|
شيء مستفز اوووووووووي!!
ياجماعه كتير مننا سواء بايكر او قائد سياره بيتعرض لموقف يستفزه جدا سواء حد خبطه او كسر عليه او رخم عليه او كده يعني
كل واحد فينا يقول الموقف الاستفزازي اللي حصله في الطريق.؟ ورد فعله كان عامل ازاي؟ ولو قابلك موقف زي ده تاني هتعمل ايه.؟ |
رد: شيء مستفز اوووووووووي!!
أسخف موقف حصل معايا كان من زمااااااااااان
كان عندى 18 أو 19 سنة و كنت واقف تحت بيت واحد صاحبى مستنيه ينزل و كان الشارع فاضى خالص و مفبش حتى عربيات راكنة قام واحد جه و وقف ورايا بالظبط و بعدين قعد يزمر لى فى اﻷول مكنتش واخد بالى إنه بيزمر لى و طنشته لكن إستمراره فى التزمير خلانى أدقق فى المرايا لقيته بيشاورلى إنى أطلع لقدام المهم دورت العربية و طلعت لقدام شوية راح راكن مكانى و نزل من العربية و قفلها فانا استغربت هو عمل كده ليه فسألته ... فيه حاجة ؟ قالى بكل برود أه أصل ده مكانى و متعود أركن هنا !!!!!! رغم إن الشارع كله كان فاضى !! طبعا هو كان راجل كبير و أنا كنت عيل صغير فاتحرجت منه و سكت و انا هطق من الغيظ ربنا يرحمنا من ذوى الدم البارد |
رد: شيء مستفز اوووووووووي!!
أغبى وأرزل موقف ببيحصلى لما أبقى ماشى بسرعة فى شوارع المطرية الكريمة بالليل وفجأة الاقى العربية بتطير وكل حاجة فيها من جوه طايرة فى الهواء وأنا من ضمنها, وبعدين دبببببببب, مطب يامعلم ولا المقطم, ببقى حاسس أن العربية خلاص نزلت على الجنط والكاوتش هوى وبتحصل معايا بدرجة غبية جدا كأن المطب بيبقى مش موجود وماتعرفش مكانه غير لما تطييييير.
ومرة فى مدينة نصر ماشى بسرعة فى شارع خلفى, والساعة 7 صباحا والحياة جميلة, وقدااام فيه تقاطع صغير وعلى ناصيته الشمال صندوق زبالة, وأن ماشى بسرعة وقبل صندوق الزبالة ب5 سم كنت بفادى عربية حادفة لبره على اليمين, وهوب أقوم واخد مطب متخفى على60 والدركسيون مكسور للشمال وصندوق الزبالة على شمالى, ومرة اللحظات طويلة كالزمن كله وأنا أتخيل اللى هيحصل للقوايم والزجاج وليا, وهعمل أيه فى العربية الغلبانة, ومرت يد الصندوق بجانبى وهى تريد السلام لكنى وبحمد الله طنشتها وهى طنشتنى أنا والعربية, ده أغبى موقف أتعرضتله ولسه بتعرضله, لأن المطب وصندوق الزبالة لسه فى مكانهم ولازم كل ما أعدى مالحتة دى, أطييييير. بس اللى بيتعمل فينا بيطلع على الناس برضه. دى أنا شايف أنها أسخف وأرذل حاجة بتحصلى لكن طبعا بتحصل حاجات تانية مستفزة بتحصل مع ناس كتير فلا داعى لذكرها. |
رد: شيء مستفز اوووووووووي!!
كان معايا عربيه 128 وكانت اول عربيه اشتريها وبعد سنه قلت اشتريلها غطا وغطيتها اول يوم ونزلت الصبح شيلت الغطا لقيت الازاز مكسور والكاسيت بالسماعات مسروق
وصلحت الازاز وجيبت كاسيت تانى ومرضيتش اغطيها وبعد حوالى اكتر من شهرين قلت اغطيها ونزلت الصبح اشيل الغطا لقيت الازاز مكسور والكاسيت بالسماعات مسروقين رحت رامى الغطا فى الشارع ومغطيتش اى عربيه اشتريتها لحد دلوقتى |
رد: شيء مستفز اوووووووووي!!
واحد يجي عايز يركن الموتسكل بتاعي بشكل مختلف عشان يركن ويزنق عربيته جمبي في الشارع وهو مالوش ركن لان ده ممنوع امام الصيدليه (قطاع خدمي) وساعات قدام باب الصيدليه . ومره واحد لمحته بيحل الاستك الخطاف من علي الموتسكل ساعات بربط بيه اي شيء ورايا . في موقف زي ده واحد بيسرقك عيني عينك تعمله فيه ايه؟
|
رد: شيء مستفز اوووووووووي!!
احكيلكم على موقف حصل بس مش معايا حصل وانا راكب مع سواق تاكسى وتاكسى ورانا عمال كلاكسات وانوار والموقف كالتالى الشارع حارتين وزحمة واحنا ماشيين فى الاول انا افتكرت السواق اللى ورانا صاحب السواق اللى راكب معاه وبلكن هنا المفاجاءة جه جنبه بيقوله مش عمالى انورلك واديك كلاكسات ماوسعتش ليه قاله اوسع فين اطير يعنى قام قاله خد جنب يمين وعدينى بصراحة كنت عاوز اشتمه واقوله ......
|
رد: شيء مستفز اوووووووووي!!
السلام عليكم
انا لسه متعلم السواقه من قريب وحصل معايا موقف غريب جدا كنت فى الفجالة من يومين ودخلت دخله غلط المهم جيت الف من شارع جانبى لقيت العربيات فى الشارع الرايسى جاية بسرعه اوى وطبعا معرفتش اعدى ومكنتش عارف ليه ماشية بسرعة كده المهم كان ورايا تاكسى وطبعا خرم ودانى من الكلكس بتاعه المهم رحت واخد يمين اوى وسبته يعدى قلت اما اشوفه هيعمل ايه المهم هو جيه جمبى وبصلى بصه صعبه اوى مش عارف اقولهالكو ازاى المهم واستنا عربية جاية متاخرة شويه وراح مادد بوزه بطريقه غبية اوى واتلقيته بيقولى تبقا عدى كده فهمت وفجاه لقيت الاشارة راحت قافله وراح راشق فى العربية الى قدامه زى الحلو وساعتها عرفت هما كانو بيمشو بسرعة كدا ليه وكفايه كده علشان مطولش عليكو |
| الساعة الآن 09:42 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017