|
معايا 12000 فقلت اشترى عربية
السلام عليكم ورحمة الله وبركاته انا عضو جديد وعمرى ما ركبت عربية ومعايا الوقتى 12000 جنيه بحثت على النت لقيت عربيات كتير بالثمن دا واقل من كدا كمان ويزيد مثلا ب 9000 و 14000 طبعا الفيات 128 و 127 ولادا 2000 لدرجة انى لقيت عربية بيجو 305 ب8000 بس عاوزة حشو كبالن وضبط فرامل وانا معرفش اساسا ايه الكبالن دى فبصراحة احترت اخر حيرة فهل ممكن حد يساعدنى فى الاختيار لان دى اول عربية هركبها فى حياتى ومش عاوزها تعقدنى فى كل العربيات وانا مش هستعملها كتير هما 20 كيلو رايح شغلى وزيهم راجع ويمكن اقل من كدا وهتتركن جمعة وسبت كمان يعنى مثلا لو هجيب فيات يبئا موديل سنة كام هو الافضل واللى اثبت كفائة ؟ ولو لادا 2000 حلوة او بيجو 305 ولا تقترحوا عليا حاجة تانية انا مليش خبرة الا بسيطة خالص من النت فقط لا غير وشكرا مقدماً |
رد: معايا 12000 فقلت اشترى عربية
اهلا و سهلا بيك فى المنتدى ....
لو الموضوع زى ما حضرتك كاتب فى العنوان .... ان معاك فلوس فقلت اشترى عربية ... ده حل مش كويس ... حضرتك تشترى العربية علشان محتاجها مش علشان معاك فلوسها ... رايى ان حضرتك تصبر شوية لغاية لما يكون معاك فلوس اكتر و ان كنت مصر ... ارشح لحضرتك اللادا ... افضل من ال 128 و اكبر من ال 127 و ياريت تبعد عن ال 305 و مع ذلك .. اللادا حتعقدك فى حياتك :) ... متابع معاك |
رد: معايا 12000 فقلت اشترى عربية
الفلوس اللي معاك تجيب 127 حالة كويسة
واي عربية مستعملة لازم تعمل حسابك ان هيكون فيها شغل شوية يعني تعمل حسابك من 500ل1000 جنيه فوق تمن العربية |
رد: معايا 12000 فقلت اشترى عربية
اما ان حضرتك تصبر شوية لغاية لم ربنا يكرمك بميليمن كمان او تتوكل على الله وتجيب بالسعر ده 125 او 124 ولو ناوى على 125 قدامى عربية حلوة وحالتها جيدة موديل 1974 بس العربية للأمانة محتاجة عمرة موتور ام كبودى وأساسيات وعفشة والحاجات دية ممتازة.
وكمان قطع غيار الادا تركب عليها عادى. أرجو ان اكون افدت حضرتك . ربنايوفقك للأحسن اخوك محمد |
رد: معايا 12000 فقلت اشترى عربية
انا متشكر ليكم ياجماعة جدا على ردودكم والموضوع يا استاذ ahmed_eng2001 مش انى لقيت معايا فلوس فقلت اشترى عربية لا انا فعلا الاول كان فى اتوبس تبع الشغل بييجى ياخدنا ويرجعنا تانى مكنتش بحمل هم المواصلات بس الوقتى نزل قرار بترشيد الاستهلاك واتلغى الاتوبس فبنروح على حسابنا دا غير البهدلة اللى فى المواصلات فربنا يسر بجمعية كنت عاملها ب 12000 جنيه فقلت لو استنوا هيتصرفوا كالعادة فقلت اشترى عربية تمشينى لحد ما ربنا ييسر بفلوس تانية ابيع اللى معايا واكمل واشترى احسن منها وكدا
مش عارف ليه ياستاذ Marlborooo مش بستريح لل 127 لانها كانت مع واحد اعرفه وطلعت عين اللى خلفووه لحد ما باعها وخسر فيها 3000 جنيه غير المصاريف اللى صرفها عليها والله يا استاذ محمد حسن هشوف وبعدين اقرر وبعدين انا مش عاوز عربية ابدأ بعمل عمرة للموتور علطول كدا انا عاوز امشى بيها علطول المهم عندى اساسياتها تكون كويسة وسليمة وميهمنيش اى كماليات المهم بتدور وبتمشى وبس والف شكر للاعضاء اللى زى العسل |
رد: معايا 12000 فقلت اشترى عربية
اقتباس:
الـ 12000 لازم هيجيبوا حاجه سبعينات أو ثمانينات, يعنى مستهلكه, الحالة الأفضل هيا الفرق, و دى يا إما فى 127 يا 125 اللى عارضها الأستاذ محمد, بس العمرة هتدوخك لإنك لسه جديد على الصنايعية غير إنها هتحتاج حوالى 3000 تانى على ثمنها الـ 127 هتلاقيها بـ 8000 و الحالة الممتازة بـ 12000 بس المهم حد بيفهم يكشف لك عليها و تكون واثق فيه (مايكونش ليه مصلحه و لا صنايعى, لو حد من أصحابك أو أقاربك يكون أفضل) ممكن تشترى بيها 128 (حالة متوسطة) أو فولكس بيتلز (الخنفساء) أو لادا أوكا (بلاشها أحسن) .... بس زى مقولتلك الـ 127 أفضل حاجه فى الرينج ده. لو قدرت تزود المبلغ شوية و تعدى الـ 15000 الإختيارات هتكون أوسع |
رد: معايا 12000 فقلت اشترى عربية
127
ـــــــــــــــــــــــــ |
| الساعة الآن 11:49 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017