يا جماعة خبر ال i20
 

يا جماعة انا النهارده كنت فى غبور ابو رواش بنعمل صيانة عربية واحد صحبى

وكانت واقفة هناك فى المعرض ال i20
يا جماعة دى جامدة جدا ك شكل وقالولى ان الموتور زى النيو اكسنت
و ان شاء الله هتنزل فى شهر 5 تقريبا بس لسة المواصفات مش متحددة و السعر بالتالى لسه برضو

اللى كانت واقفة هناك مواصفاتها كاملة وبفتحة سقف , لو بصيت عليها من برة تحس انها ضيقة جدا من ورا
انا بقى 185سم و عريض حبيتين ركبت ورا السواق و الكرسى على اخره , واسعة بشكل مش معقول بجد دخلت دماغى اوى بس مستنى اعرف سعرها لو مكنتش جبت النيو اكسنت او الفيس لفت بتاعتها
و الكسنت الفيس لفت ( فى نظرى عيبها الوحيد الشبكة تصميمها كبير على العربية ) بس حلوة جدا فى اللون الاسود بتاعها
ودى كمان نزلت و متاكد لانى شفت 5 عربيات مترخصين بيعملوا صيانة هناك

معلش انا ملخبط حبتين بس انا لسة داخل الساعة 8 ( من الساعة 10 ل الساعة 5,30 ده غير الطريق بتاع الدائرى يا سااااااتر يا رب )

رد: يا جماعة خبر ال i20
 

اأنا كمان كنت في ابو رواش انهارده وشوفت i20 السوداء شكلها وهم جدا بس من كتر التعب ما كنتش قادرة اسأل عنها لاني روحت الساعة 9.30 الى 2.30 وكنت تعبانة وقرفانة واللي كمل اكتر الطريق من بعد المحور واقفت فيه لمدة ساعتين لحد ما وصلنا للدائرى اموت واعرف كان فيه ايه يا ساتر كان يوم ما يتوصفش وانا سعيدة ان فيه حد كان مشاركني في التعب ده لان مهما حكيت محدش هيصدق

رد: يا جماعة خبر ال i20
 

الف شكر ليك على الخبر وانشاء الله اروح بكرة اتفرج عليها

رد: يا جماعة خبر ال i20
 

بالنسبة للزحمة دى اعتقد السبب عربيات اللورى , انا بس عديت من الصبح لحد اما دخلت بيتى حوالى 50 عربية , و ده فى مجال رؤيتى , عدى بقى على الطريق كله فى اد ايه و ده على الدائرى بس

و تصحيح العربية السوداء دى كانت ال اى30 ال اى 20 كانت فضى جنبها علطول

رد: يا جماعة خبر ال i20
 

يااااه كان يوم فظيع رايح جاى يا ترى هو علي طول كده والعربية اللي شوفتها كان مكتوب عليها i20 بس ممكن جالي عمي الوان من كتر التعب


قولي صحيح انتي كنت بتعمل صيانة الالف كيلو للاكسنت وانا كمان بس حصل معايا موقف غريب ما سابوش ليا باقي علبة الزيت شل مش هما بيعملو كده مع كل الناس بيسيبوا بقيت العلبة (اخويا قالي كده وانا مشلولة منهم بصراحة وشاكة انهم يكونوا حاطولي زيت الخمس الالاف مش العشر الالاف وخموني عشان لاقوني بنت وكده)

رد: يا جماعة خبر ال i20
 

اه هو طريق المحور دايما زحمة كده فى وقت الظهر و بليل من الساعة 6 ل 10 ( تخطيط عمرانى تيييييييت )

احنا كنا بنعمل صيانة ال 50 عقبال عندك , المفروض انهم بيسيبوا الباقى بتاع الزيت , لو حضرتك ملقيتهوش ممكن تقرى فى الوصل هو عمل ايه بالظبط و لو حضرتك متاكدة انك طلبتى من المهندس ساعة تسليم العربية انك عايزة 10000 ولقيتى العكس حاولى تكلمى المهندس يقولك اللى اتعمل ايه بالظبط علشان تروحى فى معادك
وعموما ال5000 فى الاول عادى علشان العربية اصلا بتطبع فى اول 5000

وعوضك بقى على الله لو حطولك 5000 بدل ال10000 و حاسبتى على العشرة ( مش بنتعلم ببلاش )
ونصيحة اخيرة تراجعى كل كبيرة و صغيرة فى العربية قبل ما تسيبى المركز علشان حاجة زى دى
لان صحبى كسرولوه حاجة فى الباب و لحق يمضيهم عليها

رد: يا جماعة خبر ال i20
 

هما حاسبوني علي زيت العشر اللاف ومكتوب في الوصل كده بس ايه اللى يخليني متأكدة وبالذات اني ما شوفتش العلبة وبقيت الزيت بس انا بعد ما روحت اتصلت بالمندوبة اللي كانت معايا وقالتلي انها حطللي زيت العشر اللاف بس انا ايه اللي يأكدلي (متيهيألي انا اصح شىء عشان الموتور ما يبوز اني بعد الخمس اللاف اروح احط زيت تاني ومش فارقة 250 جنيه صح ولا ايه)