى مصر ولمده اكبر بكتير من الفيرنا والاكسنت مجتمعين 4:الفيرنا اضيق و اوطى و الماتور نشط بس على السرعات الاولى فقط ولكن اللانوس اوسع و اعلى سنه من الفيرنا و والماتور على السرعات المتوسطه بيطلع عزمه الكامل وده اللمطلوب لانى مش هسوق طول عمرى على سرعات اولى فقط 5:لو قارنا عمر ماتور اللانوس بعمر ماتور الفيرنا اللانوس تكسب بمراحل اللانوس من الزيرو لو مهتم بالماتور كويس ممكن يوصل معاك ل 400 الف كلم ويمكن اكثر كمان لو بالمحافظة عليه بخلاف الفيرنا الماتور بتاعها عصبى جداااا وللاسف عمره مش كبير زى اللانوس حتى لو بالمحافظة عليه صعب تشوف فيرنا جايبه 300 الف والماتور مبيخرجش عادم ابيض نتيجه للتفويت بتاع الماتور وفعلا لو بصيت فى الشوارع من الصعب جدا تلاقى لانوس بطلع عادم ابيض علشان ماتورها مفوت بخلاف الفيرنا والاكسنت شوفت منهم كتير مواتيرهم خفيفة 6:اللانوس الاهداء والانعم عموما ما بين الاكسنت والفيرنا لان الاكسنت والفيرنا زى ما قولنا محركاتهم عصبيه جداااااااا واصواتهم اعلى من اللانوس اللانوس فعلا متسمعش صوت طول ما انت جوه ومعدتش ال 120 بس بعد ال 120 بتلاقى قوة فائقة طلعت من ماتور اللانوس بتخليك تتشد لغاية سرعة 180 او 200 كمان لو حبيت الفيرنا قوتها لغاية ال 120 وعندها بتلاقى صوت الماتور بقا فظييييع وعاللى جداااااااااااا وخلاص بيجاهد علشان يطلع فوق ال 120 لو بصيت من نحية البيع فانا شايف اللى معاه فلوس الاكسنت يشترى لانوس افضل بفلوس الاكسنت كفاية ان الاكسنت اتوقف انتاجها خلاص غير اللانوس انتاجها الى هذه اللحظه مازال سارى وحتى لو المقارنة ما بين لانوس وفيرنا زيرو او مستعمل فلو الحالة العامه متشابهه فانصح باللنوس لكل الاسباب اللى ذكرتها فوق وبالنسبه لسعر اعادة البيع فعموما اغلب الكورى يتميز باعاده بيع سريعه ويعتبروا كلهم متساويين فى هذه النقطه بس بخلاف ان اللانوس والفيرنا يعتبروا اكثر اتنين عليهم طلب من اى نوع اخر وفى الاخر انا احترم وجهة نظر حضرتك طبعا وعموما لولا اختلاف الازواق لبارت السلع |
رد: استفسار لمالكى الاكسيل ؟
اقتباس:
ماشاء الله حضرتك تتميز فعلا باسلوب كويس وقدره على الاقناع وانا مش قدك على صفحات المنتديات عموما أحب اقول لحضرتك انا عربيتى فيرنا موديل 2010 عامله حوالى 150 الف حاليا ومفيش اى مشاكل نهائيا فى الماتور بتاعها وعلى فكره هى اجره ومعايا من ع الزيرو بقولك ليه اجره ؟ عشان تعرف ان مشيها كله جوا البلد يعنى مطبات وزحمه واشارات وده طبعا زى ماحضرتك عارف بيهين المكنه ويخليها مكنه شقيانه ثانيا : اى عربيه انتشرت فى الاجره فاعرف انها ممتازه فى الملاكى والنهارده لما تيجى حضرتك تركب تاكسى مع كل خمس تاكسيات فيرنا ممكن تركب عليهم تاكسى لانوس بالرغم من ان حضرتك بتقولى ان اللانوس بقالها 13 سنه فى السوق وعمرها اطول من الفيرنا والاكسنت ايه اللى جعل الاكسنت والفيرنا ينتشروا الانتشار الغريب ده ؟ برغم العيوب الضيق والانخفاض الاجابه بالطبع : قطع الغيار الارخص وسعر اعاده البيع الاعلى وسهوله التعامل فيها زى ال27 او 28 عكس اللانوس وعلى فكره انا مش بدافع عن الهيونداى لان راكب هيونداى لان فى ناس تسأله على العربيه اللى راكبها يقولك فيها قصيده شعر لنزار قبانى ويحلفلك بشرف العربيه انا عن نفسى الفيرنا مش اختى ولا الهيونداى ابويا ولا أنا كورى الموضوع كله لايعدو الا ان يكون وجهه نظرى الشخصيه فقط التى بالطبع ليس بالضروره ان تكون صحيحه المناقشه مفتوحه |
رد: استفسار لمالكى الاكسيل ؟
اقتباس:
هو يمكن اغلب ما قلته حضرتك صحيح بس برضوا تعال شوف اللانوس شغالة من 13 عام لا تشتكى حضرتك شوف العربيات اللانوس موديل 99 واركبها كانك راكب عربيه خارجه من المعرض طبعا لو صاحبها مهتم بيها غير كده حضرتك لسه عامل 150 الف يعنى لسه قدامك 150 الف كمان واتحدى ان ماتورك يكمل بعدهم الا كيلو مترات قليله جدا ده لو كملهم تعالى شوف موتور اللانوس اللى هو كان عباره عن موتور الاوبل فيكترا موديل 95 ممكن تلاقى عربيه موديل 99 موتورها عامل 400 الف وديه شوفتها بنفسى والى الان شغال بلا اى مشاكل ولا نقطه بخره زيت واعتقد انه هيوصل لل 500 الف كمان وده رقم قياسى فعلا بمعنى الكلمه الفرينا والاكسنت الناس بتحبهم علشان شكلهم متجدد وللاسف الناس وخده فكره غلط ان الفيرنا سريعه بس للاسف الناس عندها الفهم الخاطىء ده علشان موتور الفيرنا زى ما قولت نشط جدا على السرعات الاولى وفعلا بعد ال 120 بيجاهد علشان يطلع فوق كدا ولو طلع فوق ال 120 بيوجهك مشكلة الثبات الضائع وبتبقى محتاج كل تركيزك فى السواقه وده عن تجربه غير كدا تعالى شوف مشكلة سخونة الفيرنا مع التكيف وديه للاسف مشكلة شائعه وواجهتنى كتير ولم يعرف لها عن سبب لانى بقعد فتره كبيرة مع كهربائى سيارات صديق لى ليعلمنى بعض الاشياء فزى ما بقول لحضرتك فكره ان الفيرنا بتبيع كتير فبرضوا اللانوس باعت ومازالت بتبيع كتير جدا جدا اما بالنسبه 4 عربيات فيرنا مقابل عربه واحده لانوس فاعتقد حضرتك مخطىء تماما فى هذه المقولة حضرتك شوف اللانوس خلاص بقيت النيو 128 فى مصر بجدارة غير كده حضرتك شوف قطع الغيار للانوس هتلاقيها عند اى حد والفرنا كذلك ولكن الارخص فى صالح الفيرنا وعن تجربه شوف حوادث الفيرنا واللانوس هتلاقى الفيرنا واخده المرتبه الاولى بسبب ثبتها الاكثر من سىء وعموما لو الفيرنا شقيت خمس سنين فقط وهو عمرها القصير فاللانوس شقيت اكثر من 13 عام فى قارات العالم الست حتى لو لم تكن اللانوس نفسها فيكفى ان محركها يدفع الملايين من السيارات فى العالم كاوبل فيكترا و استرا و لانوس والكثير من السيارات الاخرى التابعه لشركة جنرال موتورز وفى النهاية انا احترم المناقشات جدا واحترام الراى الاخر وتحياتى لحضرتك |
رد: استفسار لمالكى الاكسيل ؟
بص حضرتك تاريخ اللانوس على موقع ويكبيديا http://en.wikipedia.org/wiki/Daewoo_Lanos العربيه انتاجها من عام 1997 يعنى بقالها 16 سنه شوف انواع المحركات اللى نزلت فيهم وشوف عدد القارات اللى نزلت فيهم نزلت فى قارات العالم السته وماتورها كان فى الظروف المناخيه المختلفه للقارات الست والسياره نفسها قدمت افضل اداء بالقارات السته فى العالم لانوس صنعت تاريخ |
| الساعة الآن 09:38 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017