|
محتار ما بين هوندا سيتي و هوندا سيفيك
ياجماعه انا محتار جدا اشترى ايه بجد خلاص هتجنن
والاصحاب كل واحد برأى ومش عارف مين فيهم الصح ؟؟؟؟؟؟ بصوا المبلغ المتاح حوالى 150 الف مش عارف اجيب هوندا سيتى ولا سيفيك ولا لانسر شارك ولا تيريوس ولا مازدا 3 وفيه قدامى فولكس جيتا انا عايز اعرف اى واحده فيهم تنفع ليا لان خبرتى ع قدى مش اوى ياعنى انا بحب الشد جدا وبرضه عايز عربيه ثابته وتنفع لمطبات مصر العجيبه ياريت حد يساعدنى بجد مايبقاش زى الاصحاب اللى بيلخبطوا الواحد وكل واحد فيهم براى -خالد |
رد: محتار محتار محتار ...حراااااااام حد يساعدنى بجد
بص ياعزيزى انا لو معايا المبلغ ده هاشترى السفيك بدون تردد عربيه رائعه وثابته وموتور قوى متطور وكماليات عديده
من الاخر عربيه يابانى بنكهه اوروبيه عيبها الوجيد واطيه شويه |
رد: محتار محتار محتار ...حراااااااام حد يساعدنى بجد
تمام بس هيا واطيه جدا وانت عارف بقى مطبات مصر
طب مافيش حل ليها ولا ايه |
رد: محتار محتار محتار ...حراااااااام حد يساعدنى بجد
أنا هقول رأيى:-
التيريوس مش عربية شد, ومعمولة علشان ال off roading فلذالك ثباتها على الطريق مش هيبقى عالى ولاسرعتها هتبقى عالية. هوندا سيفيك عربية خطيرة, وثابتة وفخمة جدا فى الكماليات والشكل, بس تقيلة على الموتور ال 1.6 بس تنفع برضه للشد. ومينفعش تقارن هوندا سيتى بسيفيك, السيفيك تكسب. ال جيتا عربية ألمانى, قوية وثابتة جدا, وفخمة وتنفع لكل حاجة. المازدا 3 عربية جامدة جدا, موتور قوى وكماليات رائعة وتصميم داخلى وخارجى متميز, ودى أكثر واحدة بميل ليها. ومن رأيى أختياراتك بالترتيب هى مازدا 4 وجيتا ثم سيفيك, بس المازدا هتديك أحسن قيمة للفلوس اللى هتدفع فيها. وموضوع عربية عالية ده بصراحة متفكرش فيه خالص, لأن أنا ممكن أقولك ال 128 عالية ومش هتحك, وهو مش موضوع مهم للدرجة دى ومالوش أى دور فى أختيار العربية المناسبة. والمازدا والسيفيك والجيتا الثلاثة ثابتين, وبيجروا وكماليات وشكل كويس جدا, بس الجيتا تقيلة فتسارعها بطئ, والسيفيك منتشرة وكبيرة (حجما) قوى على طرقنا, والمازدا توكيلها غبور بصراحة بيستعبط ومش مهتم بيها قوى فقطع غيارها غالية. وأنزل عند سمير ريان أو المصرية للسيارات أتفرج, وأفتح العربيات و "فلى" فيهم براحتك, وتمهل فى أتخاذ القرار علشان تعرف كل الأختيارات وتختار الأحسن بالنسبالك. وبالتوفيق. |
رد: محتار محتار محتار ...حراااااااام حد يساعدنى بجد
هههههه انت لخبطتنى اكتر هههههههه
المهم هوا دلوقتى المقارنه بين السيفيك والجيتا والمازدا الصراحه انا مايل للسيفيك أكتر والمشكله انى بتقهر لما العربيه تحف ف مطب :( وكمان ناس خوفتنى م انها واطيه اوى وهل ممكن اعليها وازاى ؟؟ وهل ده بياثر عليها باى شكل والمازدا ... انت خوفتنى اوى م قطع الغيار دى وبالنسبه للشارك حضرتك ما قولتش رايك فيها هل فيها عيوب ولا ايه نظامها ولو حد عنده اى ااقتراح تانى يقوله علشان الواحد خايف يجيب حاجه ويندم عليها |
رد: محتار محتار محتار ...حراااااااام حد يساعدنى بجد
أنا نسيت الشارك فعلا, الشارك موتورها ضعيف, و تصميمها من جوه غير مريح, وبصراحة بحس أن التوكيل منزلها عربية لعبة, الشارك متتركبش الا لو evo غير كده برضه متنفعش تتقارن بالباقى, رغم شكلها الهجومى المميز.
صدقنى حكاية المطبات دى مالهاش أى لازمة, والعربية مبتضرش من المطب, ومعظم العربيات الجديدة بتبقى مدعمة من تحت بصفيحة حديد تحت الموتور وعند تانك البنزين علشان الحكات (معظمها) وفيه حلول لتعلية العربيات, بس منصحش بيها لعربية جديدة أبدا, والوطى ده ميزة لأنه بيقرب العربية من الأرض وبيخليها ثابتة على السرعات العالية, بس تعمل أيه فى شوارع جهنم. ومتخليش الحكاية دى تأثر على أختيارك, ولو لسه مصمم عندك التيريوس تنفع للشوارع المهببة بتاعتنا, بس زى ماقلت شكلها وموتورها المصمم للعزم مابيدوهاش سرعة عالية ولا ثبات. والمازدا غبور لسه فاتح أول مركز صيانة وخدمة ليها من قريب, بس عربية تحفة, وأفتكر أن المازدا هى اللى بتختارك:). والسيفيك عربية خطيرة, وبصراحة مالكش دعوة برأى الناس, مش هما اللى هيدفعوا, شوف المقارنات والريفيوهات عنها فى المنتدى وهل تنفع لطريقتك فى السواقة ولا لأ. وزى ماقلت, المياه تكدب الغطاس, معارض السيارات تقدر تفحص العربية براحتك, ده كفاية دخلتك عليهم وأنت بتقلوهم عايز أشوف السيفيك (شغل أتفضل ياباشا والكلام ده). |
رد: محتار محتار محتار ...حراااااااام حد يساعدنى بجد
ههههههه فعلا شوارع جهنم
بس ايه الروعه دى انت اقنعتنى هههههههههه بجد طريقه عجيبه ف الرد بتقنع بسرعه اوى :) وان شاء الله اروح اتفرج ع السيفيك والمازدا وربنا يسهل |
| الساعة الآن 03:42 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017