الصيانه المطلوبه للسياره الجديده
 

دلوقت أنا من ساعة ما اشتريت العربيه (4 أسابيع بالظبط) مش باعمل لها اى حاجه للاعتناء بيها ..
مفيش غير انّى باحط بنزين بس و ركّبت لها فَرش جديد ..
و مش عارفه مفروض أحط لها زيت إمتى و أغيّر لها الميّه إمتى و أودّيها تتغسل كل أد إيه و مفروض تتنضّف من جوّه كُلّ أد إيه و سمعت عن حاجه اسمها تشميع و مش عارفه دى تتعمل إمتى ..

أنا عاوزه أعرف الحاجات المطلوب عملها بشكل دورى عشان أحافظ على العربيه بحاله جيّده عشان ماتأخّرش أوى فى البدء فيها .. و شكرا جزيلا

رد: الصيانه المطلوبه للسياره الجديده
 

أولا مبروك العربية الجديدة وثانيا العربية نوعها ايه ؟

رد: الصيانه المطلوبه للسياره الجديده
 

في صيانة بتتعمل بعد أول الف كيلو في التوكيل عشان لو عندك أي ملاحظات علي العربية من ناحية التقفيل أو الاداء في حاجة مش مظبوطة هما بيظبطوها زي مثلا حدفة أو أصوات مش طبيعية في العفشة أو الموتور أو اي حاجة فيها عيب وبتتابعي بعد كده مواعيد الصيانات الدورية في التوكيل وعموما أي عربية زيرو ادائها بيتحسن بعد أول 5000 اما التشميع فدي مادة بتتحط علي بودي العربية لاكسابها طبقة زي الشمع لحماية السيارة من عوامل التعرية زي الشمس

رد: الصيانه المطلوبه للسياره الجديده
 

شكرا جزيلا على الرد ..

العربيه نيسان تيدا و لها فعلا صيانه بعد أوّل ألف كيلو
أنا بس حبيت أعرف لو فيه حاجه ينصح بيها أعملها للعربيه بشكل دورى و منتظم عشان ابقى واخده بالى منها

طيب يا ترى التشميع ده مفروض يتعمل بعد وقت معين من شراء العربيه ولاّ يفضّل يتعمل بدرى ولاّ إيه؟

رد: الصيانه المطلوبه للسياره الجديده
 

اولا الف مبروك و ربنا يديكي خيرها و يكفيكي شرها
هي اهم حاجه صيانه الالف الاولى ... علشان بيتعمل تشييك عام على العربيه و يتغير الزيت و تتربط العفشه و يتختم الضمان و الذي منه
ثانيا حضرتك لحد صيانه الالف مش مطلوب منك اكتر من الاستمتاع بالعربيه و ملاحظه اي حاجه فيها .. لمبه مش شغاله ... زرار معلق ...تتابعي صوت الموتور .. العفشه مع المطبات ... العربيه بتحدف مثلا .... يعني اي ملاحظات من الاستخدام العادي تسجليها و تبلغيها بيهم في الصيانه
ومش شرط تتطلعي حاجه و ان شاء الله ميكونش في اي ملاحظات

بعد كده ايه اللي المفروض تعمليه ...
ولا حاجه
العربيه زيرو .. يبقى مش مطلوب اكتر من انك تعملي الصيانه في ميعادها كل 5 او 10 الف حسب ما تحبي
انا شخصيا بعملها كل 10 الاف لأني شايف مش مستاهله كل 5 الاف وبالتالي بحط زيت ال10 الاف
يعني الزيت بيتغير حسب نوعه .. 5 الاف او 10 الاف .. و بالتالي ممكن تظبطي ميعاد تغييره مع الصيانه

الرادياتير بيبقى فيه مياه زرقا وبالتالي متزوديهوش ودي غالبا مش حتحتاجي تزوديها .. لكن ممكن عند صيانه ال 40 الف تغيريها في الصيانه ...كل اللي ممكن تعمليه انك تبصي على مؤشر القربه وتتطمني ان المقياس مظبوط .. غالبا بيكون فيه علامه Max وعلامه Min .. المفروض يكون مستوى الميه بينهم .. ولو قل عنهم زوديها مياه عاديه وغالبا مش حتقل :)

غسيل العربيه مرتبط بنضافه العربيه .. يعني لما تحسي انها عايزه تستحمى حميها
اهم حاجه متغسليش الموتور بالميه .. يفضل بالفوم ... ومش لازم كل مره تغسلي الموتور ... كل مرتين تلاته
اهم حاجه في الغسيل انهم يغسلو العربيه من تحت ويضرب مياه في العجل علشان ينضف الفرامل من تراب وطينه الطريق ... وده اهم من غسيل البودي و الصالون .. العربيه مبتبوظش من تراب الصالون

اكشفي على ضغط الهوا في العجل كل اسبوعين تلاته

التشميع ده اوبشن .. وممكن تعمليه في اي وقت

متشغليش بالك ... دوري وامشي ... و اهم حاجه تعملي الصيانه في مواعيدها ...

ده اللي في بالي دلوقتي و شوفي برضو رأي بقيه الزملا

رد: الصيانه المطلوبه للسياره الجديده
 

رد: الصيانه المطلوبه للسياره الجديده
 

ربنا يديلك خيرها ويكفيك شرها