مصر موتورز مجتمع السيارات - تعالوا نعرف ازاي نغسل عربيتنا تحت شعار ( و لا الحوجة لمغسلة البنزينة )

موضوع انهاردة نعرف ازاي نغسل عربيتنا
و قررت انزله لسببين
اولهما : في ناس متعرفش ازاي تغسل عربيتها او مش في دماغهم فبيروح ع فين ؟ مغسلة البنزينةوبيكبروا دماغهم
ثانيهما : القرف اللي الواحد بيشوفوا من بتوع المغسلة و اللي كلنا واجهناه اذا كان تنضيف اي كلام او واحد مش عاجبه البقشيش و بيطلب كمان ليه و لزمايله او حاجات تتسرق من العربية ..ألخ ..الخ ..الخ
و انا عن نفسي نادر جدا لما اروح مغسلة
في الوقت اللي تعبان و ضايع و مستعجل اروح
لكن طول الوقت بنضفها بنفسي

فعشان كده نزلت الموضوع تحت شعار (و لا الحوجة لمغسلة البنزينة)

عشان نغسل العربية لازم تتوافر المعدات المناسبة و هي كالآتي :

معدات القوات الخاصة
1- الملابس
- بنطلون قديم
-اي تي شيرت
- الشبشب

2- تجهيزات فرد القوات الخاصة المقاتل
- خرطوم او جردل
- طبق بلاستيك صغير
- 2 فوطة تنضيف
- فرشة تنضيف الارض
- مقشة و جروف صغيرين و مكنسة
- سفنجة مواعين متكونش خشنة اوي
- ورق جرايد
- ملمع

3- المهمة
- تنضيف زقزوقة بتاعتنا

1- قبل ما ننضف نلبس الأول طقم القوات الخاصة و نراجع المعدات اللي قولنا عليهم و انا عن نفسي مخلي عندي طقم قديم لأي مهمة صعبة بنطلون رياضة قديم ع تي شيرت برده قديم و شوفوا القديم مع بعضه بيعمل ايه

2- نشغل نجوم اف ام و نعلي الصوت لحد ما يطلع واحد تيت من البلكونة يقولك وطي الكاسيت بدل ما انزل اوريك شغلك ههههههه

و نسمي و نبتدي المهمة الصعبة

اولا : من جوة

1- نطلع كل الدواسات برة العربية

2- لو هتستخدم المكنسة ممكن تشيل بيها التراب الكتيير و بعدين المقشة و الجروف و تكمل عليها
بس عن نفسي شايل المكنسة و بتسخدم المقشة و الجروف الصغيرين بتوع الهلال و النجمة دول بيخلو الموكيت زي الفل و ننضف بين الكراسي بين القاعدة و الضهر و بعد ما نضفنا نبل المقشة بحبة مية و نعمل الموكيت كله تاني
بعد ما نخلص الارضية نجيب ورق جرايد و نحطه في الارض عشان متتبهدلش تاني

3- بعد ما خلصنا من الارضية و الشنطة ورا نيجي بقي للتابلوه و الابواب لو التابلوه جايب جاز و متبهدل و لونه اتغير من كتر تراكم التراب فالحل سفنجة المواعيد و نقطة صابون سائل ع مية في طبق صغير و خلي الرغاوي تعيش
تنضف التابلوه و الابواب من كل التراب اللي عليها وبعدين ادعك التابلوه و الابواب كلها و اي فبر جوة العربية بين الكرسيين عند السماعات ورا حزام الامان
طبعا تخلي بالك بعيد عن زراير التابلوه و لو الابواب فيها ازاز كهربة يبقي تغطيها ببلاستر و تخلي بالك برده ان مفيش نقطة مية تيجي جوة الباب او ع الكهربة و تكون حذر جدا و بالنسبة لجنب الزرار اعملها بقماشة مبلولة و بعد ما تخلص بالسفنجة بتاعت المواعين بفوطة مبلولة و تمسح كل الصابون و التابلوه و تسيبه ينشف

- اما بقي لو التابلوه عادي يعني مش بالرهابة المعتادة اللي هو بقي اسود من كتر التراب فتكتفي بقماشة مبلولة بلل خفيف و نضف

4-بالنسبة بقي للفرش بالنسبة ليا انا الفرش عندي ازرق في رمادي فاتح جبت برده بتاعت المواعين و اديتها و بعدين بفوطة مبلولة الفرش رجع جديد تاني لكن بعملها بليل و بسيبها لحد الصبح في يوم مكونش نازل فيه عشان تنشف ( في ناس هتقول ريحة او مش ريحة و تعمل ) لأ انا مش بغرقها و انقعها بمية ده بيبقي حاجة خفيفة يعني
كده خلصنا من جوة

ثانيا : من برة

كده خلصنا من جوة العربية كلها و بقت مية مية في حوالي ربع ساعة او تلت ساعة ع حسب سرعتك
نيجي بقي لبرة

1- استخدام الخرطوم : هنجيب الخرطوم و ننزل بيه كل التراب اللي ع العربية
نزلنا كل التراب تمام

2- نجيب بقي الفوطة اللي بنضف بيها و نجيب الخرطوم بايديا اليمين و الفوطة شغالة بالايد الشمال
يعني تنضف و انت بتحط المية عشان نطلع اي حاجة مطلعتش في اول غسلة بعد ما نخلص جسم العربية كله

3- نيجي للعجل نمسك برده الخرطوم و الفرشة بتاعت الارض و ندعك الجنوط و الطاسات
- في حتت في العربية زي تحت العتب بتبقي شاربة طينة و نشفت لما قالت يا كيف برده نستخدم معاها الفرشة لكن واحدة واحدة و احنا بندعك

4- و نغسل العربية كلها تاني بالمية

- استخدام الجردل : لو الخرطوم مش متوفر نسخدم الجردل و نتبع نفس الخطوات و بالنسبة لدعك العربية بالفوطة ناخد مية بالفوطة من الجردل و ندعك و نتبع نفس الخطوات عادي
- بعد ما العربية نضفت من برة نسيبها تنشف شوية و نجيب بقي فوطة التنضيف و نغسلها كويس و نعمل الازاز من جوة و من برة و بعدين باقي العربية

5- بعد ما خلصنا الكلام ده نجيب ورق الجرايد و نعمل الازاز من جوة و برة هتلاقي الازاز رجع بيبرق كأنك لسه جايب العربية بس شغل بضمير بقي مع اطراف الازاز عشان محدش يجي يقول سمعنا كلام اكسل و اطراف الازاز طلعت منيلة في الاخر و نعمل المرايات و الفوانيس

6- و نجيب الملمع و نظبط التابلوه و الابواب بس كده

تفتكروا احنا كده خلصنا .... لأ لسه مستعجلين ع ايه
انتوا نسيتوا الدواسات اللي رميناها برة العربية لحد ما جالها برد من كتر الحر

7- نجيب الخرطوم و الفرشة بتاعت الارض و ننضف الدواسات هترجع جديدة تاني
و نحطها في العربية تاني و نحط فوقيها ورق جرايد عشان متتبهدلش و يجي عليها تراب لما نركب

بالمرة بقي نبص ع مقياس الزيت و زيت الفرامل و المية بتاعت الريداتير و مية المساحات و ممكن لو عايز بفوطة مبلولة و تنضف ع اد ما تقدر الموتور و ما حواليه كده يعني

خلاص كده يا شباب العربية رجعت نضيفة في حوالي ساعة

و كل يوم بقي نهتم اننا نشيل التراب ع العربية اول بأول بلاش كسل
متخليش تراب لمدة يومين و هتلاقي العربية فضلت معاك نضيفة و لا الحوجة لمغسلة البنزينة

انا بعملها مرتين كل شهر او 3 ع حسب ما بحافظ ع تنضيف التراب دايما
هنخسر ايه بقي لو اخدنا من وقتنا ساعة كل اسبوع او اسبوعين في تنضيف العربية