|
ذكرياتى مع السيارات فى هولندا
عندما أتى صديقان لوداعى قبل مغادرتى مصر لاول مرة هم احدهم بسؤالى ! ماهو حلمك؟ وعاجلنى الاخر بسؤال جديد! أذا تحقق حلمك هل ستعود ام ستبقى؟ والحقيقة ان حلمي وقتها كان محصور فى اقتناء سيارة تكون خاصة بي أنا.وهذا كان ردى على صديقى.. أما السؤال الثانى فلم اجيب علية حتى الان!!!!!وعلية سوف احكى لكم ماحدث معى بسبب حبى للسيارات وحلمي ان اقتنى سيارة خاصة بي. البداية كات فى منتهى الصعوبة ولا يمكن بأى حال من الاحوال قيادة سيارة فى هولندا بدون رخصة قيادة هولندية... وللحصول عليها لابد من الدراسة لان الامتحان فيها مقسم الى 3 اجزاء الامتحان الاول هو امتحان نظرى فى قانون قيادة السيارة الامتحان الثانى امتحان عملى لتطبيق ما تعلمناة نظريا الامتحان الثالث خاص بالميكانيكا وكل مايتعلق بالسيارة. طبعا حاجة شبة مستحيل-لشاب لسة واصل البلد هنا جديد-المفروض اولا اجيد اللغة وبعدها ابداء احوش فى فلوس لان وقتها كان ثمن الدرس الواحد من اجل الحصول على الرخصة (60 جيلدر او خلدة)وهى العملة القديمة للهولنديين قبل اتفاقية الايورو. والحد الادنى من الحصص لا يقل عن 40 حصة. طبعا غير رسوم دخول الامتحان وكان وقتها -300جيلدر-وغير رسوم الامتحان النظرى -100 جيلدر - يعنى موضوع كبير ومحتاج فلوس كتير مع العلم ان المرتبات وقتها وبالنسبة لمغترب لسة بيحبو لا عندة لا لغة ولا اقامة مرتبات زهيدة جدا تتعدى قيمة الدرس الواحد بحاجات بسيطة. بالطبع المعلومات دية كلها جمعتها من افراد عائلتى الموجودين هنا ومن بعض الاصدقاء الذين تعرفت عليهم هنا وهم من محافظات مصرية مختلفة. بصراحة نفسى اتسدت وصرفت نظر على فكرة انى اركب سيارة هنا-قلت كفاية انى احوش وانزل اشترى السيارة اللى تعجبنى فى مصر.... طيب فى مشكلة جديدة اية بديل السيارة-الموتوسيكل محتاج رخصة برضة -يبقى مافيش غير العجلة-ايوة اجيب عجلة واوفر تمن تذاكر الاوتوبيس والترام.. خاصا انة فى خلال الكام يوم اللى فاتوا علية هناك كنت بشوف الاف العجلات ماشيين فى الشارع وراكبيهم من جميع الجنسيات ومن جميع الاعمار -يبقى الموضوع مش محتاج لا رخصة ولا تحويش.. اول حاجة فكرت فيها طبعا انى اقول لاخى الاكبر انى عاوز اركب عجلة اروح واجى بيها للشغل- وبمجرد انى فتحت معاة الموضوع وبطرح علية الفكرة..... لقيتة انفجر فية-طبعا انا مش بحب كدة - خاصا من اخويا الكبير دة بس قلت اعديها يمكن دة اسلوب التعامل فى البلد دية وانا لسة جديد مش فاهم (طبعا بينى وبين نفسى بقول ماله دة هو فية اية؟) انا-اية ياعم انت بتزعقلى لية؟ اخويا-انا مش لاقيك علشان اسيبك تركب عجلة هنا انا-لية هو اللى بيركب عجلة هنا بيروح فين؟ اخويا-ركوب العجل هنا خطر وخطر كبير وسنويا بيموت ناس من حوادث العجل انا-يموتوا لية بس بيضربوا عليهم نار -اية ياعم هو احنا فين اخويا-اسمع بس هنا الطرق كلها والشوراع بيمشى فيها الترام والعجل لازم يعدى من عليها وبالتالى كتير من الاحيان ان العجل يتزنق بين قضبان الترام أنا- الله والناس دية كلها عايشة ازاى مستنين دورهم يموتوا ولا اية؟ اخويا-هو كدة وانا مش ح اسمحلك تركب عجلة انا- الله مانت راكب عجلة وانت اصلا مابتعرفش تسوق اخويا- لا انا بعرف اسوق وبستعملها من سنين............. وانتهى الحوار ولم احصل على موافقة ولا على كيفية ركوب العجل هنا ومرت الايام حتى كان احد اصدقاء اخى فى زيارة لنا وفوجئت بة يسألنى -عندك عجلة ولا لسة ماجبتش؟ فأجبتة بالنفى وعاجلنى -لية بس دية ح توفر عليك كتير-على كل حال انا عندى عجلة لية بكرة ح اجيبهالك واجى-ههههههههههههه طبعا اخويا خرج وسمع اخر كلمتين-ح اجيبهالك واجى - وسأل صاحبة -هى اية دية اللى ح تجيبها وتيجى ورد علية الرجل وقالة- اية ياعم انت ازاى محمد ماعندوش عجلة لغاية دلوقتى ماهو اولى بالفلوس اللى بيصرفها دية اخويا صامت تماما ومش عاوز ينطق وبعد فترة رد على صاحبة وقالة انا خايف علية بس مش اكتر فسألنى الرجل بتعرف تسوق ؟ قلت لة دة انا فريرة -لايمنى انت بس على العجلة..... تانى يوم كنت بتحايل على الساعة تمر علشان الشغل يخلص واروح للعجلة وفيييييييييييييييين لما الساعة جت 5 وانصرفت متوجها الى اخى وياسلام سلم ... لما روحت ولقيت صديقى اخى موجود. واول ماشافنى قام بأخراج مفتاح صغير وقاللى اتفضل ياسيدى عجلة وبالقفل بتاعها كمان__ طبعا ضحكت من باب المجاملة لكن بصراحة انا كنت فاكر ان كلمة بقفلها دية عبارة عن قفشة منة مفروض تضحك لكن مافهمتة فيما بعد انة كان يقصدها خاصا عندما عرفت ان العجلة ثمنها 25 جيلدر لكن القفل تمنة 75 جيلدرhttp://www.ra7ala.com/vb/images/smilies/smile.gif خرجت لاجرب العجلة وخرج معى اخى وصديقة وانا قلبى عمال يدق خايف حاجة تحصل قدامهم --اقع ولا حاجة - العملية تبوظ واخويا ينشف دماغة اخذت نفس عميق وقرأت قل هو الله احد وسوقتها- ثقة اية واصرار اية وحرص اية حاجة تفرح نزلت بكل ثقة وانا شايف نظرات الرضا والاعجاب تفط من عين الرجل صديق اخى ونظرة نعسانة يصاحبها لوية نص شفة من اخى!! طبعا كلمونى بعدها وفهمونى ان فى قانون لسواقة العجل -ولازم يبقى فى نور فى العجلة وفى اللى راكبها اضاءة فسفورية تظهر فى الليل وتوضع على جسم الراكب فى اى مكان يكون ظاهر ولازم استخدم يداى اثناء القيادة والاشارات اعطيها بأحد يداى ولابد من اتباع الاسفلت الاحمر لانة طريق العجل فقط وحاجات تانية كلها تصب فى خانة ........ الحرص -الحرص - الحرص ومر حوالى 5 ايام وفى اليوم السادس شأت الظروف انى انتظر اخى حتى ينتهى من عملة وبعدها نتوجة الى المنزل وطبعا هو معاة عجلة وانا معايا عجلة وكان الكلام دة فى شهر ديسمبر يعنى كانت ايام سقوط الثلوج وبالفعل كانت الشوارع مليئة بالثلوج والقيادة بحرص شديد_ وتحركنا من اجل عبور حوالى مسافة 1-كم تقريبا وبعد حوالى نصف المسافة وكنت قد اصريت ان اعاون اخى فى حمل احدى الشنطتين الذى يحملهم فى يدة واقتسمناهم بينى وبينة والحظ العسر ان شنطتى كانت تحتوى على زجاجات كبيرة كولا وسفن اب هههههههههههه وفى اول ملف يقابلنا فى الطريق ولسة بفكر أأخد يمين وأذ بى طاير فى الهوى_وتبعثرت اوراقك يا شحاتة_ طبعا سمعت صوت فرقعة تليها فرقعة عرفت انهم للسفن اب والكولا لما جسمى لقى مكان يستقر فية بدأت ابص حوالية لقيت اخويا بيجرى علية وبيسألنى انت كويس؟ طبعا موقف مايعلم بية الا ربنا..... قلت اللحق نفسى__ قلت لة -اة اة -انا كويس هو اية اللى حصل انت خبطت فية ولا اية ههههههههههههههههههههه بستعبط قاللى -انا لا لمستك ولا كلمتك انت اللى دخلت فى الرصيف طبعا نظرت للرصيف لقيتة فعلا موجود -لكن من كثرة الثلوج مش شايفة طبعا الخسائر كانت عبارة عن السفن اب والكولا بالاضافة الى الاضأة فى العجلة وعلية لازم اخد المسافة كلها بجر المدعوقة العجلة طبعا خدناها مشى ولا حد بينطق بكلمة لكن تفكيرنا شغال انا قلقان ان اخويا ياخد العجلة او تحصل مشكلة لو طلب كدة وانا رفضت ولم يوقظنا من التخيلات الا وصولنا الى منزل اخى وبالظبط زي مابيحصل فى المواقف اللى زي دية اول ما زوجة اخى فتحت لنا الباب اول سؤال سألتة لاخويا جبت الكولا والسفن اب ولا نسيت زى كل يوم!!!!http://www.ra7ala.com/vb/images/smilies/biggrin.gif يتبع <!-- / message --><!-- sig --> |
رد: ذكرياتى مع السيارات فى هولندا
احنا من زمان واحنا مستنين الموضوع ده منك يا استاذ جنيدى والبدايه رائعه ومشوقه منتظرين الباقى ptmnlo123per122 |
رد: ذكرياتى مع السيارات فى هولندا
والله فكرتنى بهولندا، أنا قعدت حوالى 6 شهور فى أمستردام وبرده ركبت عجلة بس هى على الأقل آمن من مصر فهناك حارة خاصة للعجل، وأتذكر انى كنت راكب عجلة مع صديق وخرج بره الحارة ومشى فى الشارع وصدمتنا سيارة، كانت سيارة هوندا وبها بنتين، وأتذكر أنهم بكوا من الخوف علينا والحمد الله لم يحدث لنا شئ وحاولنا نهدى فيهم ومشيناهم قبل البوليس مايجى |
رد: ذكرياتى مع السيارات فى هولندا
تسلم ايدك
و في انتظار البقية |
رد: ذكرياتى مع السيارات فى هولندا
اقتباس:
فعلا عندك حق انا تأخرت كثيرا وكان الاتفاق ان ابداء بعد ان ينتهى دكتور عبد السلام ارجوا المعذرة |
رد: ذكرياتى مع السيارات فى هولندا
وعدت الليلة وتانى يوم بصراحة صحيت نفسى مسدودة من العجل ومن الخبطة اللى نتجت عن الحادث وعلية اخدت قرار بمقاطعة العجل تماما وارتضيت بالامر الواقع__________ ومرت شهور وكنت فى زيارة لاحد اصدقائى الذين تعرفت عليهم هنا اسمة -ماني-هو اسمة اصلا محمد لكن الدلع دة ضرورى عند الاسكندرانية خاصا لو من اولاد البلد--قمت بزيارتة وتطراء الحديث للسيارات وقاللى لية ماتعملش رخصة وتجيب العربية اللى انت عاوزها- قلت لة - ربنا يسهل-لكنة اقترح علي فكرة انى اعمل رخصة دولية من مصر واقدر اسوق بيها هنا 6 شهور طبعا كانت مفاجاة واتبسطت اوى خاصا لما اتأكدت من المعلومة واتصلت تانى يوم بمصر علشان يبعتولى رخصة دولية--وطبعا كان لازم الاول يطلعوا رخصة مصرية طلعت طبعا وفى خلال 10 ايام كانوا عندى--وذهبت لصديقى وصاحبى وحبيبى -ماني - الاسكندرانى ازف الية الخبر فوجئت بية يهنئنى ويعطينى مفاتيح سيارة وقاللى دية بقى مفاتيح اول سيارة ليك هنا وتدفع بس 300 جيلدر والباقى هدية منى ليك طبعا فرحت خاصا لما قاللى ادفع كل شهر 100 جيلد وبداية من الشهر اللى جاى وافقت واخذت السيارة وانصرفت بها وكانت مشكلة كبيرة لم اتخيلها او افكر فيها -طيب انا معايا سيارة ح اعمل اية دلوقتى -دة انا حتى ماعرفش اروح البيت كل الطرق اللى اعرفها هى طرق العجل ولونها احمر وغير كدة اعرف الطريق اللى بيمشى علية الترام اللى بستخدمة وفعلا اتذكر انى وصلت لبيتى فى هذا اليوم فى حوالى 3 ساعات وهو المشوار يعمل 20 دقيقة وركنت السيارة وطلعت بيتى واخبرت زوجتى انى عندى سيارة طبعا فى البداية اعتقدت انى بهزر ولكن عندما طلبت منها تنظر لها من النافذة تأكدت انى لا اهزر وكان هذا الحوار هى- دية جبتها منين السيارة دية انا- اشترتها من صاحبى -مانى الاسكندرانى- هى -ايوة لية يعنى اشترتها انت عندك رخصة؟ انا -متهكما طبعا عندى رخصة وهممت واخرجتها لها هى- تصفحتها بقرف على تعجب وسألتنى ماهذة؟ انا- دية رخصة احضرتها من مصر تسمح لى بالقيادة هنا هى - انت متأكد؟ انا- طبعا انا سألت كتير اصدقاء واخرهم مانى الاسكندرانى هى- طيب اتصلت بالتأمين؟ أنا- تأمين اية سيادتك؟ هى- اى حد هنا بيشترى عربية لازم يأمن عليها فى خلال 24 ساعة على شرط لا يقود السيارة خلال ال24 ساعة!!! أنا-طيب مش مشكلة قوليلى نأمن ازاى وانا اعملة؟ هى - بالفعل اتصلت بشركة تأمين وتلتها بشركات اخرى كثيرة وردهم كان واضح ومفهوم انهم لا يأمنوا على الرخص الدولية انا - العربية ح اسوقها يعنى ح اسوقها وبلاش تعقديها هى - براحتك --ولو حصلك مشاكل مش ح اساعدك انا - طز مش مهم تانى يوم الصبح وبالتحديد الساعة 9 ونصف صباحا لقيت زوجتى بتصحينى اصحى البوليس كلبش العربية-اعوذ بالله من غضب الله -هو انا لسة لحقت-ماعلينا - قمت اجرى اشوف فى اية-لقيت كلبش وورقة ملزوقة على زجاج السيارة الارقام اللى مفروض اتصل بيها علشان يساعدونى فى فك الكلبش ودفع الغرامة على غيار الريق 125 جيلدر لانى ومن اجل ان اركن فى الشارع لابد ان يكون عندى تصريح مدفوع الاجر ومحدد المدة-ياليلة مش فايتة_اية دة كلة هو انا ح اركب دبابة -هو ياربى ولا العجلة ماشية ولا العربية ماشية بصراحة وقتها زوجتى اعلنت انها ح تساعدنى وبالفعل ذهبت معى لشركة تامين وعملت التامين بعدها ذهبنا الى البلدية واستخرجنا تصريح للباركينج-وبقى كلة تمام ومن حقى اسوق زي مانا عاوز تانى يوم اتصل بي صاحبى مانى الاسكندرانى يطمن علية وقلت لة انى مظبط كل حاجة وعملت تامين وكلة تمام وفوجئت بة يسألنى على ورقة مخالصة السيارة ولم اكن اعرف انها مهمه بالنسبة لة وايضا بالنسبة لي لان بها او منذ استخراجها تتحول ضرائب السيارة مباشرا على حسابى انا وعلية عرفت كيف تدفع الضريبة على السيارة وهى بشكل سنوى او نصف سنوى او ربع سنوى او شهرى ولكن المحصلة واحدة على ان يكون الحد الاقصى سنة واحدة وعهليها يتم التجديد للسيارة كصيانة ولوازمها-وكانت معرفة مفيدة ومكلفة بالطبع وقبلت بها واصبح كل شىء على مايرام وتعلمت الكثير من الطرق ومن القوانين وهى لمن يجيد اللغة امر يقدر علية الانسان العادى- مش كيمياء يعنى-فقط على قائد السيارة ان يلتزم ومرت قرابة 4 شهور ولم تقابلنى اى دورية شرطة منما زادنى ثقة.... وفى ليلة كحلاء اتصل بى احد الاصدقاء فى يوم اجازتى وعرض علي ان نتقابل ونذهب لمقهى المصريين ووافقت وانا سعيد ح اروح اقابل صديقى عماد الفيومى وانا راكب سيارتى وبعد كدة اخذة اوصلة لبيتة وابقى عملت معاة واجب والواجب يتضاعف لو انا اللى دفعت الحساب فى المقهى المهم -ذهبت وقابلت عماد صاحبى الفيومى وتقابلنا مع ثلاث اصدقاء اخرين فى المقهى وكان اقتراح احدهم اية رايكم يا جماعة نخرج بسيارة جنيدى -نتفرج على البلد!! طبعا انا جاتلى زغطة --معقولة ح اعمل واجب مع كل دول--والله اهى فرصة كويسة اوطد علاقتى مع الناس يالا بينا --يالا بينا هوبا قعدنا فى السيارة احنا ال5 وتحركنا وطبعا الحلو الى عاوز يتفرج على البلد هو اقدم واحد فينا وبالطبع هو اللى حافظ الطرق اللى ح نمشى منها وعلية عمل فيها ابو العريف وشمال فى يمين فى يمين فى يمين فى شمال لقيت سيارات البوليس بتحاوطنى من كل مكان............... يتبع <!-- / message --><!-- sig --> |
رد: ذكرياتى مع السيارات فى هولندا
حمد الله علي سلامتك يا استاذ جنيدي
ايه الغيبه الطويله دي منتظرين الباقي علي احر من الجمر:) |
| الساعة الآن 02:36 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017