|
فيرنا تاكسى دلوني يأهل الخبره
السلام عليكم ورحمه الله احب اعرفكم بنفسي الاول " انا اسمي سامح " ودخلت المنتدي بتاعكم بصراحه لاني محتاج معلومات ولقيت المنتدي ده بالظبط بيتكلم عن اللي عايز اسأل عليه .... ممكن ادخل في الموضوع .. انا عندي عربيه تاكس وقديمه وزي مانتو عارفين ان الاحلال شغال يعني " اجيب عربيه جديده اعملها تاكس " المهم انا بقي محتار جدا وعايز اجيب عربيه اولا مش غاليه ثانيا عمليه ثالثا قطع غيارها موجوده بسعر كويس فا كنت بقارن بين كذا عربيه وفي الاخر عايز اختار بين اللانوس والفيرنا والنسب يمكن اقرب الي الفيرنا المصري مش الفيفا وعايز حد يقولي عيوبها قبل مميزاتها عشان بجد محتااااااااااااااااار انا روحت كذا معرض وعند التعاقد احس اني متردد انا اينعم هجيبها قسط لكن هحط تحويشه العمر مقدم والنبي حد يدلني احسن خايف اغرق انا اصلي مكانش ليا في العربيات خالص ههههههه بالمناسبه انا خريج آداب وبشتغل سواق تاكس علي ما تفرج والنبي حد يدلني بقي وبأسرع ما يمكن لو سمحتم ولكم مني الف الف الف شكرررررر |
رد: دلوني يأهل الخبره
لو في حد عنده فكره عربيه تانيه غير اللانوس والفيرنا يقولهالي بس ياريت يقولي ليه
|
رد: دلوني يأهل الخبره
أولأ أهلا و سهلا بيك يا أ / سامح و ربنا يكرمك ان شاء الله و يوسع عليك أنا رأيي انك تستشير افضل مالكين السيارات التاكسي لأن متطلبات التاكسي غير متطلبات الملاكي و ممكن تسال في المدن الساحلية التاكسي هناك احدث و كمان كتير منه متحول غاز |
رد: دلوني يأهل الخبره
ياريت تدور على شاهين استعمال خفيف لانو انا سمعت ان مفيش جديد منها حاليا
|
رد: دلوني يأهل الخبره
أهلا بيك يا سامح في مصر موتورز
بص يت باشا أهم حاجة يكون فيه أكتر من ميكانيكي شاطر شغال في العربيه عشان التوكيل مهما كان كويس مش حيصد معاك فترة طويلة ده بيختلف من منطقه للتانية و من محافظة للتانيه طبعا اللانوس الأقرب و خصوصا بعد اعادة انتاجها من منصور تحت اسم شيفروليه بعدها الفيرنا |
رد: دلوني يأهل الخبره
الف الف الف شكر للردوود
|
رد: دلوني يأهل الخبره
اقتباس:
اهلا بيك يا سامح فى مصر موتورز وربنا يوفقك فى اختيارك للعربية المناسبة ويملاهالك بركة يارب بص يا سيدى انت قلقان طبعا ومعاك حق تقلق لان ديه عربية اكل عيش بس علشان تطمن محتاج انك تعمل مجهود شوية زيادة هتعمل ورقة لكل عربية (يعنى الفيرنا ورقة والانوس ورقة ) وكل ورقة تحط فيها الاتى - سعر العربية (الاجمالى) - حساب فترة الضمان (تكاليف الصيانات الدورية واسعار قطع الغيار فى الوكيل) ديه تجيبها من حد معاه العربية اللى انت عايزها او مشوار لمركز من مراكز الخدمة يكون افضل وتسمع من الناس بنفسك مشاكل العربية - اسعار قطع الغيار المستهلكة (اسعار برة الوكيل) يعنى رفارف كبوت شبكة فوانيس بوجيهات فلاتر اسلاك سيور تيل طنابير مساعدين سوست مقصات كبالن الخ الخ وديه تجيبها من المحلات العادية تنزل مثلا التوفيقية وشارع دمشق - متوسط معدل استهلاك البنزين + نسبة القوة للوزن وديه بتبقى مكتوبة فى كاتلوج العربية ونسبة القوة للوزن بنحسبها بقسمة الهورس باور على وزن العربية ومنها هيبان لك بشكل اوضح اذا كانت العربية هتستهلك بنزين اكتر مع التحميل ولا لاء - ملخص تجارب الناس مع العربية عيوب ومميزات مثلا هتلاقى ان الفيرنا فيها عيوب تقفيل فى اكسسوارات الصالون الانوس هتلاقى عيوب اكتر فى من ارتفاع العربية وهبوطها مع التحميل وبمقارنة احتمالات العيوب ديه مع بعضها تقدر تحدد ايه العيوب المقبولة وايه اللى صعب تقبلها مع التشغيل الاستهلاكى زى فى التاكسى وبس املا الورقة ديه لكل عربية فى ميزانيتك وحطتهم قدام بعض هتلاقى القرار فى انهى عربية اقتصادية فى التشغيل اسهل بكتير راى الشخصى الفيرنا افضل وعامة العربية اللى عفشتها انشف افضل كتاكسى وكاستخدام شاق من العربيات اللى عفشتها ناعمة كمان العربية اللى عزمها اعلى افضل كتاكسى وكقدرة اكبر على السير باحمال من الاقل فى العزم والسببين دول يخلونى افضل الفيرنا عن الانوس نصيحة لاخ حاول تدبق فلوس باى طريقة زى الجمعيات مثلا وتجيب حاجة من الاتنين دول كسر زيرو او استعمال خفيف وتوفر 5- 10 الاف جنية من تمنها وتبعد عن البنوك والفوائد وقرفها اسف للاطالة واتمنالك كل التوفيق فى اختيارك |
| الساعة الآن 07:41 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017