|
ممكن أعرف الفرق بين الدايو اللانوس والنوبيرا ؟
السلام عليكم ورحمة الله وبركاته ممكن أعرف الفرق بين الدايو اللانوس والنوبيرا ؟ مع توضيح السعر لأخر الموديلات لهم ؟ وايه رايكم فى الدايو عامه ؟ لأنى محتاج اجيب عربيه كويسه وسعر يكون فى المتناول بس خايف لتكون فيها مشاكل - ويكون مجرد انتشارها لرخص سعرها ليس أكثر ..... |
رد: ممكن أعرف الفرق بين الدايو اللانوس والنوبيرا ؟
اولا الدايو حضرتك عربية ممتازة جداااا بس مشكلتها زي مشاكل الكوري انوا خفيف علي الارض في السرعات العالية
ثانيا مفيش دلوقتي دايو لانوس خالص الموجود شيفورلية لانوس ودي فيها 2 موديل مانيوال هاف اوبشن ودي بيكون فيها تكيف وباور وكاسيت ودي بسعر 63990 جم والموديل الثاني مانيوال فول اوبشن ودي بتكون فيها 4 زجاج كهرباء .مرايات كهرباء-سنتر لوك فوانيس شبورة اريال كهرباء ودي سعرها تقريبا 69000 الف والاسعار بتختلف من معرض لاخر اما النوبيرا بصراحة معرفش عنها حاجة بقالي فترة وتقريبا كدة اتوقف انتاجها ولو موجودة زيرو بتكون موديلات سنوات قديمة يعني 2008 او 2007 كدة بس عموما الانوس محترمة جداااا وعملية وقطع غيار مناسبة ورخيصة وتتصلح عند اي حد |
رد: ممكن أعرف الفرق بين الدايو اللانوس والنوبيرا ؟
زى ما أستاذ أحمد قال بالظبط , الكورى عامة عربيات رخيصة وقطع غيارها رخيصة جدا وأى حد بيشتغل فيها, بس فى مقابل ده مش هتبقى راكب مرسيدس, يعنى ثبات جيد نسبيا لحد 150 بعد كده مفيش, كماليات مناسبة بالنسبة للسعر, وأنتشارها نابع من رخص سعرها وسهولة أصلاحها فعلا بس ده مش من فراغ وألا ماكانتش أنتشرت.
اللانوس عربية عائلية كويسة بتستحمل الشغل وموتور أقتصادى جيد, لكن النوبيرا أكبر فى الحجم و أثبت على السرعات العالية وموتورها قوى ومريحة فى السفر ,وفيها مميزات الكورى السابق ذكرها وسعرها من 45000 الى 55000 حسب الكماليات والحالة عيبها أرتفاع تكلفة أصلاحها وقطع غيارها عن اللانوس و أستهلاك بنزين أعلى من اللانوس, لكن عربية جميلة جدا وفخمة وقوية و أتوقف تصنيعها فعلا والموجود منها مستعمل بس. واللانوس فيه شيفروليه لانوس ودايو لانوس والأثنين واحد بس الجديد كله شيفروليه. |
رد: ممكن أعرف الفرق بين الدايو اللانوس والنوبيرا ؟
شكرا لردودكم ومساعدتكم ليا
من رايكم أجيب دايو فول اوبشن حسب ماسمعت فى المنتدى انها حوالى 69000 ولااستنى شويه واشوف لانسر 2009 او 2008 مستعمله ؟ وتكون ب 80 - 85 مثلا |
رد: ممكن أعرف الفرق بين الدايو اللانوس والنوبيرا ؟
والله اللى يريح حضرتك, اللانسر عربية جميلة وبتستحمل كفاية أنها يابانى وثابتة وأعطالها قليلة بس قطع غيارها أغلى من اللانوس وثمنها مستعمل غالى قوى.
اللانوس الجديدة كماليتها حلوة وهتعيش معاك بأذن الله, ولما بتفتح بقها بعد عمر طويل يدوبك 100 أو 200 جنيه يقفلوه , وأحسن حاجة فيها أنها منتشرة والناس والميكانيكية حافظنها وقطع غيارها رخيصة ومتوافرة, حضرتك هتجيب لانوس جديدة من التوكيل ب 10000 جنيه أقل من لانسر مستعمل, وكده بصراحة المقارنة بتميل ناحية اللانوس. بس دى عربية حضرتك, شوف أنهى واحدة فى الأثنين أنت مستريحلها وتوكل على الله. |
رد: ممكن أعرف الفرق بين الدايو اللانوس والنوبيرا ؟
اقتباس:
انا بس خايف من الدايو اللانوس من ناحيه السفر وكده - وانا اخرى كسفر القاهره - أسكندريه فمش عارف ان كانت هتتعب من مسافه زى دى ومش هعرف ادوس بنزين اوى عشان عدم الثبات اللى بسمعوه ولالا |
رد: ممكن أعرف الفرق بين الدايو اللانوس والنوبيرا ؟
مفيش حاجة أسمها عربية تتعب, واللانوس فعلا مش ثابتة على سرعات عالية, بس اللانسر تعتبر زيها تماما من ناحية الموضوع ده وخاصة أن الانسر دفع أمامى زى اللانوس وهما الأثنين يعتبروا فى فئة واحدة لو شلنا فرق السعر.
وعدم الثبات حله جنوط أعرض من الأصلى وتبقى المشكلة خلصت بالنسبة لمعظم العربيات (جنوط العربيات الجديدة رفيع بغباء علشان يزود الراحة من المطبات وخلافه). و الموضوع زى ماكنا بناخد فى الأقتصاد موضوع تضحية, كل عربية ليها مميزاتها وعيوبها, المهم الشارى عايز من العربية أيه ومستعد يضحى بأيه فى سبيل ده. شوف حضرتك التقارير اللى فى المنتدى عن اللانسر واللانوس وشوف أنهى واحدة مناسبة لحضرتك ومتستعجلش وخد وقتك علشان الأستعجال وحش ودور بتأنى. وربنا يوفقك للعربية المناسبة. |
| الساعة الآن 12:00 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017