مية الراديتير بتقل بطريقة رهيبة جدا
 

السلام عليكم يا باشمهندس وعلى جميع من فى المنتدى
حضرتكم انا عندى كذا مشكلة
** الراديتير كان مخروم والميه فضيت وجوان وش السلندر باظ والحمد لله اتغير و وش السلندر اتلحم واتبرد وكمان غيرت علبة من الرادتير وماعتش فيه اى ثقوب

كل ده كويس لكن
1- الموتور بيسخن جدا جدا والميه جوه القربه بتغلى نار و بتطلع بخار من شدة الغليان ومع ذلك مؤشر الحرارة كويس قبل النص بكتير
2- الميه بتقل كتير قوى لدرجة ان المشوار العشرة ك لازم ازود ميه وبعده تفضى مع العلم لايوجد اى اماكن تسريب للميه
3- بعد تصليح وش السلندر ظهر صوت مع تزويد الضغط على البنزين والميكانيكى قالى ان ده صوت لقمة السبيكة والموتور فوت بالرغم ان الصوت ده ماكنش موجود قبل الموضوع ده

رد: مية الراديتير بتقل بطريقة رهيبة جدا
 

أكبر غلطه فنيه

اللحام ثم أتباعه بالتيريد المباشر

غالبا بيعمل شروخ فى الوش

وأنا حقيقى ضد موضوع لحامات أوشاش السلندرات بشكل عام

وغالبا الموضوع ده سبب كل مشاكلك

رد: مية الراديتير بتقل بطريقة رهيبة جدا
 

خللى بالك

ممكن يكون صباع الحراره

إللى بيشغل مؤشر العداد بايظ

وتبص تلاقى المكنه قفشت منك

هات صباع تانى جديد أفضل وركبه

الصباع بحوالى 30 ج بكتيره

رد: مية الراديتير بتقل بطريقة رهيبة جدا
 

اشكر حضرتك على الرد
حضرتك شايف الحل ايه
وجزاك الله خيرا

رد: مية الراديتير بتقل بطريقة رهيبة جدا
 

تغير صباع حراره

ووش سلندر أستيراد بحاله جيده

ده الصح

علشان تحافظ على مكنتك

أنت حتتكلف شويه

ممكن تخشلك فى 600 ج مثلا

كله على بعضه بالمصنعيه كمان

( وش بحوالى 450 ج والباقى مصنعيه ونثريات )

بس أنا لو مكانك حعمل كده الصراحه

رد: مية الراديتير بتقل بطريقة رهيبة جدا
 

وبلاش منه

الميكانيكى العكاك إللى عملك الشغل اللى فات

دور على واحد تانى يكون سمعته طيبه

ولو غالى عنه شويه فى المصنعيه

مش مهم

المهم الصنعه ونظافة التقفيل والفكر الفنى الصح

رد: مية الراديتير بتقل بطريقة رهيبة جدا
 

اتفق مع حضرتك واضيف
سخونة الموتور خطر شديد جدا ً علية ويفضل سرعة حل المشكلة
وفى البداية تأكد ان دورة التبريد شغالة وتأكد ان الدورة مكتملة ودة يحتاج لمتخصص لتنظيف وتسليك الدورة
وان شاء الله الموضوع يكون بسيط
واتمنى ان يأتى يوم نجد ان هناك جرس عند بداية ارتفاع الحرارة للتبية اسوة بجرس السرعة على 120كم/س