المصرية للسيارات وجولة سريعة بها تقرير شخصي
 

واحشني والله يا رجالة المنتدي لقيت نفسي فاضي النهارده قولت ادنجل وانزل اتمشي شوية المهم لاقيت رجلي قصدي عربيتي حدفتني علي المصرية للسيارات اللي بعد كلية البنات

المهم ركنت عربيتي وقولت ادخل اشوف ايه الجديد وبيني وبينكم مسيبتش عربية الا اما قعدت فيها وشفت شكلها عامل ازاي

المهم اول ما دخلت من المعرض دخلت علي الاسبيرانز التيجو لاني عمري ما شوفتها من جوه شكلها عامل ازاي والمفاجاة

http://4.bp.blogspot.com/_ymnv74dtn8...56181_4207.jpg

عربية رديئة جدا من الداخل والله انا حاسس اني كنت قاعد في لعبة من الالعاب الصيني ام 2.5 جنيه

قعدت اقلب فيها يمين وشمال واشوفها وجيت اقعد علي الكنبة ورا وقعت من عليها لانها عبارة عن كرسيين جنب بعض وكانو مفكوكين من مكانهم ومنظري كان وحش اوي وانا باخد المقلب ده منها ده حتي المعرض مستخصر يعتني بيها ولا يشوف فيها ايه

الباب بتاعها لعنه علشان اقفله المعرض كله سمع صوت الباب وانا بقفله قصدي برزعه علشان يتقفل

اتخنقت منها ونزلت وديه كانت اول مفاجاة ليا مع اني كنت بحب اوي العربية ديه

المهم نزلت منها علي اللي اسوء منها الاسكوربيون ماهيندر

عربية اعوز بالله من شر ما خلق والله النص نقل اللي عندنا في الصعيد من جوه اشيك منها مليون مره وقال حاطين عليها مفاجاة السعر في السوق 139000 وعندنا 114000 والله اانا ما ادفع فيها المبلغ ده ولا حتي 114 جنيه

انا مقعدتش جوها من منظرها وبفتح الباب اكني بفتح باب بقالة 90 سنة متفتحش تزييق للصبح وفي زي دراع خارج من التبلوه عامل زي اللي موجود في مدينة الملاهي اللي الاطفال بيمسكوه علشان يثبتوا نفسهم في اللعبه

المهم اتخنقت وقولت اشوف بقا حاجات رقية شوية روحت داخل هجوم علي المازدا اس 3 الجديدة عربية تحفة بجد بس مشكلتها متشوفلهاش كابوت الكرسي ساقت لتحت ويادوبك شايف المساحات بتاعت العربية بالعافية نفس الكلام كان مع الهوندا السيفيك الجديدة عربية بردك تحفة ومشكلتها بردك مشوفلهاش وش وينطبق نفس الكلام علي الباسات عربية وهم بجد وضايقني بردك حتة ابعاد العربية اللي مش شايفها

ومحدش هيصدق اشد عربية شوفتها في المعرض كانت الشيفورليه كروز عربية والله وهم قاعدتها فوق الخيال تابلوه جميل جدا لونه سماوي في اسود وحاسيت اني راكب عربية تمنها ميقلش عن 300000 جنيه عربية خرافة بجد واللي كانت موجودة في المعرض الهاي لين المهم ديه اشد عربية انا ركبتها ومريحة جدا في قعدتها


الخلاصة اشد عربية كانت في المعرض بالنسبالي كانت الكروز

اوسع عربية شوفتها في المعرض وعمري ما هشوف عربية زيها وواسعة كدا من جوه هي الهيونداي الماتريكس عربية حسيت اني قاعد في صالون البيت عندنا

احلي صالون عربية البيجو 208 ويليه الباسات ويليه السيفيك ويليه الكروز ويليه المازدا اس 3

وده كان ملخص زيارتي اليوم للمعرض

انا تعبت من كتر الكتابه خلاص اي حد عايز يكمل البيت بيته

رد: المصرية للسيارات وجولة سريعة بها تقرير شخصي
 

نسيت اقولكم علي حاجه

انا بردك شوفت الكيا السول هناك والله انا ما ادفع فيها المبلغ ده لو انطبقت السما علي الارض والله الماتريكس اشد منها بكتير واحلي منها من جوه هيه منظر بس وشكل خارجي لكن من جوه فقيرة جدا جدا جدا

رد: المصرية للسيارات وجولة سريعة بها تقرير شخصي
 

رد: المصرية للسيارات وجولة سريعة بها تقرير شخصي
 

رد: المصرية للسيارات وجولة سريعة بها تقرير شخصي
 

مجهود مشكور ومنتظرين باقي التقرير لتعم الفائدة

رد: المصرية للسيارات وجولة سريعة بها تقرير شخصي
 

مجهود رائع لحضرتك
بس الاسبرنزل موش وحشه اوى كده يعنى
بس عموما شكرا على الزياره والتقرير وعاوزين زيارات تانيه بقى

رد: المصرية للسيارات وجولة سريعة بها تقرير شخصي
 

عندك حق ف كل الي انت قلتة

بس بصراحة مش متفق اوي مع نظرتكم للمزدا

اصل الشركة دية انا مجربها جامدة موت و حاجتها حلوة

و انا معايا مازدا 3 2007 مالهاش حل و التابلوة بتاعها جامممممممممممممد جدا وبسيط