تكييف اللانسر 2007 مش حلو خالص
 

انا لسه شاري لانسر بومة 2007 مستعملة عاملة 44 الف كيلو

و شغلت التكييف و كده و مش بحس انه بيبدأ يسقع غير على 3

انهاردة بقى ركبت الأفيو 2007 بتاعت واحد صاحبي ... لقيت التكييف بتاعها على 1 احسن من التكييف بتاعي على 3

ازااااااى ده بقى !!!!

مع ان اللانسر تكييفها ياباني و الأفيو كوري


و انا موتوري 1300 و هو 1500 ده ممكن يأثر بالشكل الفظيع ده ولا ايه


حد يفهمني يا جماعة

رد: تكييف اللانسر 2007 مش حلو خالص
 

لا موضوع الماتور دا ميأثرش ياباشا زى مانت فاكر

انت هتعمل الآتى

هتغسل الريداتير غسلة نضيفة

الخراطيم والحجات دى هيتشيك عليها

الفلتر تشوفه لو مسدود لو له علاج يبقى تمام ملوش علاج يبقى فلتر جديد

تشحن فريون نضيف اوى على مافتكر اسمه فريون انجليزى دا بيدى تلاجة بمعنى الكلمة

وبردو شوف الخبراء اللى احسن منى هنا ان شاء الله يفيدوك

رد: تكييف اللانسر 2007 مش حلو خالص
 

يعني ايه رادياتير ؟؟؟ و الخراطيم و الحاجات دي اشيك عليها ازاى و الاقيها فين ؟؟؟ و الفلتر ده اشوفه ازاى ؟؟؟ معلش لسه جديد

رد: تكييف اللانسر 2007 مش حلو خالص
 

بص ياباشا من الآخر
كهربائى ثقة ,, تروح له وتقوله على العيب وهو هيظبطهولك بس لازم يكون ثقة عشان ميلعبش عليك فى الفلوس ولو انت فى المحلة او قريب من المحلة تشرفنى وانا اوديك عند كهربائى ملوش حل وشغله من ابو بلاش يعنى متقلق فى السعر

رد: تكييف اللانسر 2007 مش حلو خالص
 

للاسف من اسماعيلية و معرفش حد ... بس ايه علاقة الكهربائي بالتكييف ؟

رد: تكييف اللانسر 2007 مش حلو خالص
 

التكييف شغل كهربائى رسمى نظمى عزمى فهمى

عموماً فى رجالة هنا من الاسماعيلية على ماظن او من مناطق قريبة من الاسماعيلة

فأنت تعمل موضوع جديد بعنوان جذاب شوية يعنى مثلاً لأهالى مدينة الاسماعيلية والمناطق المجاورة وتطرح مشكلتك وتطلب فيها ان حد يوصلك بكهربائى معروف

وبعدين مش معقول معندكش ولاصاحب معندوش عربية اكيد لك على الاقل شوية اسأل اى حد فيهم عن كهربائى ,, ياسيدى هتروح بعيد ليه وانت ماشى بعربيتك فى اى شارع هتلاقى اى محل يخص السيارات سواء اكسسورات او بتاع كوتش او اى محل يخص العربيات وخلاص قوله متعرفش كهربائى كويس؟ هيدلك
وربنا يوفقك ياباشا ولو احتاجت اى حاجة اكتب هنا او ابعتلى على الخاص وانا متابع معاك ان شاء الله

رد: تكييف اللانسر 2007 مش حلو خالص
 

الرادياتير الى بيبقى قدام فى وش العربية ورا الشبكة على طول فى اى بنزينة خلى حد ينضفه كويس بهواء مضغوط
لو فى فلتر غالبا حيبقى فى مكان تحت الدرج
جرب حط وضع مفتاح اتجاه الهواء على تدوير الهواء داخليا و ليس وضع هواء من بره
و لازم المقارنة ما بين عربيتين تكون فى نفس الظروف ( التوقيت - السرعة - وضع مفتاح الهواء - الشمس )