|
مش طايق العربية وشكلى هستغنى عنها
انا خلاااااااااااص مش طايق العربيات وعاوز ابيع عربيتى
كل مكان لازم تدفع فلوس علشان تركن هو مش بخل على فكرة بس مش بحب الاستغلال يعنى عند البيت ممكن الف نصف ساعة او اكثر علشان الاقى مكان فاضى قولت اشوف الجراج اللى عند البيت قال 180 عند مكان العمل ممكن والله الف اكثر من ساعة علشان الاقى مكان اركن وفى الاخر بركن فى شارع واحد مسئول عنة بي خمسة جنية وبياخذ تقريبا 100 فى الشهر دة الواصلات ارخص بيكثير دة غير اشتراك الانترنت ........الخ خلاص بقى المرتب قرب يخلص دة غير الحفر اللى العربية بتتهبد فيها وانا ماشى هو انا كل شوية اغير مساعدين ولو فكرت بس تقف لراجل كبير او واحده معاها اطفال كل اللى وراك شغالين كلاكسات وفلاشر وكمال يبقى الطريق واقف ولو اتحرك متر واحد لازم تدخل المتر دة يا اما سواق اتوبيس او ميكروباص تحس انة هيخبط العربية بجد والله مش طايق ومبقتش اروح الشغل بالعربية اهى مركونة وخلاص معلش طولت عليكو بس فعلا مخنوق |
مش عارف اقولك ايه بس انت عندك حق فى حالات كتير بتبقى تكلفة اقتناء العربيه اكتر بكتير من استخدام المواصلات العامة .. بس مفيش مانع فعلاً تستخدم المواصلات فى الايام اللى هتبقى محتاج فيها مشاوير رايح جاى
يعنى انا مثلا لو رايح المكتب بس وراجع بعدها على البيت ممكن اروح بالمترو وبمشى مسافة كبيرة بس افضل واريح من ضغط اعصاب السواقة لكن لو كذا مشوار او معايا الاولاد يبقى لازم العربيه اما موضوع الجراجات ده فمشكلة تانية خاصة والاسعار بقت ولا ايجار الشقق فعلاً بس انت لو قدامك مكان امان جيب غطاء كويس وريشه تراب واركن تحت البيت ووفر اجره الجراج لكن لو المكان مش امان يبقى معلش لازم تشوف جراج ايا كانت قيمه ايجارة وفيه جراجات كتير هتلاقيها فى حدود 100 شهرياً بس من غير مسح او غسيل طبعاً انت مش ناقص تهريج بس فكرتنى بموقف حقيقى حصلى فى الموضوع ده بس كان ساعتها ايجار الجراج حوالى 50 - 60 جنيه بالكتير فى الشهر ولما حسبتهم لقيتهم فى السنة حوالى 600 - 700 جنية فى حين ان التأمين على العربيه كله كان بنفس القيمة تقريباً ( ايام الجمعية الله يحرقها) فقولت يا واد يعنى ايه لازمة الجراج انا بدام مأمن على العربيه ياكشى تولع حصل فيها حاجة التأمين يشيل اتسرقت كلها التأمين يدفع خلاص مش هحطها فى الجراج وقد كان طبعاً كانت معارك شرسة بينى وبين سكان المنطقة كلهم خاصة انى كنت كل يوم ارميها رميه شكل قدام بيت او محل وطبعاً شباب ورجالة وستات وعيال المنطقة كلهم عبرو عن غضبهم واستيائهم فى العربيه نفسها بكل الطرق مابين سرقة استيكرات او تجريحات ولوحات من الفن المسمارى لحد ما وصلت لدلق البوية وانا اخر تنفيض الا لو حاجة غاظتنى شوية اقعد اشتم واهلل وطبعاً محدش بيرد قعدت على كده حوالى سنة ونص العربيه بقت كلها بشل بصراحة لكن الناس يأست ومبقاش اى حد يفتح بقه لو رميت العربيه قدامة ان شاء الله تكون بالعرض دلوقتى انا روحت سمكرت العربيه وبقيت احطها فى الجراج عن قناعة بانه افضل علشان الجيرة والطريق اولا وعلشان الامر ميخلاش انك تنسى باب ولا شباك مفتوح وعلشان امان اكتر من محاولات السرقة الفاشله او التجريح والخرابيش بس مازلت مستمتع بامكانية رمى العربيه فى اى حته من الشارع :) |
رد: مش طايق العربية وشكلى هستغنى عنها
بعد اذنك
هو مش انت معاك 128 صح؟ يعني صغيرة مش مشكلة؟ انا بقي حقولك انا بدور علي ركنة اد اية اولا انا في الاسكندرية معايا سيات133 لما بروح درس ما باخدش دقيقة الركن ولو رحت مكان فيه سايس بدفع جنية وساعات بخلع و لو المكان زحمة بركنها علي اي رصيف اةة بتطلع ع الرصفان 4*4 بقي انا مش متصور ازاي انت بتعاني في الركنة جايز عشان في القاهرة؟؟؟؟؟؟؟؟؟؟ بس انصحك لو مافيش مكان قريب من شغلك تركن في حتة بعيدة شوية و تاخدها مشي ماهو المشي رياضة و التدوير علي ركنة موهبة اعرف المنطقة اللي انت بتركن فيها كويس هتلاقي اماكن كتير ما حدش عارفها جوة الحواري و الشوارع اعذرني ع الاطالة وارجو انب اكون افدتك |
رد: مش طايق العربية وشكلى هستغنى عنها
اقتباس:
الحمد لله المنطقة عندى امان الى حدِ ما بس لو مافيش مكان بستنى شوية لحد ما مكان يفضى واركن جزاك الله خيرا يا ابو نورا فعلا فتحت عينى على نقاط هامة |
رد: مش طايق العربية وشكلى هستغنى عنها
عاوز نصيحتي
امشي بيها بالليل في الرواقة كده وروح بيها الكورنيش مع علبة كانز وروق بالك ولاتخنق نفسك بس تعرف المحافظات زحامها بيبقي اقل شوي من القاهرة والجيزة يمكن عشان الزحمة عندك كتير فانت حاسس الإحساس ده - حاول انك تمشي في الشوارع الواسعة - خليك على نفس المنوال احترم العجوز واي حد عاوز يعدي الطريق الخليج هنا كل كده بيحترموا اللي بيعدي الطريق واللي يضربلك كلاكس نفض له انت صح وهما غلط تحياتي ليك وماتزعلش نفسك |
رد: مش طايق العربية وشكلى هستغنى عنها
اقتباس:
والله ياباشا انا بعانى علشان فعلا انا فى القاهرة ومكان عملى فى وسط البلد يعنى انسى انك تركن ببلاش انا فعلا اللى بشعر فية بالاستغلال ان عند الشغل واحد واخد كذا حارة عاملهم جراج وطبعا البية سادد الحوارى بعربيات علشان مش اى حد يركن ولو عايز تركن طول اليوم بخمسة جنية انا اللى نفسى اعرفه مين اللى سمح لية بامتلاح الحارة سيبك انت كنت امبارح الساعة 10.00 صباحا رايح تامينات قصر النيل بوسط البلد وطبعا رايح بالعربية على اساس هلاقى مكان ادخل الشارع ياللهول العربيات راكنة اربع صفوف صفين عن اليمين وكذلك على الشمال يا جماعة عايز اطلع التامينات نصف ساعة ونازل على طول ضابط واقف فى اشارة مرور قال لى ممنو ع وهتاخذ مخالفة قولت اركن فى اى ساحة انتظار اشوف مش لاقى خالص وكلة على الاخر روحت رايح هند الشغل راكن العربية فى حارة الراجل اللى لسة متكلم علية بخمسة جنية وروحت التامينات على رجلى والله انا نفسى اشترى دراجة (عجلة) انا بحب العجل جدا جدا بس نعمل اية بقى فى المجتمع اللى احنا فية ومعلش طولت عليك |
رد: مش طايق العربية وشكلى هستغنى عنها
اقتباس:
سبحان الله انا بحب لما اشوف اى شخص سواء كان كبير او ضرير مش عارف يعدى الطريق من سرعة العربيات بفعل اقل واجب واقف لحد ما يعدى بس بيكون نفسى انزل اعدية الطريق بنفسى والله لولا إنى عارف أنى هرجع أجد العربية طايرة من اى سواق ميكروباص او اوتوبيس لفعلت الحمد لله على كل شىء وجزاك الله خيرا |
| الساعة الآن 07:17 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017