هام جدا للخبراء
 

السلام عليكم ورحمه الله وبركاته..
عربيتى 128 موديل 73 .. كنت عملتلها شويه صيانه علشان تظبط شويه . المهم غيرت ضفيره كهربا عموله وطلمبه زيت وطلمبه بنزين وغيرت فلاتر زيت وبنزين وطقم كهربا (ابلاتين وكوندنسر وسلوك بوجيهات فايبر وبوجيهات ngk ) وغيرت كمان الردياتير بواحد جديد 3ماسوره نحاس وغيرت خراطيم البنزين والمياه وكمان طقم دبرياج ديسك واسطوانه استيراد وبليه دبرياج جديده وكمان هيه كان فيها دينامو شاهين وكان المارش بتاعها تعبان جدا فجبتلها مارش الشاهين 4 شربون وكمان بطاريه جافه 70 امبير .... تماااااااااااااااااااااام ؟؟؟تمام
العربيه بسم الله ماشاء الله بتدور من اول تكه ..سحب عشره على عشره .. على فكره موتورها 1100 وكنت بجيب 140-150 عادى جدا .. من فتره حسيت انها بتسخن جدا فرحت مغير ترموستات من 80-90 الى 68-82 رجعت زى الفل ومابقتش بتسخن والسحب لسه زى الفل ..من يومين بطلت منى وانا ماشى ..دورت دارت ادوس بنزين تطفى ..مره فى التانيه مبقتش عايزه تدور خالص وبقيت سامع صوت المارش غريب ..رحت مكلم الميكانيكى بتاعى وكنت قريب من ورشته جه الراجل وبعدين نزل تحت العربيه بعد ما سمع صوت المارش وبعدين طلع وقال دور ..دورت دارت زى الفل بس كانت لمبه الزيت بترعش ..ايه ياعم قالى الكهربا عايزه تعلى ..قام معليها طفت اللمبه وروحت وكله تمام .. النهارده رحت بيها مشوار وعدين راحت طافيه تانى ..يادى النيله.. ادور تدور ..ادوس بنزين تطفى ..فضلت على الحال ده اكتر من ربع ساعه قافل الطريق ..لحد ما شويه شويه قعدت اسايس فيها لحد ماركنت على جنب .. بردت شويه ادور تدور اوس بنزين تمشى ..شويه ادوس بنزين تفصل ..ارفع رجلى وهيه على السلانسيه زى الفل ادوس تبطل ... هل المشكله لما الراجل علا الكهربا ولا ايه تانى مش عارف ..........

رد: هام جدا للخبراء
 

انا بردو كانت العربيه بتفصل منى وهى ماشيه احيانا

روح لواحد بتاع كربراتير كويس يظبطلك الهوا وبالمرة ظبط الكهربا عند واحد تانى
وشيك كده على البوجيهات لا يكون في كابل واقع

رد: هام جدا للخبراء
 

+11111111111111

رد: هام جدا للخبراء
 

كلامك يميل لعيوب كربراتير وظبط البيكات لكن معتقدش كهرباء

رد: هام جدا للخبراء
 

الحمد لله تم حل المشكله ..وطلع العيب غريب جدا .. طلع المشكله فى ان العوامه مسدوده نتيجه خبطه فى التنك فكانت خانقه العربيه كأن مفيش بنزين ..تم قص الجزء العلوى من العوامه (الماسوره النحاس) وتركيبها مره اخرى والحمد لله كله تمام ..شكرا لكل من ساهم فى الرد

رد: هام جدا للخبراء
 

السلام عليكم ورحمه الله
مبروك ياعم adhmmaamon التجديد والشدة ويارب يباركلك فيها
بس كمل جميلك وخليك جدع وقلنا عملت الحجات الي فوق دي بكام واسعار المصنعيه
لحسن سوكه مغلباني وناوي ( ان شـــــــــاء الله ) اشدها قريب
:CHUBBY~36:

رد: هام جدا للخبراء
 

الله يبارك قيك يا msm_classic
يالنسبه للاسعار والمصنعيه فهى تقريبا كالتالى
ــ ردياتير نحاس 3 ماسوره 280 ج
ــ طقم بوجيهان NGK الاصلى كل بوجيه لواحده فى علبه والاريعه ب40ج
ــ مارش الشاهين استيراد طبعا اداءه عالى جدا وبيفرق فى الدوراه خصوصا فى الشتاء 150ج
ــ الضفيره العموله على حسب الصنايعى اذا كان عنده ضمير بتتراوح من 700 الى 800 والسلك معتمد او حجازى علشان يستحمل حراره الصيف
ــ البطاريه الجافه 70 امبير كورى بضمان سنه بتفرق جامد فى نور العربيه وخصوصا لو انت زى حالاتى من هواه سيستم الصوت ومركب طقم صوت محترم فبيحتاج بطاريه كويسه دى 400 ج +القديمه اللى كانت سايله وكان فيها ربع ضارب
ــ طلمبه زيت 160ج جديده طبعا
ــ طلمبه بنزين 65 ج برضه جديده
ــ طقم دبرياج ديسك واسطوانه استيراد 150ج +بليه جديده 30ج
ــ عملت كمان موضوع الاخ المحترم هشام الجزار بتاع الابلاتين والكوندنسر وجبت الموبينه اليابانى والكوندنسر بتاع البيجو 504 وعلى فكره الراجل ده محترم وشارح بطريقه سهله خلتنى انا اللى اركب الحاجات دى بنفسى بعد الميكانيكى ما قالى مش هاتفرق فى حاجه ولاسحب ولا غيره ولكن بسم الله ماشاء الله السحب ميه ميه وريحه البنزين اختفت وحاجه زى الفل .
ايه تانى ياباشا ؟؟ اه غيرت زيت وجبت التعاون البرتقالى اللى الاخ المحترم سيد كان كاتب تجربته معاه وهوه بحوالى 110 بس ايه ياباشا حاجه زى الفل كأنك راكب فيرنا او لانوس .. لاصوت موتور ولا يحزنزن من بتاع ال128 لدرجه انى ساعات فى الاشارت مع الزحمه بفتكر ان العربيه مطفيه .. على فكره ممكن تلاقى اللى يقولك ياعم دى 128 متصرفش عليها ..هيا يغنى بكام ؟؟ وده اللى مخلى معظم العربيات دى زى النيله ..لكن اللى بيهتم بيها وبيصرف عليها بتيقى زى الفل .. على العموم ارجوا انى اكون قد قدمت اى نوع من الاستفاده
السلام عليكم