مركز خدمة محمد زكى - القطامية
 

تحية كبيرة لكل أصحاب الكيا فى مصر موتورز
أنا عضو جديد و لسة مشترى كيا كارينز وكيل ، و كنت عاوز اسأل عن مركز خدمة محمد زكى - القطامية لانى حاعمل صيانة ال1000 ك و لما كلمت خدمة العملاء للحجز خيرونى بين مركز الوكيل فى ابورواش و بين محمد زكى فى القطامية و اخترت الثانى علشان الميعاد اقرب ( يوم الاحد بعد بكرة)
افيدونى المركز دة كويس ولا اية؟ من حيث الخدمة و المواعيد ؟
و لا استنى الميعاد بتاع ابو رواش على اساس انة بتاع الوكيل

رد: مركز خدمة محمد زكى - القطامية
 

السلام عليكم
اولا مبروك على السياره وربنا يحميهالك ويديبك خيرها ويكفيك شرها
ثانيا محمد زكي بيركبلك قطع اصليه وخدمه زي التوكيل بالضبط والمكان رايق بكتير بالنسبه لابو رواش وممكن تتعرف على المهندس الي هناك وتطلب تخفيض على المصنعيات لو هتكون عميل دائم ليهم.
بس في الاول اتاكد من سعر المصنعيات في الساعه بين هنا وهناك . وتتاكد بالتليفون ان كل قطع الغيار الي هتحتاجها موجوده بدل ما تروح ويقولولك هتنتظر ساعتين لما يجيبوهالك من ابو رواش

رد: مركز خدمة محمد زكى - القطامية
 

الله يبارك فيك يا استاذ شاروو و شكرا على الرد و على ذوقك ،
و ان شاء الله بعد عمل الصيانة حاكتب عن مستوى الخدمة و المعاملة علشان الكل يستفيد .

رد: مركز خدمة محمد زكى - القطامية
 

مركز الخدمه فى القطاميه هو فرع للوكيل ... محمد زكى صاحب المكان و عنده معرض هناك و الوكبل مستأجر للمكان لعمل مركز صيانه ... يعنى قطع الغيارو الاسعار فى القطاميه زى ابورواش ...

رد: مركز خدمة محمد زكى - القطامية
 

طيب والزحمه اخبارها ايه ياباشا؟؟

رد: مركز خدمة محمد زكى - القطامية
 

لو حجزت أول ميعاد وكنت هناك 7 ونص الصبح حتلاقي الدنيا هادية والعربية حتطلع بدري
عموما لو حضرتك عيز حاجة من هناك بلغني وإن شاء الله اقدر اقدم ليك المساعدة

رد: مركز خدمة محمد زكى - القطامية
 

تمت الصيانة و الحمد لله ، والامور تمت كالاتى:
1/ وصلت هناك الساعة 10 ص و قام المهندس باستلام السيارة بس ما دخلتش المركز الا فى الساعة 11.30 يعنى بعد ساعة و نصف و دة تم مع كل الناس لان ببساطة الورشة لا تتسع الا لعدد محدد ، يعنى هما بيستلموا السيارة و تاخد دورها فى الدخول ، و مافهمتش اية لازمة الحجز المسبق و ميعاد الحجز .

2/ المهندس حدد لى الساعة الواحدة و النصف لاستلام السيارة و بالفعل و بالتحديد فى تمام الواحدة و النصف لقيت عربيتى جاهزة للاستلام و دى حاجة رائعة جدا : الالتزام بالموعد.

3/ الوكيل هو اللى بيدير المركز بمعنى ان الوكيل مستأجر للبدروم و الورشة من محمد زكى صاحب المعرض و بالتالى الاسعار ثابتة زى ابو رواش و روكسى و زى ما قال الاستاذ محمد سليم .

4/ المركز علية ضغط كبير من العملاء بس الكل كان بيستلم فى المواعيد المحددة و بدون تأخير المشكلة انهم بيستلموا السيارات و يسيبوها شوية فى الشارع عقبال ما تدخل الورشة .

5/ الكافيتريا صغيرة جدا على العدد الموجود ، و ما فيش امكانية تتابع سيارتك وهى فى الصيانة زى المراكز التانية.