واقع في مشكلة كبيرة ومليش غير ربنا ثم انتم
 

بسم الله الرحمن الرحيم
انا مشكلتي بإختصار
1-اشتيرت العربية بتوكيل يوم 12 يوليو 2011 وكانت مركبة النمر الجديدة
2-طلعت شهادة مخالفات في نفس اليوم والعربية مكنش عليها مخالفات خالص يعني صفر
3-انهاردة 19فبراير 2012 الرخصة انتهت روحت مسجل لنفسي عشان انقل ملكية وروحت اطلع شهادة مخالفات لقيت عليها 7000 جنييييييييييييييييييييييي ييه مخالفات:090104~384:
4-المخالفات دي طلعت علي النمر القديمة اللي انا معرفش عنها حاجة يعني مش علي النمر الجديدة وتواريخها بعد مركبت النمر الجديدة يعني المفروض النمر القديمة عند الحكومة مرمية وعمال يتحط عليها مخالفات
5-مش عاوزين يرخصولي الا لما ادفع المخالفات وبعد التظلم اصبحوا 5000 جنييييييييييييه
مع اني والله العظيم من ساعة مشتريتها مش عليها جنيه واحد مخالفات مش حرام الظلم ده
6-اقولهم يعني المخالفات مش علي النمر اللي راكبة ولا انا اللي عاملها يبقي ادفعهم ازاي يقولولي العربية ضامنة يعني انا اللي اروح اجيب للحكومة حقها من واحد عليه 7000جنيه والا ادفعهم انا

بالله عليكو فيدوني اعمل ايه ده انا قدرش استغني عن العربية:fun_36_1_47[1]:

رد: واقع في مشكلة كبيرة ومليش غير ربنا ثم انتم
 

أستاذى العزيز- كان الله فى العون
بس أنا ليا تجربة شخصية حصلت فى شهر أكتوبر 2011 وهى:-
انا كنت ببيع عربيتي وروحت علشان اجيب شهادة مخالفات من الدراسة واثناء ما انا كنت فى انتظارها كنت بدردش مع راجل طيب قاعد جنبى وحكى الآتي:-
أنه اشترى عربيه بتوكيل زى حضرتك وفعلاً ماكنش عليها حاجه ولما جه يرخص كان عليها مبلغ ؟؟؟ ولما عمل تظلم فى النيابة اللى جنب الشباك فا النيابة أمرت بتحويل المخالفات على صاحبها الأول فيكون المبلغ واجب السداد عليه (المالك الأول) وفى رصيد مخالفاته.
ووالله العظيم الراجل مشى يومها وخد شهادة المخالفات من غير واسطة أو كوسه.
ده اللى حصل بالظبط فى شهر أكتوبر اللى فات.

رد: واقع في مشكلة كبيرة ومليش غير ربنا ثم انتم
 

عليك وعلى البائع

وتفاهم معاه

لو لقيت مفيش إستجابه منه فى التفاهم

يبقى عليك وعلى محامى

يجيبلك حقك الواضح

رد: واقع في مشكلة كبيرة ومليش غير ربنا ثم انتم
 

رد: واقع في مشكلة كبيرة ومليش غير ربنا ثم انتم
 

اولا اللى حصل بيتكرر كل يوم و للاسف القوانين و الظوابط الموجودة غير كافية او القائمين عليها غير كفء

اولا اتاكد حضرتك ان الرقم القديم ده هو رقم العربية القديم... حصلت معايا و اخدت شهاده مخالفات ب 3000 جنيه على الرقم القديم و لما راجعت الورق اللى كان عندى لاقيت الرقم مختلف.

الحاجة التانية ان حضرتك تجيب عقد الشهر العقارى و ان العربية كانت ملك الغير و تطلع على مدير المرور اللى انت تبعه و يكون معاك المالك الاصلى للعربية او مش معاك "بس ده لمصلحته انه يكون موجود" و يعمل التظلم و يروح على النيابة و يخفض المخالفات و يدفعها او لو مش موجود تتحمل عليها بشهاده انك ما كنتش المالك فى الوقت ده و ساعتها بقى هو حر.

الحاجة التالتة و ده الحل الشعبى تتطلع على النيابة و تقول لوكيل النيابة اللى حصل و ممكن يطلع ابن حلال و يخفضهالك انشاء الله و نبقى قللنا الخساير

ربنا يكون فى العون و يبعد عنك شرها و البلد دى يتظبط حالها

رد: واقع في مشكلة كبيرة ومليش غير ربنا ثم انتم
 

بسم الله الرحمن الرحيم
بداية انا اعمل محامي
بالنسبة لحل مشكلتك من الناحية القانونية فهناك عدة فروض :
1ـ الفرض الاول / لو كانت ملكية السيارة اتنقلت نهائي من صاحب الرقم القديم الي البائع ليك وتم تقديم براءة ذمة من البائع ليك وقت نقل الملكية له و انت معاك شهادة مخالفات بالرقم الجديد فلن تكون غير مسئول عن اي مخالفات الا عن هذا الرقم عن الفترة من تاريخ استخرج شهادة المخالفات وما بعدها وعليك التمسك امام نيابة المرور بهذه الشهادة التي معك والشهادة القديمة المقدمة من البائع لك اثناء نقل اللمكية له الموجودة بالملف ( وعليك بتصويرها من الملف ) وتتمسك بهم معا لاستخراج شهادة براءة ذمة لك وطلب تحويل تلك المخالفات علي مالك الرقم القديم لان العقد المسجل المرفق باوراق نقل الملكية قبل تغيير الرقم به نص علي تحمل البائع كافة المخالفات عن المدة السابقة علي تاريخ البيع وتحمل المشتري اياها عن المدة اللاحقة للبيع وكان علي ادارة المرور ان لا تقوم بنقل الملكية للمالك الذي سبقك الا بعد ان يحضر براءة ذمة اما انها لم تفعل فلا يجوز تحميلك خطأ ادارة المرور وتمسك بحقك لاخر لحظة او انها فعلت واحضر البائع لك وقت نقل المكية له شهادة براءة ذمة بواسطة او بالفلوس دون ان يدفع فأيضا تمسك بها وهي تكون مرفقة بالملف ففي الحالتين لن تتحمل شيئا .
2 ـ الفرض الثاني / وهو ما حدث معي بالفعل منذ عدة اشهر وهو ان البائع لي نقل الملكية لنفسه وغير الرقم وحصل علي تصريح مؤقت لحين احضار شهادة المخالفات ولم يحضرها وقام بالتصرف ببيع السيارة لي بموجب هذا التصريح قبل احضار المخالفات واحضرلي شهادة فقط تقول ان المرور تعرض لحريق وجاري حصر المخالفات من علي الكمبيوتر وهنا طلبوا مني وقت نقل الملكية لي شهادة مخالفات ذهبت لاحضارها فطلبوا مني في نيابة المرور ان اذهب الي ادارة المرور واحضر بيان باصل العربية هل كانت تحمل ارقام قبل الرقم الحالي من عدمه علشان لو كانت تحمل رقم قبل الرقم الحالي لازم اجيبله شهادة مخالفات وبعدين اجيب شهادة للرقم الاخير , وبالفعل ذهبت لادارة المرور وطلبت من الموظف خطاب باصل العربية فهو لقاها موديل 2008 فقام كاتب لي جواب علي انها او ترخيص عندهم دون ان يرجع للملف وخدت الجواب ورجعت للنيابة ودفعت مخالفة واحدة كانت علي الرقم الجديد وخلصت والحمد لله فلو استطعت انك تجيب جواب زي كده هاتقدر تخلص بسهولة .
وربنا يوفقك

رد: واقع في مشكلة كبيرة ومليش غير ربنا ثم انتم
 

شكرا يا جماعة لكل اللي رد علي مشكلتي حسيت اد ايه ممكن استفيد من حضراتكم بس اغلب الناس نصحوني زي ما العضو ahmedmomtaz372 تفضل وقال اني اروح علي مرور الدراسة واعمل تظلم هناك في المشكلة بتاعتي (البيه رئيس النيابة في المرور بتاعي دخلتلو قالي لو كنت سجلت يوم مخدت شهادة المخالفات القديمة شهر يوليو 2011 كنت حولتلك المخالفات علي المالك القديم انما غلطتك انك سجلت بعد تاريخ الشهادة بسبع شهور يعني انهاردة عشان انقل ملكية قولتلو انا قولت امشي بالرخصة والتوكيل لخد ما الرخصة تنتهي وبعدين انقل ملكية منا عارف انها مش عليها مخالفات قالي هي دي غلتطك وده اخر كلام عندي قولتلو يعني حضرتك انا اشتريت العربية بتوكيل لما خدت شهادة مخالفات من عندكوتفيد ان العربية مش عليها مخالفات تيجو انهاردة وتقولولي عليها 7000جنيه قديمة انا ذنبي ايه يقولي هو كده هتتدفع يعني هتدفع معنديش حل غير اني اروح الدراسة بس يارب يتفهموا الموقف ) يرضيكو الظلم ده انا والله شاريها بشتغل بيها ومن ساعت مشترتها معليش مخالفة واحدة مع اني بعمل بيها شاوير كل يوم

الحمد لله الذي لا يحمد علي مكروه سواه