مصر موتورز مجتمع السيارات

معلش هسبق أنا
أنا هكلمكو عن المصيف الشعبى رقم واحد فى مصر

المصيف شعبى يعنى فيه من طبقات الشعب الغلبانه كتير لكن في كمان أغنى أغنياء دمياط و ما بينهما

راس البر
(مصيف البشوات و أم كلثوم سابقا)

راس البر على الضفة الغربية من فرع النيل و عندها تنتهى رحلة نهر النيل العظيم عبر آلاف الكيلومترات من قلب أفريقيا

أسهل طريقة للوصول لراس البر من القاهرة
تركب طريق الإسماعيلية الصحراوى و منه لطريق بورسعيد و قبل بورسعيد ب 8 كيلومتر تنحرف يمين لطريق بورسعيد الدائرى إلى هو أول الطريق الساحلى الدولى
و من ممكن نفضل على الطريق الساحلى لغاية ما نعدى النيل و نقرب نوصل لمدينة دمياط الجديدة و بعدين نترك الطريق الساحلى و نتجه لطريق ميناء دميااط و منه إلى رأس البر طريق سالك لكن طويل
و الأقرب إننا نخرج من الطريق الساحلى عند قرية بين بورسعيد و دمياط إسمها قرية شطا و ناخد طريق بورسعيد دمياط القديم و ده بيدخلنا لمدينة دمياط نعدى النيل و ندخل على طريق دمياط المنصورة كام كيلو كده نلاقى يافطة يمين تقول إلى مصيف راس البر طريق أقصر لكن زحمه شوية

معلش طولت فى وصف الطريق علشان صعب وصفة شوية عموما من القاهرة لبورسعيد ساعتين و من بورسعيد لراس البر حوالى ساعة .

راس البر عبارة عن شبه جزيره من الشرق النيل و من الشمال و الغرب البحر المتوسط

المهم أول ما تدخل راس البر هتلاقى على يمينك (بس من بعيد) شاطئ الجربى على نهر النيل و ده فيه كافيتريات كتير تقدر تقضى فيها النهار كله و ممكن تطلب مشاريب بس و تاخد أكلك معاك محدش هيزعل منك و كمان ممكن تطلب أكل اسعارها متوسطة و مستوها معقول و ممكن السباحة فى النيل متخفوش من البلهارسيا فى الحته دى المية بتبقى مالحة

فى الجربى بتشوف مراكب الصيد واقفة فى وسط النيل و رايحة و جاية و كمان تقدر تاخد جولة باللانش فى النيل بس خليك فاكر المصيف شعبى يعنى مافيش مامى و بابى إنما فيه أهلنا البسطاء الغلابه اللى ممكن يطلع منهم حركات يمكن متعجبكش .

طول ما إنت قاعد فى الجربى تلاقى البياعين رايحين جايين عليك إشى نضارات و إيشى ملابس داخلية و خارجية و بشاكير و فوط و مكياج و توك للبنات و شيبسى و سجاير و لب و أيس كريم و حلويات دمياط و مشبك و شرايط كاسيت مضروبة و ساعات صينى و ممكن تأجر عجله أو موتوسيكل و فيه ناس بتبيع سنارة و طعم و تقدر تقعد تصطاد بس هتطلع بساريات بس مفيش سمك كبير

فى الجربى فيه نادى الشرطة و نادى الأطباء و كازينو خلود النيل (ليه مركب خاصة بينظم بيها رحلات فى النيل) دول طبعا مش شعبى قوى لأن الدخول للأعضاء أو بفلوس فى الكازينو

لو مش عاجبك موضوع النيل ده ممكن تروح للبلاج يعنى البحر المتوسط الناحية التانية أو ناحية الشمال و إنت داخل راس البر فيه برضه الشواطئ الشعبية زى شاطئ 77 و فيه الأرقى شويه كل ما تقرب للسان.

رمل البحر لونه غامق علشان الأرض عبارة عن طرح النهر يعنى طمى فى طمى فا تنسى خالص رمله مرسى مطروح و الساحل الشمالى و لون البحر برضه مدى على أخضر مش أزرق تيركواز برضه علشان مياه النيل اللى بتغير لون مياه البحر

إيه بقى اللسان اللسان ده شريط طويل و ضيق فى أخر طرطوفة من نهر النيل و بيفصل النيل عن البحر و بيحمى مجرى النيل من نحر البحر (حد فهم حاجه)

اللسان ده تمشية حلوه بس بعد العصر أو المغرب أو بالليل لإن مفيهوش ضله و شجرة لكن المنظر من هناك روعة فجأة تلاقى نفسك و الميه محاوطاك من كل ناحية
و تلاقى على اللسان يافطة كبيرة مكتوب عليها "هنا ينتهى نهر النيل العظيم"

منطقة اللسان محمية بيئية (مش عارف ليه) ممنوع الجلوس و ممنوع الأكل أو الشرب أو قزقزة اللب تتمشى و تتفرج و تتصور بس .

بالليل بقى عندك كذا حته ممكن تقضى فيها السهرة
أولا كافيتريات قبل منطقة اللسان دى و تعتبر على البحر الهوا هيخبطك و يدوخك لكن مش هتعرف تشوف البحر القاعدة حلوة و ظريفة مشروبات و فطير و كباب و كل حاجه و شيشه كمان
ممكن كمان تاخد جولة فى شارع النيل بيخصصوه للماره فقط بعد المغرب ناحيه كلها محلات و ناحية كلها بتوع فطير وكازينوهات المحلات بتبيع كل حاجه صينى من أول توكه الشعر (معلش مركز على التوك علشان المدام كل ما نروح تجيب شروة توك) كمان الملابس القطنية تلاقى المأكولات و الأيس كريم تلاقى كتب تلاقى أجهزة كهربائية و لعب أطفال تلاقى

الكازينوهات على النيل لكن بينك و بين النيل ممشى عام ممنوع أى كازينو يفرش فيه و بالتالى ممكن أى حد يقعد على النيل بلاش لو عايز .

شارع السوق شارع مليان مطاعم على الطريقة الدمياطية يعنى مش خمس نجوم لكن نضاف و حاجتهم نضيفه أشهرهم دعدور بتاع الفطير و أبو خالد بتاع الكباب غير محلات الحلويات اللى فى كل ركن و القهاوى طبعا .

ممكن كمان تلاقى سينيمات من نوع اربعة أفلام فى بروجرام واحد (هتلاقى كل أفلام الصيف بتذكرة واحده من الساعة 8 لغاية الفجر) كمان السيرك ليه خيمة هناك

اللى عايز يبات مقدرش أدله كويس لكن فيه فنادق طبعا أشهراها مارين النيل ( يمكن مايكونش أحسنها دلوقتى ) لكن ممكن تأجر شقة فى عشه (ماتخافش هى إسمها عشة لكن أبعد ما تكون عن العشش - تسمية قديمة من أيام العشش الخوص) فى الواقع العشة تقريبا عبارة عن فيلا صاحبها واخدله دور و بيأجر الباقى معرفش الأسعار لأنى مجربتش

عموما راس البر تاخدلها يوم أو إتنين بالكتير - شعبية لكن ليها طابع خاص - و ليها حلاوتها .... مش ضرورى كل حاجه تبقى بالشوكة و السكينة .

و اللى للقاء فى رحلة أخرى :waving: