مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)

- جمارك السيارات (https://www.masrmotors.com/vb/forumdisplay.php?f=140)

- - المعاقين (https://www.masrmotors.com/vb/showthread.php?t=84657)

المعاقين

السلام عليكم

دي اول مشاركة ليا في المنتدي و بصراحة بكتبها ونا مخنوق جدا

انا دلوقتي عندي 18 سنة و عايز عربية لاني معاق حركيا و محتاجها ضروري

بس لية كل ما اسأل عن موديل معين يقولي مفيش غير لافيتا و نوبيرا و لانوس و حاجات من 1997 لية مفروض عليا اركب عربيه قديمة في حين ان في ناس عاديين في سني ليهم الحق يشترو اي عربية

انا هقول عالموديل اللي عايزو هتقولو قديم بس شوفو فرق السنين

ميتسوبيشي لانسر 2005 شوف بقي الاحسن و انت عندك 18 سنة اللي هو سن التمتع بهواية جديدة تجيب حاجة موديل 2005 و عالاقل تبقي معروفة ولا تجيب عربية منقرضة زي النوبيؤا لمجرد انك معاق و حطو تحتيها 10000 خط و ياريت حد يجاوبني ذنبي اية اجيب عربية قديمة تتفرض عليا محصورة في تلات او اربع موديلات

رد: المعاقين

http://annunci.ebay.it/auto-e-moto/a...3/auto-e-moto/ شوف اللي يناسبك من هنا وحط عليه 5000 جنيه شحن و ابعتهالك من ايطاليا وعلي ضمانتي ولو معجبتكش هديك حقها كله و اشتريها منك وربنا يحاسبني لو خدت منك مليم زياده نظرا لظروفك

رد: المعاقين

بسم الله الرحمن الرحيم
اخونا العزيز
اولا الله يحفظك ويبارك فيك ولك
ثانيا مسألة عربيات المعاقين سهلة ومش محدودة زى ما انت متخيل
اللى هيحكمك فلوسك + السعة اللترية لان اقصى حاجة مسموحة لك هى 1600cc
يعنى فى تويوتا كورولا وفى سكودا اوكتافيا وبى ام دبليو وكل حاجة ممكن تفكر فيها بس الميتسوبيشى اللانسر والنيسان معرفش اوى عنهم فى عربيات المعاقين - يوجد او لا
وممكن اى حد يبعتلك العربية اللى تعوزها من بره زى ما العضو Pop301 تطوع
وعندك جمرك مدينة نصر اغلبه كورولا ان لم يكن كله كورولا
جمرك بورسعيد فى كل حاجة تقريبا
بس معلومة لك جمرك اليابانى عالى حبتين
ودى مشاركة لى فى موضوع تانى بخصوص عربيات المعاقين

اقتباس:

المشاركة الأصلية كتبت بواسطة ahmedsl (المشاركة 553734)

بسم الله الرحمن الرحيم
يا باشا انت ليك عربية لا تزيد عن 4 سلندر ولا تكون اعلى من 1600 سى سى
ايا كان نوعها او بلد منشأها
ولك تخفيض جمركى 20 الف جنيه
وعلشان تستفيد من التخفيض صح بتشترى عربية اقدم من سنوات
بمعنى انت حصلت على الموافقة فى 2012 مثلا وعاوز تشترى العربية
يبقى تسيب موديلات 2012 و2011 و2010 و2009 و2008
وتجيب موديل 2007
والسبب انك بتاخد خصم 10% عن كل سنة بحد اقصى 5 سنوات
يبقى تاخد 50% تخفيض جمركى + ال 20 الف جنيه
مثال
الكورولا جمركها تقريبا 76000 جنيه
تاخد عن الموديل 10% تخفيض عن كل سنة بحد اقصى 5 سنوات
يبقى زى ما قلنا لو اخدت الموافقة فى 2012 وهتجيب 2007 او ما قبلها ايا كان تاريخ الصنع
يعنى 5 سنوات = 5 * 10% = 50%
يعنى 38000 جنيه
يبقى فاضل عليك 38000 جنيه
وتاخد عليهم 20000 جنيه اعفاء
يبقى فاضل 18000 جنيه
ده مثال على جمرك الكورولا
والباقى بالمثل مع اختلاف الضريبة وشوية مصروفات نثرية معنديش عنها فكرة
ودى المعلومات المتاحة عندى
والله اعلى واعلم

وانا فى الخدمة ان احتجت اى شىء

رد: المعاقين

اولا شكرا لرد حضرتك هو بصراحة عرض كويس جدا بس مقدرش اقبل.لان حضرتك عارف شوارع برة غير شوارعنا يعني مع اول مطب هاخد ابونيه في القصر العيني

ثانيا شكرا للافادة لكن معتقدش اني هلاقي غير الانواع اللي قولتها لأني كبمت شركة في بورسعبد معروفة جدا قالي مفيش غير دول حاليا

انا ان شاء الله هعمل حسؤبي علي حوالي 40 او 50 بس طالما الموديلات قديمة كدة برضو يبقي حلو اوي لو دفعت فيها 20 عالاقل استفيد بالباقي في حاجات تانيه و مبقاش ضيعت المبلغ دة في عربيه هتقعد كام سنه و هتدفن

رد: المعاقين

و حتي الكورولا معتقدش اني هلاقيها الا باللف ونا عايز اروح صد رد اجيبها في ساعتها و ارجع

رد: المعاقين

و ياريت حضرتك تقولي الع بيات النضيفة اللي مش قدبمة اوي و تستحق ادفع فيها المبلغ دة و لو ملقتهاش في كذا الاقيها في كذا عشان متعبش في التدوير لأني رايح مع والدتي ان شاء الله

رد: المعاقين

بسم الله الرحمن الرحيم
يا اخونا العزيز شوف اللينك ده
http://www.crystal-car.com/magazine/...&id=8&Itemid=9
ده بتاع شركة شغالة فى سيارات المعاقين
ممكن تتعرف منه على الاسعار وممكن تكلمهم تستفسر على اللى انت عاوزه
ولكن للامانه انا لم اتعامل معهم
وربنا يوفقك لخيرك ان شاء الله