عمرة محرك لانسر 98 - أريد معرفة آرائكم بارك الله فيكم
 

السلام عليكم
دلوقتي ولله الحمد معايا لانسر 98 حالة ماتورها ممتازة ولله الحمد من ناحية السرعة والسحب مع التكيف وبدونه وهكذا
بس -ولله الحمد على كل حال- في الفترة الأخيرة لاقيتها بتقطع
روحت الميكانيكي ظبطلي شوية حاجات في التكايات والكاربيراتير
بعد فترة رجعت تقطع تاني فلما بصينا على البوجيهات لاقينا عليها زيت ( وفعلا لما غيرنا بوجيه واحد هو اللي كان مسبب الموضوع العربية رجعت زي الأول ولله الحمد) فالراجل الميكانيكي قاللي " المكنة خفيفة ومحتاجة عمرة .......... ولو عاوز تجيب لها بوجيهات سن قصير ماشي بس ده مسكنات مش علاج "


1-إيه رأيكم ؟؟
أمشي في موضوع العمرة ده ؟؟
ولا أبيعها وهي بحالتها دي ( بالمسكنات ) وخلاص ، وأجيب غيرها ( ممكن لانسر برده 98 لأني بحب الموديل ده أو ممكن أشوف حاجة على زيرو ) ؟؟

2- وإيه رأيكم في بنيتو المكيانيكي اليوناني ( قرب ميدان الخرطوم بالإسكندرية ) ؟؟

3- لما هخبر المشتري بموضوع عمرة الماتوور ده هل هينزل سعرها كتير ؟؟

جزاكم الله خيرا

** لو الموضوع مش مناسب في القسم يمكنكم نقله الى أكتر الأقسام ملائمة

رد: لانسر 98 - أريد معرفة آرائكم بارك الله فيكم
 

نعم بالفعل

فمكان الموضوع هو قسم الصيانه الميكانيكيه الفرعى من منتدى الصيانه

عموما سأرد عليك إلى أن يتم نقل الموضوع

أنا شايفك بتقول سحب العربيه ممتاز

أذا المشكله الحاليه ( الخاصه بتقطيع الحريق والتنتيش بسبب غياب شرارة أحد

البوجيهات ) قد تكون مشكله تتطلب صيانه بسيطه

مثل حل وش السلندر وتغيير كاوتش الصبابات

لأن تقريبا الكاوتش بدأ عندك يتعب شويه وينشف وبحاجه للتغيير

عموما طالما

لايوجد نفخ من مقاس الزيت أو من خلال خط فائظ المكنه

فالعيب هو كاوتش الصباب

وعلاج هذا سهل وغير مكلف كثيرا

1- الميكانيكى حيحل وش السلندر علشان يغيرلك كاوتش الصبابات ويعملك روديه بالمره

2- حتنظف مجارى التبريد ببلوك المكنه والرأس محلوله (لرفع كفاءة عملية التبريد )

3- حتغير جوان وش السلندر بآخر جديد وتظبط تاكيهات المكنه

وبأذن الله ستجد وضعا مختلف عن الوضع الحالى تماما

____________________

وعن رأيى فى موضوع بيع السياره

أنا أرى أن هذا قرار متسرع بعض الشىء

لسبب بسيط جدا

هل تضمن عندما تبيع السياره وتشترى كريستاله أيضا وأستعمال

أن تكون حالتها أفضل من حالة السياره التى بحوزتك حاليا

أعتقد الأجابه معروفه .............وهى بلا

إذا التعامل مع سيارتك الحاليه

من جهة تنفيذ ماتتطلبه من أعمال صيانات

أفضل كثيرا كناحيه منطقيه

رد: عمرة محرك لانسر 98 - أريد معرفة آرائكم بارك الله فيكم
 

السلام عليكم
ربنا يرفع قدرك يا باشمهندس سمير
بعد ازنك المشكلة دي عن واحد صحبي برده وانا نفسي بجد اساعده علشان الميكانيكية بهدلوه
هنا المشكلة دخول زيت من عند عمود التكايات لغرفة الحريق فبيعزل البوجيه صح؟
ليه حضرتك مقولتش ان فعلا ان الزيت بيهرب من الشنابر بتاعت البستون وغير كدا مفيش دخانه بيضه بتخرج من الشكمان ..علشان كمية الزيت قليلة؟؟
ارجو الافادة من حضرتك وجزاك الله خيرا

رد: عمرة محرك لانسر 98 - أريد معرفة آرائكم بارك الله فيكم
 

جزاك الله خيرا أخي على سرعة التفاعل .. جعله الله في ميزان حسناتك
المشكلة أخي سمير إنها مش أعمال منطقية .. دي عَمــــــــــــــــرة للماتور :) .. وهتطلب منّي من ألف لألفين ونص .. المشكلة مش في الفلوس .. لكن بوازن أيهما أفضل مش أكتر ( التصليح أم البيع ) ..
وبعدين هي دلوقتي شغالة كويس ولله الحمد والمنّة ... فهل ممكن أسيبها من غير ما أوجع دماغي وخلاص ؟؟
...............
معلش إستحملني .. هو كاوتش الصباب ده اللي هو جوان غطا التكايات ؟؟ (أصل أخوك خبير ميكانيكا :) )
...........
أخي إسلام وعليك السلام ورحمة الله وبركاته
هو موضوع لون العادم ده أبص عليه إمتى بالظبط ؟؟ يعني الصبح أول ما أدور ولا بعد ما السيارة تسخن ولا إيه ؟؟
الفترة دي أنا لاحظت فعلا وجود نقص في الزيت في العربية حتى لدرجة إن اللمبة نورت ولسة فاضل على موعد تغيير الزيت حوالي 500 كيلو
.............
جزاكما الله خيرا ..

رد: عمرة محرك لانسر 98 - أريد معرفة آرائكم بارك الله فيكم
 

إن شاء الله

سنستفيض حول هذا الموضوع آخر اليوم

نظرا لنزولى الآن لعملى

فعزرا لبعض من الوقت

وإلى لقاء لتوضيح الأمور بأستفاضه

رد: عمرة محرك لانسر 98 - أريد معرفة آرائكم بارك الله فيكم
 

في إنتظارك أخانا الكريم
يسّر الله لك أمرك ..

رد: عمرة محرك لانسر 98 - أريد معرفة آرائكم بارك الله فيكم
 

حنحاول مع بعض نلخص الأمر ده دون الأسهاب الكتير فى الكلام

طالما فيه بوجيه بيعرق زيت

يبقى غرفة الحريق بتاعة البوجيه ده بيخشلها زيت من أحد أتجاهين

1- من خلال كاوتش الصباب من أعلى ( منطقة حوض التاكيهات )

2- شنبر زيت الغرفه دى بأه معيب وبيدخلها زيت وبيلوث البوجيه

طيب

نفرق أزاى بين الوضعين علشان نشتغل على نور

لو المكنه كانت بتاكل زيت كتير وبنلاقى الشكمان بيطلع دخان كثيف ومائل للزرقه

ومعدل أستهلاك الزيت كتير بدرجه ملفته للنظر

يبقى نشك بقوه فى حدوث تلف لشنبر زيت الغرفه دى

طيب

نفترض أن مفيش دخنه من الشكمان وشكل العادم عادى جدا ومعدل أستهلاك الزيت يكاد يكون غير ملحوظ

يبقى على طول نشك أن كاوتش الصباب هو السبب فى تلوث هذا البوجيه بالزيت

وممكن نحاول نرفع صوره لأيضاح دور كاوتش أو سيل الصباب فى عملية الحبك

من أعلى لمنع دخول زيت لأسفل

وجارى تجهيز صوره لأى محرك

كنوع من أخذ الفكره عن مكان ودور سيل الصباب فى محركات الأحتراق الداخلى

سواء كانت محركات بنزين أو محركات ديزل