اشتريت لانسر بطة
 

السلام عليكم ورحمة الله
الاخوة الاحباب: انا كان نفسي اشتري عربية ترحمني من زحمة المواصلات وكان معايا في حدود 30000 وكان نفسي اشتري اكسنت او اكسل المهم نزلت السوق وقيت الاسعار عالية بطريقة غريبة
واخيرا عن طريق واحد معرفة لقيت عربية لانسر بطة94 وطلب 39000 وبعد جدال ومناهده وصلت 35000جنيه
انا اسف علي الاطالة
وعلشان مخدتش معايا ميكانيكي لقيت اكتشفت بعد التسجيل ان الموتور بتاع اكسل مش بتاع لانسر
وسؤالي هو
هل السعر مغالي فيه
العربية فيها دخانة سودا وكمان فيه هباب اسود علي البوجيهات فهل الموتور كده بيودع
واخيرا هل عمرة الموتور مكلفة وامتي الموتور هيسلم نمر وخصوصا ان الميكانيكي قالي ان فيه هبده غريبة معلش سامحوني علي الاطالة:GROWIN~12:

رد: اشتريت لانسر بطة
 

رد: اشتريت لانسر بطة
 

اخى الكريم مواتير الاكسل هى اللى متخدة من لانسر
عندك لانسر عيون اللى هى موديلات قبل بتعتك 90 ،91 نفس الموتور بتاعك
والموديل الاعلى من بتاعك الكريستالة هو هو نفس الموتور
يبقى كدة الاكسل هى اللى بتعتمد على مواتير ميتسوبيشى
نفس اللى بيحصل فى بروتون ويرا نفس مواتير ميتسوبيشى بطة وبعدين طوروها وعملوها انجكشن فى موديلات 2004 تقريبا و 2005

الدخنة السودة اللى فى الموتور دة ظبط كربراتير وسهل جدا مش مكلف
والهبدة لو تسمح توصفها اكتر هانشوف لها حل بامر الله

رد: اشتريت لانسر بطة
 

شكرا للاهتمام وجزاكم الله خير
بس انا كنت عاوز اعرف عربية بالمواصفات دي يبقي سعرها مغالي فيه ولو انا بعتها هخسر فيها كتير

رد: اشتريت لانسر بطة
 

السعر مش مغالى فية ولا حاجة
اية اللى قفلك منها كدة ؟؟؟؟؟؟؟؟

رد: اشتريت لانسر بطة
 

يا مستر استرا يا غالي متشكر جدا علي الاهتمام الكبير ده
انا كنت فرحان بيها جداوكل حاجه لغاية ما الميكانيكي قالي ان الموتور اللي فيها بتاع اكسل واحتمال تعمل عمرة قريب لان فيه رزعه وواحد تاني قالي ان الشكمان لونه اسود والبيجيهات كمان مهببه اسود وده عاوز ظبط كربيراتير وقالي سعرها غالي .
تنصحوني اصلح الكربيراتير وابيعها ولا ايه (علما باني هقول للمشتري كل حاجه عنها بصراحه) ولا احتفظ بيها

رد: اشتريت لانسر بطة
 

حضرتك ما قراتش المشاركات كلها بالكامل تقريبا
انا بقول لحضرتك ان مواتير الاكسل هى اللى متخدة من مواتير ميتسوبيشى
يعنى اكسل بتاخد مواتيرها من ميتسوبيشى مش العكس
باختصار عربيتك مش مغيرة موتور ولا حاجة والميكانيكى اللى شافها على ادوة اوى
و وحياة ربنا سعرها مش غالى ولا حاجة
والدخنة السوداء موضوع ظبط كربراتير يتعمل بـ 100 جنية مثلا

اما الهبدة لو وصفتهلنا شوية هانعرف من اية