المشاركة الأصلية كتبت بواسطة zing0 (المشاركة 997206)

الموتور الخفيف يعنى ماتور فيه تسريب فى ضغط المكابس (البساتم) على غرف الحريق
و ده معناه إن الشنابر أتبرت و بقى الخلوص فيها زيادة أو الصبابات مش قافلة مكانها كويس لسبب أو أكتر, بس حالة الشنابر هى الشائعة أكتر, و فى كلا الحالتين بيدخل جزء من الزيت الموجود تحت البستم لفوق و يدخل يتحرق مع البنزين و يطلع مع العادم
* و بكده هتلاقى علامات بتأكد الحكم على المكنة الخفيفة بنسبة كبيرة .... منها:
- الزيت بينقص و محتاج يتزود كل شوية (بينقص كتيرعن العلامات اللى على مقياس الزيت مش مجرد بخر زيت)
- لما العربية تسخن و تأخد حرارتها الطبيعية (خاصة فى الصيف) تلاقى دخان أبيض مزرق خارج من الشاكمان و طبعاً فية رائحة زيت محروق
- فك البوجيهات و شوف سن البوجية (الشمعة نفسها مش جسم البوجية) لو عليها زيت يبقى المكنة خفيفة مفيش كلام
- ممكن خرطوم الفايظ اللى داخل على عمة الهواء يكون بيطلع دخنة بيضاء

* لو الوضع زى ده, يبقى تجهز نفسك لطقم شنبر.... يعنى أجهز أيه؟
- مش فلوس بس, لأ , لازم تشوف صنايعى بيشتغل فى موتور عربيتك و عمل مليون عمرة قبل كدة فى نفس نوع الموتور ده, مش لسه هيتعلم فيك
- تشوف أيه أحسن قطع غيار مضمونة و متستخسرش (ده قلب الموتور يعنى جراحة قلب مفتوح و مش كل يوم هيتفتح يعنى.... ربنا يشفيه)
- البرنس اللى بيعمل الشنبر يتأكد من الصبابات و الجلد بتاعها و يطمئن على الشمايز (جدران غرف الإحتراق)
- تأخد فترة تليين كويسة و متستعجلش, و جهزلك جركنين بنزين على جنب علشان التليين لإن البنزينات مبترضاش تحط بنزين فى جراكن بدل متشتريهم سوق سوداء و يبقى مخلوط بالمياة (العربية فى التليين بتبقى واقفة مكانها ممنوع الحركة - فترة نقاهه بقى)

* طيب لحد ما أجهز نفسى أعمل إيه؟
- أولاً متقرصش على العربية, الضرب فى الميت حرام, خليها ماشيه و شايلاك لحد ما تجهز لها
- تتابع مستوى الزيت بإستمرار, و تزود زيت ثقيل (مش لازم زيت شنبر لأنه بقى مضروب- لو عرفت تجيب الأصلى يبقى تمام) ممكن أى زيت حتى لو سايب بس المهم لزوجتة عالية علشان ميتحرقش بسرعة
- هتغير البوجيهات بنفس النوع بس (سن قصير) علشان مش كل شوية تقطع و يطولها زيت( و فى ناس بتركبلها كرسى علشان تعليها)
- تتفرج على الفيديو بتاع أخونا البشمهندس أدهم فى عمرة الفيات 127 ربنا يبارك له فيها و يملاها بركة, أكيد هتستفيد منه حاجات كتيييييييييييير و تبقى فاهم الدنيا ماشية إزاى, دور على جوجل بالعنوان ده هتلاقية على جزئين


أعاننا الله و إياكم لكل خير