|
موضوع هام عن الجنوط.....برجاء الرد
السلام عليكم
انا يا جماعة معايا فيرنا 2007 و ناوى ان شاء الله اجنطها وعايز اجيب جنوط 15 وسألت ناس كتير وقريت كلام كتير على النت وشوفت طريقة حساب قطر الجنط دى وتمام لقيت المناسب بالنسبالى جنط 15 ص كاوتش 195/50 وانا عموما سألت الميكانيكى بتاعى على موضوع الجنط ال 15 ده قالى مفيش مشاكل وحاعمل رينجات ومفيش مشاكل ان شاء الله على العفشة لكن انا فى كلام سمعته مخوفنى على حوار سمك الكاوتش ان 195/50 ده بيقولو والله واعلم ان كدة رفيع والكاوتش الرفيع بيخليك تحس بالمطبات قوى و باقل طوبه فى الشارع وطبعا دى حاة مش كويسة ابدا بالنسبالى سؤالى بسيط هل جنط 15 على كاوتش 195/50 افضل ولا جنط 14 على كاوتش 185/60 ده من حيث الثبات والاحساس بالمطبات والتأثير على العفشة ولو انا مليت العجل نيتروجين فى حالة ال 195/50 هل دة حيقلل من احساسى بالمطبات ونوع النيكسين فى الكوتش اللى هوا نقشة الشجرة دة كويس ولا بيزحف برجاء الرد من اصحاب الخبرة ويا ريت لو حد عنده تجربة مع الفيرنا فى حوار الجنوط دة يقولهالى وشكرا |
رد: موضوع هام عن الجنوط.....برجاء الرد
أنا مش خبير, بس أنا أعرف أن الكاوتش العريض هو اللى بيزود أحساسك بالطريق ومشاكله مش العكس.
والكاوتش الأعرض هيديلك ثبات عالى لكن هيحسسك بالطريق على عكس الكاوتش الرفيع تماما. والناس بتتشائم من نقشة الشجرة ومبتفضلهاش علشان مش بنفس جودة وثبات النقشات العادية, مبتمسكش فى الطريق كويس وكمان بيبقى مصمم للطرق اللى عليها مياه علشان يخرج المياه من تحت الأطار عن طريق النقشة بتاعته. وال 15 أفضل لو بتدور على أقصى ثبات, وال 14 هيديك تحسن فى الثبات عن الجنط الأصلى, مع المحافظة على الراحة, والعفشة هيتعبها وزن الجنط, لازم الجنط ميبقاش تقيل عن الأصلى وألا هتتعب عفشتك وموتورك. والنيتروجين فيه تجارب كتير للأعضاء معاه وده رابط لموضوع منهم http://www.masrmotors.com/vb/showthread.php?t=23143 |
رد: موضوع هام عن الجنوط.....برجاء الرد
اقتباس:
فى بس نقطة انت فاهمنى غلط فيها وهيا انا قصدى الرفع فى السمك مش الرفع فى العرض بس عموما انت جاوبت على اسئلتى كويس جدا وانا شاكر جدا ليك وفعلا انت مش اول حد يقولى موضوع نقشة الشجرة ده وانا خلاص ان شاء الله مش حاركبه بالنسبة لوزن الجنط ممكن تقولى الزيادة فى الوزن المسموح بيها ويا ريت تاخد فى الاعتبار ان عربيتى عاملة 70000 كم يعنى العفشة مش جديدة اى نعم انا محافظ عليها بس برضه اكيد مش زى الجديد اكون شاكر ليك جدا لو جاوبتنى والف شكر على ردك يا باشا |
رد: موضوع هام عن الجنوط.....برجاء الرد
أنا متشكر قوى على زوق حضرتك, وأنا بقول اللى أعرفه مش أكثر:)
لو قصد حضرتك على سمك الكاوتش من بره, فدى فعلا هتفرق فى طرقنا الجميلة لأن كل ماسمك الكاوتش قل كل ما الجنط قرب من الأرض, وده معناها أن الجنط نفسه ممكن ينثنى لاقدر الله لو خد حفرة جامدة, ولو فيه نقص فى ضغط الهواء بتحصل نفس الحكاية لأن سمك الكاوتش قليل على عكس الجنط والكاوتش الأصلى اللى لو ضغط الكاوتش قل الجنط مالوش دعوة. ولذلك يفضل مساحة سطح الكاوتش على حجم الجنط, لأنها ترفع الثبات بدون الأضرار السابقة. أحنا متفقين أن الموتور هو اللى بيحرك الجنط, وطبعا كل ما الجنط ثقل كل ما أستجابة الموتور قلت وسرعة العربية قلت برضه, وتعب العفشة زاد, فالوزن بتاع الجنط ده حاجة نسبية, مفيش حد بتاع جنوط عند ميزان, أنت بتحاول تشوف فرق الوزن بين الجنط الجديد والأصلى بحيث متبقاش فيه زيادة كبيرة فى وزن الجنط الجديد عن القديم تتعب الموتور والعفشة. وده سبب أن أنواع الجنوط النضيفة زى bbs و enkei غالية جدا, مش علشان شكلها, لأ علشان مصنوعة من معادن خفيفة جدا وقوية. |
رد: موضوع هام عن الجنوط.....برجاء الرد
الموضوع بسيط اوى
ركب جنوط 15 خفيفه ( الومنيوم خفيف + ريش قليله ) عرضه 7 بوصه رمز ال ET بتاعه لا يقل عن 35 ودى اهم حاجه علشان الثبات ومتضرش العفشه ركب كاوتش 195\50\15 كومهو كورى رمز سرعه v 82 موديل (Kumho Ecsta SPT ( KU31 وطبعاٌ متنساش الرنجات وتبقى الومنيوم وتكون محكومه اوى ( بتركب كبس ) وتنفخ العجل على ضغط 30 علشان تستريح فى المطبات وطبعاٌ اهم ما فى الموضوع الترصيص ترصص على ماكينه كومبيوتر وتحط رصاص لصق جوه وبره طبعاٌ كل الكلام اللى قولتهولك عن تجربة مئات المرات وكل الانواع فكده بديلك الخلاصه جرب وادعيلى ومستنى رأيك وسلام مؤقت |
رد: موضوع هام عن الجنوط.....برجاء الرد
اقتباس:
عاش من شافك:) عندي ليك سؤال و ارجو الاجابه بعد اذنك بخصوص الجنوط برضه انا ركبت طقم جنوط تايلاندي و رصصت علي جهاز قديم (كان جهاز بمؤشر و شكله قديم) و رصصت الرصاص اللصق اللي بتقول عليه من جوه بس لاحظت ان العربيه فوق ال100 الدركسيون بيترج جامد قمت مركب رينجات و عملتها تيفلون و راكبه كبس زي ما حضرتك بتقول و جربت العربيه اصبحت الرجه اخف من الاول هل معني كده ان الترصيص كان وحش؟؟؟؟ فيه واحد صاحببي قالي ان الجهاز اللي رصصت عليه مش مضبوط و قديم و رصص عند واحد تاني بس خليه يحط رصاص عادي من جوه و بلاش اللزق دا هل الكلام دا صح؟؟ و هل لما ارصص الكاوتش تاني الغربله اللي في الدركسيون حتنتهي بأذن الله؟؟ معلش طولت عليك في الاسئله و كل عام و انتم بخير:) |
رد: موضوع هام عن الجنوط.....برجاء الرد
اقتباس:
تعيش يا قمر وآسف على الغيبه دى على البركه الجنوط الجديده بص اى رجه فى العربيه على اى سرعه وخاصه ما بين 80 الى 120 بعد تركيب الجنوط الجديده فده ترصيص ترصيص من هنا لبكره واوعى تعمل حاجه فى العفشه روح لحد عنده جهاز ترصيص كومبيوتر بشاشه تتش والصح انك ترصص لزق جوه وبره او تتفق مع بتاع الترصيص انه يرصص زى ما هوا عايز بس متحاسبوش الا لما تستلم منه نتيجه صح انا مشكلة حياتى الترصيص لان الجنوط الرياضيه حساسه اوى بالنسبه للترصيص وبالتوفيق وابقى طمنى عليك ولو احتجت اى حاجه اتصل بى فى اى وقت تحت امرك رقمى فى التوقيع |
| الساعة الآن 02:57 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017