سؤال فى المساعدين وحاجه غريبه فى العفشه
 

السلام عليكم ازيكم احبائى وكل سنه وانتم طيبين
عربيتى 128 المساعد الامامى يمين جايب زيت وضارب ودى تانى او ثالث مره اغيره فى فتره قريبه خالص يمكن فى واحد فيهم مكملش اسبوعين بجيبهم استعمال خارج هل الافضل اجيب جديد ولا استيراد ولو جديد الانواع ايه وتنصحونى بإيه وبالذات ان عرفت لو هجيب جديد لازم اثنين وانا المساعد الشمال كويس جدا ومن يوم مجبت العربيه زي الفل بقاله 4 سنين

اما الحاجه الغريبه بقى اللى مش قادر احدد سببها وبتاع العفشه اشتغل يوم كامل فى الاسكترا وبرده متحلتش لما ابقى ماشى بالعربيه وفاتح فى السرعه على الطريق مجرد العجله اليمين تدوس على عضعضه فى الطريق العربيه تروح حدفه يمين على الاخر وترجرج فى الدركسيون زي ميكون العجله سايبه بتبان مع السرعه ومطبات فى الطريق ناحية العجله ولما تشوف الفرده وتحاول تمسكها يمين وشمال تلاقيها ثابته وكويسه ومفيش فيها اى بوش بقالها فتره كدا وبتاع العفشه مخلهاش وكانت هتسبب فى نزولى الترعه
مستنى رأيكم

رد: سؤال فى المساعدين وحاجه غريبه فى العفشه
 

فى الغالب كده ان الحدفه اللى بتحصل عندك فى الناحية اليمين سببها المساعد بردو لأنه ضارب وجايب زيت .. حاول تظبط المساعدين وياريت لو تجيب 2 جداد أفضل ..

رد: سؤال فى المساعدين وحاجه غريبه فى العفشه
 

أول قاعدة في إصلاح عفشة السيارات
أي جزء في العربية له يمين وشمال لازم يتغيرو مع بعض

يعني لو مساعد يمين باظ لازم تغير الشمال هو كمان، ولو رولمان بلي شمال عايز يتغير لازم تغير اليمين معاه، والكلام ده ينطبق على الكاوتش والكبالن والمقصات وجميع أجزاء العفشة، عشان العربية يتبقى موزونة وقطع الغيار الجديدة تعمر معاك

نيجي بقى لمشكلة العجلة اليمين، أنا متهيألي العربية أخدت مطب جامد قوي أو خبطة في الجنب اليمين، وده هيخليك تكشف على العفشة كلها... يعني مقصات وبيضات وكبالن، وما تنساش البطاحات كمان، وأي حاجة بايظة لازم تتغير يمين وشمال.

ماعتقدش الاسكترا هي المشكلة... الاسكترا لو بايظة هتعمل مشاكل في العجلتين... مش عجلة واحدة


بس هو انت متأكد إن علب الشاسيه ما فيهاش مشاكل؟؟؟



...

رد: سؤال فى المساعدين وحاجه غريبه فى العفشه
 

انت هتحتاج فعلا تكشف على العفشة كلها
وواضح ان الشاسيه فيه مشكلة لأن الأسكترا سليمة
هتجيب جوز مساعدين لأن تغيير واحد فقط غير مجدى
وسبب مشاكل شاسية ال128 بيبقى بسبب العفشة

رد: سؤال فى المساعدين وحاجه غريبه فى العفشه
 

اعتقد ان مشكلتك مش فى العفشة وانما فى الصاج
وتحديدا فى مكان ربط المقص بالشاسية اتوقع انة دايب او فى شرخ ..........كمان الركبة اليمين عيد عليها لحام او غيرها دى بـ 20 جنية
كمان اكشف على عجلة السورة اليمين

رد: سؤال فى المساعدين وحاجه غريبه فى العفشه
 

اولا شكرا ليكوا كلكوا على الردود والقرار اللى خدته بناء على ردودكم ورأيكم انى هجيب اثنين مساعدين امامى واعين السليم الشمال ولكن ممكن تدونى تفاصيل عن انواع المساعدين وايه الافضل اجيبهم نوعهم ايه بالذات انى بحب لما اعمل حاجه انساها ومغيرهاش تانى لانى مش فاضى معلش هتعبكوا معايا

اما بالنسبه للحدفه اللى بتحصل انا بصيت ودورت على اى شروخ ناحية البطاحات او فى الحوض ملقتش بس ممكن يكون موجود فى الجزء بتاع تثبيت المقصات زى مقال الاخ mr_astra او فى حته مش شايفه وبالتالى اخلى بتاع العفشه يحل كله ويبص عليها كويس
بس ارجوكوا نوع المساعدين اللى يريحنى واجيبه وانساه

رد: سؤال فى المساعدين وحاجه غريبه فى العفشه
 

الشروخات بتبقى فى السدر ومن تحت
او مشاكل فى القنطرة
السمكرى او حداد العفشة هو اللى بيعرف يطلعها

هات جوز مساعدين صينى اصلى

انا جيب جوز للبولونيز من فترة طويله لاتتخيلها

وبإذن الله هشترى جوز خلفى لعربيتى ال131 ب 170 جنيه سألت عليهم امبارح
علشان عندى المساعدين الخلفى منتهيين
ركبهم ياخدوا وقتهم العمليه مش ناقصة مصاريف زيادة بدل ماهتسمع ارقام اعلى فى الحجات التانية ، وكلها صينى مضروب ، ادفع فى الصينى الأصلى وابعد عن المضروب
عن تجربة
تقبل تحياتى