تحسين دخل
 

جاتنى فكرة بتراودنى بقالها فترة ومن كتر التفكير فيها ومش عارف أوصل لنتيجة .. قلت أطرحها للمناقشة بيننا .. لو الواحد عايز يحسن دخلة .. هل من الممكن أشترى جهاز كشف الأعطال وأترك رقم موبايلى للورش والميكانيكية .. ممكن الميكانيكى يتصل بية لو جاتلة سيارة محتار فيها وأكشف عليها بالجهاز وأحدد لة العطل وأترك لة الاصلاح وأخد منة ثمن الكشف .. وهكذا تستمر المسألة . هل الفكرة دى كويسة ؟ واللا فكرة مجنونة مش سليمة وميقبلهاش المنطق ولازم تكون عندى ورشة مثلا ؟ ولو الفكرة دى صحيحة .. ممكن يكون الكشف فى حدود كام ؟ جهاز كشف الأعطال مش رخيص , ودة مخلى الواحد يفكر ألف مرة قبل شرائة . اية رأيكم أشترية وأتوكل على الله .. واللا مفكرش فى الموضوع من أساسة ؟ مع الاعتزار على الأطالة عليكم والشكر لكم

رد: تحسين دخل
 

الفكرة كويسة لكن لازم تحدد انك بتكشف العطل بس عشان لو اللي طلبك ميكانيكي ممكن يطلب منك تعالجله المشكلة كلها بدون تكلفة اضافية ودلوقتي ممكن تعمل الكشف ب 50 جنيه

على فكرة كل ده مبني على تجربة شخصية

رد: تحسين دخل
 

طيب ماطبيعى ان الميكانيكى هو اللى هيشترى الجهاز
ودى انا شوفتها

رد: تحسين دخل
 

اخي الغالي فكرتك جميلة واحنا بندعمها ومتوفر اجهزة وكابلات وباسعار مناسبة وبالشرح بس اهم شئ قبل ما تنزل ارض العمل تتعلم وتتدرب عليه كويس عشان الاحراج لقدر الله بس الموضوع بسيط وممكن تعمل اتفاق بينك وبين الورشة بالنسبة في الشغل واهم حاجة ما تكشفش الا لما تحاسب علي الكشف قبله

رد: تحسين دخل
 

توكل علي الله

رد: تحسين دخل
 

والله انا شايف انك ممكن تعملها بس المهم المكان الى انت نويت تعمل فيه المشروع لازم يكون مكان حرفى جدا علشان يقدر يسعدك على الانشار والاتواصل مع الورش والعملاء بالفكرة الى انت عاوز تعملها ومممكن تزود كمان ظبط زوايا سيارات ودا هيسعدك جدا فى الانتشار......

رد: تحسين دخل
 

روح شوف منطقة فيها ورش مكانيكية وكهربائية وخد محل وسطهم وابدء فية نشاطك دة وهات كمبيوتر وامسك مشروع الكشف علي كمبيوترات العربيات وتنضيف الانجكشن والكشف عن الاعطال .. والموضوع مش هيكلف كلو علي بعضو بالمحل بالعدة 15 الف جنية .
وكمان الكشف بيكون ب 40 جنية .
ومن خلال محلك اعمل دعاية وكلم المكانيني دة والكهربائي دة . وهما هيجبولك شغل وانتا كمان هتجبلهم شغل
دة كدا اسمو شغل بجد واستخدم الانترنت وجوجل واعرف المشاكل الشائعة لكل عربية والحل الجزري ليها اية . وسوفت وير العربيات نزلو وبتاع الفتيسات وكدا وواحدة واحدة هتبقا تجمع كمية معلومات رهيبة والانجكشن دة هات وصلاتو وسوفت وير لية وهكذا .. كفايا عليك الشاهين فالانجكشن .

لكن انك تروح تجيب جهاز وتكلم مكانيكي وتنزلو لو عندو عربية والالش دة اسمو تهريج .