مصر موتورز مجتمع السيارات - سؤال بخصوص ماستر الفرامل

مصر موتورز مجتمع السيارات (https://www.masrmotors.com/vb/index.php)

- منتدى الصيانة العام (https://www.masrmotors.com/vb/forumdisplay.php?f=4)

- - سؤال بخصوص ماستر الفرامل (https://www.masrmotors.com/vb/showthread.php?t=41776)

سؤال بخصوص ماستر الفرامل

السلام عليكم و رحمة الله و بركاته
طبعا عربيتى الليجانزا تأبى ان يمر يوم دون مشكلة فبالامس كنت فى مشوار و فجاة لاقيت العربية بتفرمل لوحدها و بتكلبش و عزم الموتور بيضيع فوقفت العربية و نزلت شوفت العجل لاقيت الاثنين الاماميين مولعين نار استنيت شوية و حاولت اتحرك لكن العربية كلبشت تماما و مفيش حركة و الموتور مش قادر رحت راكن و كلمت الميكانيكى جالى و قالى المشكلة فى الماستر و هواه شوية و مشيت بيها لغاية الورشة عنده و عمل اختبار على الخراطيم وجدها كويسة و بعدين شاف الماستر لاقى مخرج من الاثنين مش جايب زيت و غيرته استيراد بعد لف كتير و لكن بالبحث فى الانترنت اليوم و جدت النوع اللى تم تغييره غير مخصص للعربيات التى بها ال ABS و انا عربيتى بها ABS فهل مفيش اى امكانية لاصلاح الماستر الاصلى ؟
و استفسار اخر دواسة الفرامل بحس انها بتنزل كتير علشان تبدا استجابة الفرامل و ليس كما الاول ان مجرد ما المس الفرامل تبدا تستجيب فايه ممكن يكون السبب انا سالت الميكانيكى و كنت خارط الطنابير الامامية فقالى بس التيل يطبع على الطنابير و هتظبط معاك فهل الكلام ده مضبوط

رد: سؤال بخصوص ماستر الفرامل

اقتباس:

فهل مفيش اى امكانية لاصلاح الماستر الاصلى

لو لقيتله طقم أصلاح جيد

وأتضح سلامة القميص بتاعه من الداخل

ومع وجود صنايعى جديد

كل شىء يتعمل

اقتباس:

فهل الكلام ده مضبوط

لا

رد: سؤال بخصوص ماستر الفرامل

ازيك يا هندسة
بعد اذنك منين ممكن اتحصل على طقم الاصلاح و طقم الاصلاح ده عبارة عن ايه
و بالنسبة لموضوع الدواسة ايه السبب فى ضعفها

رد: سؤال بخصوص ماستر الفرامل

اقتباس:

بعد اذنك منين ممكن اتحصل على طقم الاصلاح و طقم الاصلاح ده عبارة عن ايه

بيكون عباره عن شوية رنجات كاوتش

زى شنابر البساتم مع الفارق

لتشغيل بساتم الماستر من الداخل وضمان جودة الأحكام والدقه فى توزيع الزيت بين بساتم الماستر من الداخل

ولو تعرف توصل لواحد زى بتاعك الأساسى يبقى أفضل فعلا

بس يكون جديد

أصل كاوتش المساتر الأستيراد بيبوظ من الركنه

ولهذا يفضل عدم شراء المساتر الأستيراد

ياجديد ........ياتعمر القديم فى حالة صلاحيته من الداخل

اقتباس:

و بالنسبة لموضوع الدواسة ايه السبب فى ضعفها

ممكن تلاقى كاوتش الماستر ده وحش ونشف من الركنه ( لأنه أستيراد )

زى ماقولنا سابقا

وبيهرب من الداخل

ودى أشهر مشكله فى المساتر

التفويت الداخلى وبيتبعه ضعف الأداء الفرملى مع هبوط مستوى الدواسه

لو ضغطت عليها وثبت رجلك ولقيت رجلك بتنزل لوحدها

يبقى الماستر بيفوت زيت من جوه

وكان الله فى عونك يا أبو حميد

رد: سؤال بخصوص ماستر الفرامل

يا هندسة انا فكيت الماستر القديم و كان فيه مخرج مسدود جبت منظف البوابة و رشيت جوه الماستر و فى المخرج و المخرج سلك و حطيت WD40 و ضغت على البساتم و بقوا المخرجين بيخرجوا السائل بقوة فهل ممكن يكون دلوقتى بقى شغال كويس و لو ممكن شرح مبسط ازاى البساتم ديه بتتحرك و من اين تستمد قوة الحركة بتاعتها لضغط الزيت

رد: سؤال بخصوص ماستر الفرامل

اقتباس:

و ضغت على البساتم و بقوا المخرجين بيخرجوا السائل بقوة فهل ممكن يكون دلوقتى بقى شغال كويس

ليه لا

جرب تركبه وتستعمل العربيه فى مكان هادىء وبعيد

عن الزحامات مع الحرص طبعا

فى التدرج فى السرعات وأستخدام الفرامل

إلى أن تطمئن على الآداء

لقيت الوضع تمام

يبقى سلكت والحمد لله

اقتباس:

و لو ممكن شرح مبسط ازاى البساتم ديه بتتحرك و من اين تستمد قوة الحركة بتاعتها لضغط الزيت

إن شاء الله

نبقى نعمل موضوع مبسط عن التشريح الداخلى لماستر الفرامل الرئيسى فى القسم التعليمى بالمنتدى

فى أقرب وقت .....وقريب بأذن الله

لأنه دقيق وحساس فى طريقة عمله

وعاوز تركيز صح

وبأذن الله نعمل الموضوع ده

رد: سؤال بخصوص ماستر الفرامل

متشكر يا هندسة على اهتمامك و متابعتك و لو ممكن شرح مبسط عن فكرة عمله على ما حضرتك تجهز الموضوع الكبير علشان انا محتار و خايف ارجع الماستر اللى انا جبته و ترجع المشكلة تانى فعشان كده انا عايز اعرف فكرته علشان اكون متاكد من اللى عندى بقى مضبوط و سامحنى يا هندسة ان كنت دوشتك بس انا مؤمن ان كل عيب و له حل لو فهمنا طريقة عمله مش زى ما معظم الميكانيكيا شغالين على اى عيب يبقى تغيير و هما مش خسرانين حاجة ماهو الزبون هو اللى هايدفع