|
مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
السلام عليكم ورحمة الله وبركاته بصراحه فكره الموضوع ده فى بالى من فتره كبيرة جدااا وبصراحه انا متشوق جدااا اسمع حكايات كل واحد عن الايام ديه ساعت البلطجيه واللى يقولك الحححق دووول جيين من هنا واللى يقولك لا الحق دول جايين من هنا و الجوامع تنادى يا جماعه خلى بالكم من عربيات الشرطه و الاسعاف و الكهربا والناس اللى مكنتش بتروح الشغل وقعدين طول اليوم فى الشارع بيحموا البيوت واللجان الشعبية فياريت كل واحد يقول قصته كانت مفرحه او محزنه لان فعلا هيبقى فيه حاجات طالعه من الايام ديه تحفه بجد ابداء انا بقصتى الاول انا زى ما انتوا عارفين او اللى ميعرفش يعرف ليا بيتين ولله الحمد واحد فى المعادى بقضى فيه فترات الدراسه فقط وواحد فى دار السلام بقضى فيه فترات الاجازة المدرسية وطول عمرنا على الحال ده طول عمرنا والفرق بين المعادى ودار السلام زى بالظبط الفرق ما بين مصر الجديده و الدرب الاحمر مع تحياتى للجميع طبعا بس انا بوضح علشان اللى ميعرفش دار السلام انا هبداء الحكاية معاكوا من اول شرارة للثورة كان يوم الثلاثاء 25يناير 2011 فى حوالى الساعه الواحده ظهرا قاعد فى شقة المعادى علشان كان يوم الخميس بعد بكره ساعتها هنروح على شقة دار السلام علشان نقضى الاجازة بتاعت نصف العام هناك قاعد فى اوضتى وقدامى الكمبيوتر و جنب الكمبيوتر التلفزيون علشان وانا قاعد على الكمبيوتر اتابع التلفزيون للاخبار وكدا ومره واحده لقيت الاخبار جاية http://www.youtube.com/watch?v=nKMpP...eature=related http://www.youtube.com/watch?v=c7CEG...eature=related http://www.youtube.com/watch?v=qvXag...eature=related وفيه ناس على ممثلين نازله وكان منهم عمرو واكد وحمدى قنديل وغيرهم وبيطوفوا فى الشوارع كانوا بيهتفوا (يا اهالينا انضموا لينا) و(عيش حرية عدالة اجتماعية ) وكانوا دوول اول شعارين قامت عليهم الثورة وبصراحه لخصت يعتبر كل ما يريده الشعب فى ثلاث كلمات بس و ساعتها محدش منا نزل من البيت مع اننا اصلا بعيد عن الاحداث ديه وسمعنا ان الامن المركزى نزل الشارع بكثرة و ان الايام الجاية ممكن يحصل حاجه وعدا يوم الثلاثاء وجه يوم الاربعاء يوم 26 يناير 2011 كان يوم عادى جداااا بالنسبه ليا ومكنش فيه اى اخبار غير فى الجرانين فقط ساعتها عن اللى حصل امبارح خصوصا جرانين المعارضه طبعا بس التلفزيون يوم الاربع على حسب مشاهدتى له مكنش فيه حاجات كتير عن اللى حصل يوم الثلاثاء غير فى القنوات الاخبارية طبعا وكنت جالس على الكمبيوتر الساعه الثامنه مساء فى اليوم ده على الكمبيوتر ومره واحده جالى تليفون تررن ترررن انا: الو سلامو عليكوا اللى متصل : ايوه وعليكم السلام سيد معايا انا : ايوه مين معايا اللى متصل: انا فلان الفلانى صاحب فلان اللى كنت جمعت كمبيوتر ليه قبل كدا وعاوزك تجمعلى كمبيوتر انا : هو اوك بس فيه مشكلتين اللى متصل : ايه هما انا : الاولى انى مش هقدر اجيبلك جهاز لو انت عاوزوا كامل اقل من 2000 جنية لان ده اقل سعر كمبيوتر نضيف جدااا فى وقتها ومازال الى الان مع ثبات السعر و طبعا التكنولوجيا بقت اعلى من ساعتاه والمشكلة التانية انى والدتى مش هترضى تنزلنى من البيت اصلا علشان اللى انت شايفه ده واللى حاصل تحت واحنا اصلا هننزل نشترى الجهاز من التحرير فاجل الموضوع لبعدين اللى متصل : مش هينفع لازم النهارده وكدا طيب هاجى اخدك بالعربيه من باب بيتك واوصلك تانى لباب بيتك انا : صدقنى مش هينفع محدش هيرضى ينزلنى اصلا من باب البيت (ساعتها انا كلمت والدتى انا فيه كذا كذا وهنزل التحرير طبعا كان ردها طيب اياك انت تعملها وشوف ايه اللى هيحصل ) فقلتله بص مش هينفع فعلا والمشكله بصراحه ان الوالده ممانعه اللى متصل بيا : طيب خد مراتى تكلم والدتك وهنخليك تيجى معانا وبعد ما المدام بتاعته جزاها الله خير كلمت والدتى وبعد عناء والدتى وافقت بالعافية قالى خلاص انت ساكن فين قلتله فى كذا كذا قالى خلاص انا نصف ساعه وهكون عندك لانى هجيلك من حلوان انا : اوك وانا هلبس وهستناك وفعلا نصف ساعه وكان تحت البيت ونزلت معاه وروحنا التحرير واثناء ما بدائنا ندخل فى منطقة وسط البلد اذ بى فوجئت بكمية امن مركزى رهيبه بمعنى الكلمه وكله لابس خوذته و معاه عصايته والبتاع الازاز اللى بيحموا بيه نفسهوم بيه ومفيش مكان مش قاعدين فيه الجناين اللى فى الميادين تلاقى العساكر نايمين فيها على ارصفة الشوارع تلاقى بتوع الامن المركزى فرشين الرصيف كله وفعلا كان اول مره فى حياتى اشوف الكمية ديه من الامن المركزى وكاننا داخلين حرب بالظبط دخلنا ساعتها جراج المول اللى كنا عاوزين نشترى الجهاز منه واشترينا الجهاز و بعدين زى ما احنا خرجنا من المول بالعربيه تانى لنشاهد نفس كميات الامن المركزى وساعتها كان كل اللى شغالين فى المول عندهم رهبة وخوف فظيع من فقط فكره الخروج من المول حتى لو علشان يجيبوا اكل ليهم وكله كان بيقول هنمشى ازاى من هنا وساعتها المول كان راااااايق جدااا ومكنش فيه غيرنا المهم زى ما قولت خلصنا الشراء وروحنا على حلوان بالعربيه ركبت الجهاز و ظبط الويندوز والبرامج وكدا والراجل وصلنى تانى لغاية البيت وكانت الساعه حوالى الثانية صباحا و انا فى قمة التعب ونمت وصحيت تانى يوم اللى هو يوم الخميس 27 يناير وبالنسبه لي كان يوم غير عادى لاننا بنلم هدومنا ورايحين على دار السلام وروحنا دار السلام وجاء اليل وكانت حوالى الساعه التاسعه مساء وكان برنامج بتاع محمود سعد وساعتها قعد يقول على مظاهرات يوم الجمعه وكان معاه مجدى الجلاد و كان محمود سعد بيقول ان الناس تعبت من اللى بتشوفوا ولازم ده يحصل ومجدى الجلاد كان بيقول ان فيه ناس بتعد نفسها للسفر الان وقد تكون فعلا سفرت خلاص وانا مش هسيب مصر ابدا مهما حصل وطبعا ساعتها يوما لخميس ده كنا مرتبين نفسنا اننا بكره الجمعه يوم 28 يناير نروح مدافن الامام لنزور اقاربنا الله يرحمهم وبعدين ندخل سوق الامام ونركب ونرجع البيت تانى يتبع ......... ياريت الكل يقول على ايام الثورة معاه الموضوع ده هيبقى زى ارشيف لايام الثورة فى ايامها الاولى سيد عصام |
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
انا كان بالنسبالى يوم 25 يناير كاى يوم معتاد و عدى لغاية جمعة الغضب و فتح السجون كونت مكلبش فى البيت بمعنى الكلمه من كترة البلطجه لدرجة ان اللى بينزل يصلى لازم ياخدوا منك الشبشب وصلنا لدرجة مش عارفين ننزل نجيب كيلو طمام الدبابات كانت فى الشارع وكل شويه اسمع صوت رشاشات و الدبابات شغاله دوريات كانى على الحدود مع اسرائيل انا مشاركتش فى المظاهرات غير فى الاخر خالص بس برده مكنش فيه اى امن فى البلد لغاية لما قطعوا الموبايل و النت و كان يوم ساعتها كونت بقضى يومى على التلفزيون و كل شوية يقولك بيان هام من رئاسة الجمهوريه افضل ملطوع بالساعات لغاية لما يتعلن ******************* من كثرة الانفلات الامنى وصل ان سكان البرج نزلوا بالشوم و السواطير وقاعدين تحت و ياما اضرب عليهم نار انا منزلتش غير مره واحده و انا وصلت لمرحله انى ركبت باب حديد على باب الشقه عندى وتربست الباب الحديد و تربست باب الشقه بكل ما تتخير و كل شويه اسمع اصوتا حاجات بتكسر اعرف ان فيه بلطجيه جايه و جبت كرسى و فضلت قاعد ماسك المسدس و السكاكين طول الليل و النهار ملطوع عند الباب حتى الاكل بتاعى و انا على الكرسى برده يدوب انا اخلص الدوريه بتاعتى و يجى واحد يستلم مكانى و انا اروح على التلفزيون عدل كانت ايام رعب بجد ده انا خوفت اطلع البلكونه الاقى رصاصه فيه عدل |
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
بالنسبة لى قبل الثورة ماكنتش متابع اى برامج حوارية وانا بطبيعتى ماليش فى السياسة وطبيعة شغلى كانت بتخلينى معظم اليوم برة المهم مما سبق انا ماكانش عندى خبر بموضوع المظاهرات ده وبعد يوم التلات 25 بدات اسمع ان فى قلق فى القاهرة وانا اساسا من الاسكندرية المهم يوم الجمعة(جمعة الغضب) رحت الشغل عادى جدا ماكنتش اعرف ان فى جمعة الغضب اساسا وبطبيعة شغلى برضه كنت بروح فرع دمنهور للشركة التى اعمل بها يوم الجمعة لمتابعة سير العمل هناك المهم اخدت عربية الشركة(شاهين) وميكانيكى وكهربائى وسافرنا على دمنهور وصلنا قبل صلاة الجمعة صلينا وبدانا شغل وخلصنا حوالى الساعة 3 عصرا وبدانا رحلة العودة الى الاسكندرية (على فكرة ماكنش فى اى شئ فى دمنهور ) ولا كنا حاسين بالدنيا لان العربية مافيهاش راديو وماحدش خد باله ان خطوط الموبايل مش شغالة المهم بعد دمنهور بحوالى 20 كيلو لقيت العربيات الناحية التانية عمالة تقلب نور قت اكيد فى رادار وهديت السرعة وفضلت ماشى مهدى اكتر من ربع ساعة وانا عمال ادور على الرادار ومش لاقيه وفجاة لقيت كمية كبيرة من العربيات ماشية عكس وجايين فى وشى المهم وقفت وبسالهم فى ايه قالولى ان فى كفر الدوار المتظاهرين قافلين السكة وماحدش بيعدى ومن هنا بدات الماساة وقررنا التوجه الى المنصورة واتخاذ الطريق الدولى الى الاسكندرية ومجرد ماوصلنا المنصورة كان الجيش نزل وقفل مداخل المدينة فرجعنا تانى على الزراعى وقلت للى معايا انا هبات فى فرع دمنهور لحد الصبح وصلنا دمنهور وصليت المغرب والعشاء وبعد الصلاة فوجئت بان الفنيين اللى معايا قالولى احنا مش هنبات قلت لهم طب هنعمل ايه مانتم شايفين مش هنعرف نوصل اسكندرية قالولى لازم نروح . المهم طاوعتهم وبدانا الرحلة مرة اخرى الى الاسكندرية زراعى كان الطريق بدا يفضى ولكن بمجرد وصولنا كفر الدوار لقيت كمية من الشباب والصبية مولعين فى كاوتش وعربيات بوليس محروقة وماسكين سنج وشوم وسيوف وبيوقفوا كل عربية يبصو على الركاب فيها كل ده واحنا مذهولين مما يحدث ومش عارفين ايه اللى بيحصل وعدينا كفر الدوار بسلام ووصلنا الى اسكندرية وبمجرد اقترابنا من كوبرى التاريخ لقيت شوية اطفال بيوقفو العربيات وبيقولو ماحدش يعدى من هنا فى ضرب نار حى قدام ناحية مينا البصل انا ساعتها كل اللى شاغلنى انى اوصل العربية لحد الشركة وبعدها اللى يحصل يحصل لانها مش عربيتى ودخلت على المينا من ناحية باب 22 الىمقر الشركة والحمد لله واليوم ده ماعرفتش اروح ونمت فى الشركة والحمد لله ان التليفون الارضى كان شغال وطمنتهم فى البيت الساعة 2 ليلا وروحت يوم السبت الساعة 10 ص.
|
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
ايه المواضيع الجامدة دى ياسيسو الله أكبر عليك انا متابع معاك وهاكتب لما تخلص ان شاء الله |
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
كانت الساعه الواحده صباحا فى يوم 28 يناير على الكمبيوتر بلعب لعبة اونلاين ومره واحده لقيت النت فصل وافتكرت ان النت فصل عادى يعنى زى ما بيفصل ودقيقة وجاى ولكن المده طالت ودخلت فى ساعه ومره واحده افتكرت ان بكره بيقولوا ان فيه مظاهرات وجه فى بالى ان ممكن الحكومه هى اللى عامله كدا بس كنت مستبعد انهم يعملوا كدا وبعد ما الشك بداء يلعب جوايا اتصلت بكذا واحد صحبى من اللى بيلعبوا اللعبة ديه معايا وكلهم اكدوا ليا ان النت قطع عندهم هما كمان وساعتها اتاكدت ان الانترنت الحكومه قطعته عن مصر جه يوم الجمعه 28 يناير وفى اليوم ده محدش كان متوقع ان اليوم ده يعتبر فاصل مابين كل اللى فات وبين كل اللى جاى وان لازم كل اللى ظالم نهايته فى اليوم ده صحيت الصبح متعكنن من حكاية النت اللى قاطع علينا ونزلنا انا وخالى وخالى التانى وجدتى ووالدتى ورايحين على المدافن بتاعت العيلة (اللهم اغفر للمسلمين والمسلمات والمؤمنين والمؤمنات الاحياء منهم والاموات ) نسلم عليهم واشترينا الجورنان وروحنا هناك والغفير بتاع المدافن جاب كراسى نقعد عليها واحنا قاعدين كنا بنتكلم على اللى هيحصل النهارده وان النهارده هيبقى يوم هيتحبس فيه ناس كتير و كان خالى بيقرا الجورنا بتاع الاهرام لقا موجود فيه خبر ان السيد الرئيس هيحضر معرض الكتاب غدا وكدا وساعتها علق على الموضوع كالاتى كان مبارك يكلم حبيب العادلى ( ايه يا حبيب الدوشه اللى سمعها ديه واالكلام الفارغ ده حبيب يرد عليه متقلقش ياريس كله هيخلص النهارده وبكره هتروح معرض الكتاب وكله هيبقى تمام ) هههههه و بعدها خرجنا ومره واحده لقينا ان الشبكه البرتقالى قطعت بدون ذكر اسماء طبعا وانا ساعتها كان معايا شبكه حمرا وكان لسه فيها شبكه و روحنا وتسوقنا وبعدين لقينا ان كل خطوط الشبكه الخضراء وقفت ومبقاش فيه شبكه قلنا اووووبا ايه ده هو ايه اللى هيحصل النهارده و بعدين وعلى نهاية صلاة الظهر بالظبط كنا بنركب الميكروباص علشان نروح بيتنا وساعتها وجدنا ان الشبكه الحمرا هى كمان قطعت وكدا كل خطوط الموبيلل بقت قطعه نور ومايه خالص طبعا ساعتها كنا فاكرين ان اليوم ده هيبقى ضرب نار على بتوع المظاهرات وهتبقى نهايتهم النهارده المهم روحنا البيت مسرعين وطلعنا البيت وبقينا نشوف التلفزيون المصرى للاسف ساعتها وكان فيلم عربى اللى شغال وقتها وجبت الجزيرة الاقى البلد والعه http://www.youtube.com/watch?v=QDTpm5xcjMM ومظاهرات وعيش حرية عدالة اجتماعية و مدرعات الشرطه بتضرب خرطوش على المتظاهرين و المتظاهرين يضربوا طوب وكان الوضع غير مبشر بالمره بنجاح الثورة نهائيا وقتها وعلى الساعه 4 العصر كدا ومع بداية بداء غروب الشمس بداء التلفزيون المصرى يبث فى شريط الاخبار اللى تحت فى الشاشه ان على لسان لؤات فى الشرطه وكدا ان السيطرة تمت خلاص على المظاهرات وفى خلال ساعتين هيكون كل شىء منتهى طبعا كلنا قلنا ايه ده ده بعد كدا هيطلع عين الشعب ده فى كل حاجه وبعدين بداء التلفزيون يجيب الاخبار والمذيعين اللى بيطلعوا يقولوا النشره وجت الساعه خمسه ونصف تقريبا وحسنى مبارك اعلن عن نزول الجيش للشارع وبداء حظر التجوال بداية من الساعه السادسه وطبعا كلنا كنا فى البيت معدا خالى وكان بيعمل فى محل للحلويات فى شارع الهرم واحنا مش عارفين نتصل بيه ولا نعرف حاجه عنه وبيقنا مش عارفين نعمل ايه ساعتها على خالى ده مع العلم خالى ده راجل كبير عنده 30 سنه بس احنا كنا قاقانين عليه طبعا و بعدين جت الساعه 7 ولسه مجاش وبدائنا نعرف فى التلفزيون ان الشرطه انسحبت مع وجود حرائق كثيره حدثت لمقر الحزب الوطنى وللسيارات فى الشوارع و الاعلان عن حرائق قسم ورا قسم و جت الساعه الثامنه مساء والجيش كان بدائت اول دفعات ليه تنزل الشارع بس كان لسه مبقاش باعداد كبيره ومكنش فيه اى وجود لاى شرطى او عسكرى او اى احد بيلبس لبس ميرى نهائيا المهم وجدنا خالى هذا راجع عمال يعيط جامد جدا وعينه حمرا اوووى كنا فاكرينه بيعيط على حال البلد طلع القنابل المسيله للدموع هى اللى واجعه عينه وكان ساعتها اول ما اعلنوا عن حظر التجوال http://www.youtube.com/watch?v=KU6z7APdSek http://www.youtube.com/watch?v=jXezMG75u0w http://www.youtube.com/watch?v=Bn4v-lVGI-0 من الساعه 6 جه للفرع الى هو شغال فيه انهم يقفلوا ويمشوا باسرع وقت وفعلا بداء يقفل كل شىء ومشى فعلا الساعه 6 ونصف من الفرع من اخر شارع الهرم ناحية ميدان الرماية كدا وملقاش ولا مواصله واحده فاضطر ان يمشى كل هذه المسافه على قدمه من ميدان اخر شارع الهرم الى الملك الصالح و كان بيحكى ساعتها وبيقول كانت الساعه حوالى 7 وكان عند محل ادوات كهربائية كبير لا اتذكر اسمه الان فى شارع الهرم وجد ناس كتير الى خارج معاه تلفزيون واللى معاه كرسى واللى معاه كمبيوتر وريحة القنابل المسيله للدموع فى كل مكان تخلى اى حد يعيط كدا ويتخنق من ريحتها المهم فضل ماشى كل ده لغاية ما وصل الملك الصالح و ركب ميكروباص ساعتها سواق الميكروباص قال الاجرة 2 جنية والى مش عجبه ينزل (لقيت خالى بيقولى وواله لو كانت ب 20 جنية كنت هديهاله بس اروح ) هههههههه حسبى الله ونعم الوكيل فى الطمع واستغلال الظروف http://www.youtube.com/watch?v=2PbBEIfFc_0 http://www.youtube.com/watch?v=seMeLypHoqs المهم على الساعه 10 مساء كان الجيش بداء يبقى له تواجد فى الشارع مع وجود صرخات فى التلفزيون المصرى من ستات وبنات وكدا الحقونا البلطجيه طلعوا علينا والحقونا بيهجموا على القسم اللى قدام بيتنا و الشجر هيولع من الحريقه اللى قدام القسم وكدا والبلطجية بيهجموا على دارى و كارفور و ماكينات الصراف الالى (الفيزا او ATM) وكل محلات الاجهزة الكهربائية وبيهجموا على كبريهات شارع الهرم وولعوا فى كبارية الليل وفى نفس الوقت المتظاهرين قدروا يوصلوا للميدان من كذا ساعه وخلاص بقى مكانهم الميدان وبعدين اعلن حظر التجوال انه من ال 7 صباحا الى 2 ظهرا على ما اتذكر وعدى هذا اليوم الصعب جداااااااااااااااااا جدااااااااااااااااااااااا اااااا بصعوبه بالغه يتبع .................... |
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
بعد ما عدى يوم 28 بكل صعوبة زى ما حكيتلكم جه يوم 29 يناير والى كان اشد صعوبة من يوم 28 بالنسبه ليا وهنعرف بعدين ايه سبب صعوبته صحيت يوم 29 يناير الصبح بدر جدى على انقطاع التيار الكهربى فى الشارع كله فى دار السلام عندنا مع العلم ان التيار الكهربى كان موجود بس الكابل الارضى ضرب فبقى فولت الكهربا 360 فولت ولو جيت تولع لمبة نيون تلاقى الترانس بتاعها بيزمجر كدا بصوت عالى ولو ولعت لمبة 100 وات تلاقيها نورها ضهر بمعنى الكلمه وبالتالى مكناش قادرين نشغل اى تلاجه ولا تلفزيون ولا حتى كان فيه ماية لان فى دار السلام المايه شغالة بمواتير المياه وطبعا علشان النور كان عالى فبالتالى الماتور ما كناش بنشغله وبالتالى مكنش فيه مياه خالص المهم ديه كانت اول مشكله تانى مشكله كان لازم انزل اجيب جنازير وقفل وانسخ مفاتيح للبيت كله علشان نقفل الباب بالقفل ثالث مشكلة والاهم اننا كنا لازم نعمل استوك اكل لاننا كنا ساعتها منعرفش الازمه ديه هتستمر اد ايه وساعتها كان الجميع فى لخبطه فظيعه كله كان فاكر ان ديه النهاية وان خلاص كده كل حاجه راحت ومصر هتبقى زى العراق او اليمن ومفيش قانون ولا فيه بيع ولا شرا ولا اى حاجه وبصراحه مخبيش عليكم ساعتها كان اخر الشهر والقبض كان بيتم بالفيزا و طبعا مكنش فيه ولا مكنه صراف الى موجوده فى الشارع و كمان مكنش البنوك فاتحه وحتى الاستوك بتاع الاكل بتاع الشهر كان قارب على النفاذ لاننا فى اخر الشهر خلاص والمفروض بنجيب الاستوك بتاع الشهر فى كل اول شهر فالحالة كانت كحرته على الاخر والفلوس كانت على الاد بالظبط المهم نصحتهم يشتروا اكبر كمية ارز يقدروا عليها لان اول حاجه سعره رخيص وتانى حاجه كوز الرز واحد هيقدر يكفى وجبة غداء يوم كامل (كان لازم نسستم نفسنا على الوضع الجديد والا مكنش حد عارف ايه الجديد فى الامور ولا هيحصل ايه ) وبصراحه كلنا كان عندنا قناعه تامه بالحال الجديد ده وكان فى الثلاجه اخر ستوك لحوم سوسيس و كبده فقط وكانت وجبة الغداء عبارة عن طبق ارز ابيض بلدى بدون شعرية بدون اى اضافات مع قطعه واحده سوسيس فقط هههههههههههههه اه والله زى ما بقولكم كدا وفعلا الحمد لله بقى كل ما يبقى الوالده عامله لنا سوسيس و برجر وكدا و بيبقى الحله على ماليانه على اخرها والبرجر على اخره و فينوا كومبوا ومايونيز وكاتشب و طماطم كل ما اضحك على ايام ما كان الغداء عبارة عن طبق ارز و قطعه واحده سوسيس ههههههههههههههههههههههه المهم نزلنا ساعتها السوق نجيب خضروات وارز زى ما انتم عارفين وافاجاء بان واحده رايحه السوق فايد شايله شنطة السوق والايد التانية شايله خشبه ههههههههههههههههه وواحده رايحه السوق فايد شنطة السوق وفالايد التانية معاها شومة ههههههههههههههه انا بصراحه ساعتها كنت نازل مع الوالده وجدتى السوق ومعايا اليكتريك شوك وسكين ايوه سكين وكنت على اتم استعداد على قتل اى احد يفكر يعمل لنا اى شىء وبدم بارد جدااااااااااااااااااااااا ااااااااااااااااااااااااا اااااااااا فوق ما تتخيلوا اه والله شوفتوا كنت انا وصلت لدرجه اد ايه هههههههههههههههههههههه و طبعا عدم وجود حركة مواصلات الا قليل جدا جدااااااااااااا جداااااااا والقمامه بدائت تملاء الشوارع فى كل مكان المهم رجعنا البيت ونزلت تانى جبت جنازيرين من اضخم انواع جنازير موجوده وقفل وروحت لبتاع المفاتيح عملت لكل سكان البيت مفاتيح وبقا اللى يدخل يقفل بالمفتاح واللى يخرج يقفل بالمفتاح كل ده ومتنسوش ان النور لسه مقطوع زى ما هو ومفيش ماية ولا اى حاجه وبنتصل ببتوع الكهربا بيقولولنا احنا مش هنقدر نيجى لحد وسامحونا وكدا وبيت جدتى امام بيتنا اللى فى دار السلام اللى قاعدين فيه وقتها فطلعنا قعدنا عندها شوية وفضلنا قاعدين وساعتها مكنش فيه اى لجان شعبية فى الشوارع ساعتها المهم كنا عند جدتى ومره واحده فى حدود على ما اعتقد الساعه 6 او 7 مساء وسمعنا صوت بيصرخ فى الشارع ااااااااااااااااااااااااا ااه الحقواااااااااااااااااااا اااااااا كلواااااااااااااااا ينززززززززززززززززززززل الحقواااااااااااااااااااا اااا كله ينززززززززززززززززززززززز ززل انزلواااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااا ومفيش دقيقة ولقينا الشارع كله بقى رجالة على شباب وكله نازل بعصيان وسكاكين وكذالك ومطاوى وساعتها كان ناس اتفقت مع ناس شغالين فى شركة الكهربا انهم يجوا ويصلحوا كابل الارضى علشان الكهربا ساعتها ترجع تانى ل 220 فولت بدل ال 360 فولت وطبعا عرفت انها كانت 360 فولت لانى عندى افو ميتر وقست الفولت بتاع الكهربا وعرفت انه 360 فولت المهم ساعتها اليل بداء يضلم المكان والشارع كله ضلمه وبداء الناس يولعوا خشب وكدا بس الدخان كان سىء جدا ومحدش عارف يعمل ايه لغاية ما جت ليا فكره ان لو وصلنا الكهربا على التوالى الفولت يقل ويتقسم على 2 يعنى بدل ما هيبقى داخل 360 فولت على كل لمبة هيبقى داخل 180 فولت بس على كل لمبة وبكدا مفيش لمبات هتتحرق وفعلا رحت عامل الفكره ديه عندنا وبقى شقتنا هى الشقه الوحيده اللى منوره فى الشارع بعدين روحت عملتها عند جدتى و بعدين بدائت اقولها للناس علشان كله يعملها والحمد لله الكل بداء ينور تانى بس كان لازم لمبتين 100 وات وسلك ودوايتين وبقى الجوامع فى نفس الوقت يا جماعه خلى بالكم من عربيات الشرطه والاسعاف و الكهربا والمايه والناس يا عينى اللى كانوا جايين يصلحوا الكبل الله يكون فى عونهم ساعتها وبعدين لما الناس نزلت بقى كله اتفق انه هينزل الشارع وهيباتوا فى الشارع النهارده انا بقى كنت مجهز نبوتين فل كده واحده ليا وواحده للحاجه ومجهز سكاكين وكان اليوم ده رعب بمعنى الكلمه وكنت بتمنى من ربنا انه يعدى باى شكل من الاشكال وكان كل شوية الحقوا دول جايين من هنا والحقوا دوول جايين من هنا والناس تجرى والستات تصوت وجنب دار السلام عزبة اسمها عزبة خير الله والمقارنه بين دار السلام وعزبة خير الله زى ما تقارن ما بين مصر الجديده و الدرب الاحمر مع احترامى للجميع طبعا وكان كل شوية الحقوا بتوع العزبة هيهجموا عليكوا الحقوا بتوع العزبة هيهجموا عليكوا (اكتشفت مع مرور الايام ان نفس الامر كان بيحدث مع بتوع العزبة كانوا ناس بتصوت عندهم وبيقولوا الحقوا بتوع دار السلام هيهجموا عليكم ههههههههههههههه) واستمر الحال لغاية الساعه 2 صباحا والشارع على نفس حالة الكر والفر اللى على الفاضى لغاية ما جه بتوع الكهربا الساعه 2 صباحا ومع سؤالهم ليه اتاخروا كدا قالولنا الجوامع كانوا بحذروا الناس من بتوع الكهربا والشرطه والاسعاف فكانوا كل ما يدخلوا على لجنه شعبية توقفهم وتفتشهم 100 مره ههههههههههههههههههههههههه ههههههههههههههههههههههههه ههه المهم بقول يصلحوا الكهربا ونمت وقتها الساعه 3 صباحا والساعه الثالثه ونصف صبحا بعد نصف ساعه من الاحلام الكابوسيه اجد من يخبط على الباب بشده وبهبد وبرزع وانا قومت مره واحده وروحت ماسك السكينة والاليكتريك شوك وانا بقول مين مين لقيت بيقولى انا انا قولت انت مين يقولى اسلام ورحت فاتح الباب وابويا ورايا بالنبوت و انا ماسك السكينه على اتم استعداد لقتل اى احد تسول له نفسه الهجوم علينا حتى لو كان الثمن حياتى وفعلا اول ما فتحت الباب لقيت واحد ابن جرنا عاوز فلوس لبتوع الكهربا وساعتها طبعا طلعت فيه وقلتله هو حد يخبط على الباب بالطريقه ديه انت حمار ياشيخ حرام عليك مش كفاية اللى الواحد فيه واديته الفلوس وانا بحذره اياه يفكر يخبط كدا تانى مره تانية واديته الفلوس ونمت بالعافيه واول ما صحيت من النوم اليوم التانى اللى هو يوم 30 يناير مكنتش مصدق نفسى ان اليوم اللى فات خلص يتبع بس النهارده على المغرب كدا ان شاء الله ......................... ... |
رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله
اقتباس:
هههههههههههههه ينهار ابيض مسدس مره واحده نورت الموضوع يا باشا |
| الساعة الآن 07:44 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017