لمبه الحراره
 

معايا بولو99 امبارح لقيت لمبه الحراره بتنور وتطفى بس بالرغم من كل ده درجه حراره العربيه ثابته وفى مكانها الطبيعى..قلت جايز الامبير بيخرف ولا حاجه فتحت العربيه لقيت العربيه مش سخنه اووى وحرارتها مظبوطه فلما زودتها ميه العلامه بتختفى.
الموضوع ده بيتكرر معايا كتير اووى ياجماعه ومخلينى قلقان لانى بزود ميه للعربيه كل 5 او6 ايام.
للعلم العربيه انجكشن مش كرابيتير

رد: لمبه الحراره
 

رد: لمبه الحراره
 

اولا العداد فيه مشكلة لان المفروض اللمبة تنور لما المؤشر يرفع
ثانيا ما هى كمية الميه الى بتتطر تزودها كل 5 الى 6 ايام؟ و هل اللمبة بعدها بتفضل مطفيه يومين على الاقل لغاية لما الميه تبتدى تنقص تانى؟

رد: لمبه الحراره
 

أستاذ احمد بالنسبه للنقطه الاولى لما سألت ناس على الموضوع بتاع الحراره قالوا مش شرط امبير الحراره يعلى علشان لمبه الحراره تنور..والله اعلم

بالنسبه للسؤال التانى..حوالى نص لتر او اكتر شويه..واللمبه فعلا بتفصل بعد ما بزود الميه وبتنور تانى بعدها بحوالى 4 او 5 ايام لغايه لم ازود.

رد: لمبه الحراره
 

انا مكنتش اعرف حكاية اللمبة دى .... يبقى كده بتفرق من ماركة لماركة
اما بالنسبة لكمية الميه فدى كتيره معنى كده ان عندك يا تسريب خارجى و ده سهل و حيبقى زى ما قال المهندس احمد فى مشاركته رقم 2 و احب اضيف عليه غطاء القربة او غطاء الرادياتير (علشان مش عارف البولو) عليه عامل كبير فى نقصان المياه + سربنتينة السخان الى وراء التابلوه و دى احتمال تبان على هيئة تجمع رطوبة او ميه فى الفرش الى تحت التابلوه + مضخة الميه
يا تسريب داخلى و ده صعب :
1- جوان وش السيلندر
2- شرخ بالبلوك

رد: لمبه الحراره
 

شكرا يابشمهندس على ردك الوافى ده..بس انا عندى سؤالين اعرف منين ان المشكله من جوان وش السلندر
والسؤال التانى يعنى ايه شرخ بالبلوك

معلش هتعب حضرتك معايا.
وكل سنه وحضرتك طيب

رد: لمبه الحراره
 

و حضرتك بالصحة و السلامة
ان شاء الله حتطلع المشكلة الحاجات البسيطة الى ذكرت فى الاول فلازم نستبعدها قبل ما نشك فى تسريب داخلى

جوان وش السيلندر ده وظيفته الاحكام الجيد و العزل ما بين حاجات كتير جنب بعض فى السطح الفاصل ما بين جسم الماتور الرئيسى (البلوك) و وش السيلندر الى فوق (من اول البوجيهات وطالع لفوق) و السطح ده لو تخيلته حيبقى فى 4 دواير (4 سيلندر- جواهم بيحصل الحرق) حواليهم اقواس (شمايز الميه - بيمشى فيهم ميه) و فى دواير صغيرة بتاعة الزيت سواء خط الضغط او الراجع
فمما سبق على حسب منطقة التلف فى الجوان و ايضا فى ممكن تلف فى سطح وش السيلندر نفسه يوئدى لتلف الجوان
لو افترضنا ان التلف ما بين مسار زيت و مجرى ميه بتاع شميز يبقى الميه حتدخل على الزيت و دى حتكون طحينة فى الزيت
لو افترضنا ان التلف بين مجرى الميه فى قوس الميه (الشميز) و احد السيلندرات يبقى ممكن يحصل حاجتين .... الميه تعدى للسيلندر (فى شوط السحب) و تدخل تتحرق و ممكن نواتج الحرق تنفخ فى دورة الميه ( فى شوط الكبس) بس دى مش عندك لان دى حتخلى حاجة تضرب فى دورة الميه نتيجة للنفخ الجامد من السيلندر لدورة الميه
اما شرخ البلوك فلو افترضنا انه مشروخ ما بين سيلندر و شميز ميه يبقى برضه الميه حتهرب و تخش السيلندر تتحرق

ارجع اقول انا مش عايز اخضطك لازم نبتدى من الاسهل فالاصعب
و من وصف حضرتك للمشكلة ان شاء الله حتطلع تسريب خارجى لانك مشتكيتش من دخان او طحينة فى الزيت او حاجة ضربت فى دورة الميه
فان شاء الله حتبقى محصورة فى :
1- غطاء الرادياتير او القربة
2- الرادياتير او خزنة الرادياتير (ان وجدت) او الخراطيم
3- القربة نفسها
4- سربنتينة السخان الى ورا التابلوه
5- مضخة الميه