سماعات الصني خروشت
 

السماعات بتاعت عربيتي نيسان صني 2011 بتخروش بعد ما ظبط الكاسيت و عليت ال bass لقيت السماعه اللى في الباب الامامي يمين بتخروش
قمت لغيت الصوت من السماعات الامامي و خليتهم على السماعات الخلفي لاقيت سماعه تانية من الى وراء بتخروش و اتصلت بمركز السبع قالي ان السماعات في الضمان و يمكن تغيرها بس المشكله ان اللي هغيرها هيبقو نفس النوع و هيخرشو اككيد تاني لاني بحب اعلى الكاسيت و خصوصا ال bass فهل تنصحوني اغير السماعات و اجيب سماعات تانية sony مثلا او هكذا و لو هعمل ده تنصحوني اجيب بيضاوي و افتح في الصاج اللي في الرف الخلفي و اركب معاهم صب و لا اجيبهم مدورين من غير ما افتح في الصاج مع العلم ان البضاوي اقوى و ارخص من المدورين و هل السماعات اللي في الباب بيبقى ليها مقاسس مخصوص ولا ايه بالظب وشكرا واسف على الاطاله

رد: سماعات الصني خروشت
 

ممكن تقولهم بدل السماعات اللي جايه في موديل عربيتك طالما في الضمان وحيغيروها ، يدوك اقوى منها وتدفع فرق ( ده لو ممكن )
حل تاني لو عاوز تغير السماعات وتجيب حاجات اعلى بقا من الفبريكه ،، لو الصاج نفسة الخلفي فتحاته مدوره فعلا ( وسيبك من اللي ظاهر قدامك على التابلوه الخلفي ) افتح الشنطة وبص عليها من تحت ومن جوه الشنطة ،، لانه في الغالب بيكونو مصممين الصاج بحيث يستقبل سماعات مدوره وبيضاوي في نفس الوقت ،، اللهم انك بس حتفتحله في الديكور اللي ظاهر عندك من فوق.
في حالة انه الفتحات مدورين في الصاج وانت عاوز تركب بيضاوي ، يبقا حتعمل ستاند خشب وتنجده وتحطه مكان التابلوه الفيبر اللي عندك ، وده حيرفع السماعات البيضاوي شويه لفوق وبالتالي مش حتضطر انك تعدل في صاج العربية،
في الحالة دي بص على المشاركه في الرابط ده يمكن تفيدك بحاجة . مشاركة رقم 16
تحياتي ،،
http://www.masrmotors.com/vb/showthr...t=45531&page=4

رد: سماعات الصني خروشت
 

الف تريليون شكر بس انت ما جوبتنيش على اهم جزء رايك افتح مكان للسماعات بيضاوى و صب لومالهمش مان في الصاج الخلفي للعربية ولا لا:THUMBS~220:

رد: سماعات الصني خروشت
 

بص يا باشا ، هو بالنسبة للصب مش شرط انك تفتحله فتحه اوي يعني في التابلوه الخلفي ،، لانه الصب ترميه في اي مكان في العربية حيرجهالك رج ، فأنسب مكان عشان ما تفتحش كتير في الصاج انك تعمله تفصيلة خشب من نوع MDF وتنجده وتخلي وش الصندوق اللي طالعه منه الصب مايل ، يعني مش حيكون صندوق مكعب اوي يعني ، انما الوش بتاع الصب بس هو اللي حيكون مايل مع مراعاة انك تفتح في الصندوق في الوش بردو فتحتين 3 سم مدورين عشان النفس بتاع الصب ( الهوا )
وانسب مكان ليه ترميه في الشنطه ورا وخلاص على كده، وده كفيل انه يرجلك العربية رج.
بالنسبة للصاج ، خلي موضوع انك تفتحله في الصاج ده اخر احتمال دلوقتي لحد ما تتأكد انه اساسا ممكن يكون مفتوحلهم وجاهزين من اصله ، فكتر خيرهم وفرو عليك.
لكن انا ارجحلك انك بدل ما تفتح في الصاج وتقص فيه ، لا ، الاولى انك تشيل تابلوه الفبريكه عندك في البيت وتفصل استاند خشب بسمك مثلا 16 ملم او لو ممكن اقل بشوية مش حيكون وحش بردو ،، في الحاله دي يا دوبك حتشوف المغناطيس وجزء من شاسية السماعه البيضاوي نازل من تحت الخشبه وفي الحالة دي حتكون الفاتحه المدوره حتقضي الجزء الصغير اللي باين من السماعه البيضاوي وشكرا على كده...

رد: سماعات الصني خروشت
 

الف مليون تريليون شكر مرة تانيه بس انا دايما بسافر بالعربية و بحتاج كل سم في الشنطه فهل لو ركبته في الرف هيبى شغال ولا لا و ايه اضرار اني افتح في الصاج واسف على الاطالة

رد: سماعات الصني خروشت
 

مافيش اطاله ولا حاجه يا باشا تحت امرك

بص هي الفكره مش في الاضرار ، بس غالبا لو انت قصدك على الصب يعني ..
حيكون في سماعات في الاطراف وحيكون الصب طبعا في النص
عادة وعلى حسب نوع العربية بيكون ماشي في الشنطه من جوه لو بصيت عليها من تحت ، حتلاقي كذا ماسوره صغيره رفيعه ودول كتحزيم او تدعيم لمفصلات الشنطة نفسها وبالتالي لو فتحت حتى في الصاج حتلاقي الاسياخ دي ماشيه ومش حتعرف تسقط الصب ساعتها ، ده حيعتمد على تصميم عربيتك لما تبص عليها، وده كمان لو مافيش لمبة فرامل على التابلوه في النص وبدل ما تلغيها يعني .
انما في حل تاني وفي ناس بتعمله كتير وحيكون طبعا ميه ميه لو ينفع عندك ، لو ضهر الكنبة اللي ورا فيها دراع مسند في النص ، في ناس بتفتح في ضهر المسند ده وتثبت الصب على الصاج في الشنطه من جوه بحيث يبقا وشه داخل العربية من فتحت المسند دي.
بالنسبة لاقتراحي للستاند الخشب ، حيفرق معاك في فرق الصوت حوالي 50 في الميه زياده ، خصوووووووصاً دقة وضوح البيز وصفاء النغمه
مش عاوز مش مشكله ، ولو حابب تفتح في الصاج المهم انك تروح لحد شغله نضيف عشان حيقص في الصاج بمنشار أركيت ، واللي بيتقص خلاص انتهى مش حيعمل Undo يعني، فلازم يكون دقيق في القصة بتاعته عشان تكون السماعتين مظبوطين مش واحده عدلة والتانيه مايله شويه ، منظرهم حيقرفوك انت في الاخر ، وما تخليهوش يشتغل باستعجال ظبطه خليه يشتغل بروقان ويفضل انك تروحله من بدري يكون ذهنه فريش ومافيش ضغط شغل انه يقلبك عشانه وكده ، وما زلت برجحلك الخشب بدل قص الصاج ، هي خشبة حبيت تعمل Undo ، رجع الفيبر وارمي الخشبه وخلصت الليله وبالتوفيق ،،