|
بتعمل أيه مع الكائنات دى؟
السلام عليكم
أنا لسة جديد فى السواقه, يعنى داخل على 8 شهور سواقة, بس المشوار اليومى الروتينى الممل محدد, و بأترعب لما الحاج و الحاجه يقولولى وصلنا مشوار مروحتوش قبل كده. - أولاً أنا (ميييح) فى طرق القاهرة. يعنى عشت حياتى كلها أروح أى حته بالمترو و نادراً لما بأركب مواصلة غيره - لحد ما ربنا كرمنا بزوبه. - ثانياً مبعرفش أتحكم فى أعصابى _رغم النصايح المستمرة_ لما يقعد سواق مكروباص و لا توكتوك و لا تاكسى (غير مهذب) و بيسابق الريح علشان يلحق الزبون إللى ما لوش مكان أصلاً , يقعد يزمر و يسمعنى سيمفونيه حيوانات الأدغال كلها. أنا بأتضايق أوى, رغم أنى مبرضش, لأنى مش هأعرف أرد عليهم, لغتهم غير اللغه إللى بأتكلم بيها, بس بأرجع و ألاقى نفسى بتأنبنى, ليه مرديتش, ليه مضربتوش, ليه....... أنا الحمد لله ماشى بمبدأ: راعى غيرك يمكن يكون عنده ظروف أقوى منك, يعنى ممكن ما أقفش علشان أقضى مصلحتى(حتى لو فى 5 دقايق) لو لاقيت الشارع ممكن يقف, و فى التقاطعات دايماً بأسيب اللى جاى يعدى الأول.(مع ملاحظة أن زوبه نوعها لادا) بس و الله بأخاف على عربيات الناس أكتر من عربيتى. قريت شوي نصايح للسواقة فى مصر هنا,للأسف للأسف للأسف أنا مش هعرف أعمل كده, مش طبعى و لا أخلاقى. أعتقد أنى فى الآخر هأعمل زى علاء ولى الدين فى فيلم الناظر صلاح الدين, و أشوفللى أى "ليبمى" يعلمنى الصياعة و البلطجه, و أبدأ أضرب ترامادول و أشيل مطواه و لا سنجه. و متشكرين لبتوع اللغه العربية إللى جابوا كلمات ملهاش معنى (الأدب - الأخلاق ) . و يظل دائماً: الدين المعامله. |
رد: بتعمل أيه مع الكائنات دى؟
رأيى المتواضع خليك على مبدئك وماتغيروش , اللى مضيعنا فى مصر أننا بنقول أشمعنا أنا هو أنا هصلح الكون ووصلنا لمرحلة من الأنحدار الأخلاقى إلا من رحم ربى وبقت الصياعة والبلطجة نسميها فهلوة والمشكة الكبرى اننا نفصل الدين عن المعاملة .
وبالنسبة للسواقة أن شاء الله مع الوقت والممارسة هتروح رهبتك من السواقة وبالنسبة لعدم معرفة الطرق فممكن تنزل بالعربية كذه مره فى أيام ليس بها زحام مثل يوم الجمعة صباحاً لغاية ما تحفظ الطرق وربنا يوفقك . |
رد: بتعمل أيه مع الكائنات دى؟
متابع علشان نفس ظروفك بالظبط
|
رد: بتعمل أيه مع الكائنات دى؟
كلنا نعانى من مرضى الكلكسات
ومرضى بالنور الرعاش ومرضى الاخلاق والطفيليات (التوك توك) واصحاب الاخلاق القذره:w6w200504112245306 e:w6w200504112245306e |
رد: بتعمل أيه مع الكائنات دى؟
حضرتك قولت الدين المعامله عشان كده مش لازم نعامل هذه الكائنات زى ما بتقول بأسلوبهم إمشى فى طريقك ومالكش دعوة بالعالم دى وسيب اللى بيزمر يزمر وإوعى تعمل زيهم رهبة السواقة هاتروح مع الوقت وقد يستغرق الأمر منك وقت أطول ، لكن كل شيئ هاييجى مع الصبر وربنا يسلم طريقك |
رد: بتعمل أيه مع الكائنات دى؟
بص أنا مش نفس ظروفك بظبط أنا مطلع رخصه باقلي 3شهور بس بسوق في شوارع فاضيه او حتي شوارع عديه علي اقل سرعات من اكتر من سنتين
المهم أنا من اول دقيقه طلعت رخصه وسوق تي اختلفت 360 درجه بسبب أني سائق عربيه زوبا زيك بس جولف 1 بمعني أني لو عند ملف او حاجه وواحد مؤدب مرماش وش العربيه او اعد زمر وكده أنا والله بقف و ازمرله و اشورله عدي لكن لو واحد عمل العكس و داخل بقي مضحي بزمر جاااااامد و ادخل قدامه الاوتوبيسات والميكروبسات دول سوري يعني اوسخ سواقه عايز يجري يرمي يمين و يجري عايز زبون يرمي شمال و التاكسي كذلك اما الشئ المسمي بتكتك اكتر من مره يقف مره واحده قدامي او يلف مره واحده يقيئ بالعرض أدامي و أنا بخبطهم بقصد و مبيعرفش يتكلم لانه متأكد انه غلطان و أكيد خبطات خفيفه منصحكش بالتجربة دي بس يا سيدي عايز تسوق سواقه حلوه أبعد عنهم و امشي عدل علي طول حتي لو حارتك واقفه والتانيه ماشيه اما عايز تاخد حققك اعمل زي بعد ما هو يكسر عليك علشان يركب أطلع منه وقف قدامه اما تلاقيه جي يطلع منك امشي هيجي وراك تروح انت ماشي براحه اوووووووي ده مع اي من الكائنات ال3 والباقي زي ما أنا بقولك فوق المهم جمد قلبك و لا تخاف من خناقه ولا حاجه طالما انت في طريقك و صح ولو حد جه يرمي عليك صدعه تزمير و أعميه بالنور واطلع قدامه اخنقه |
رد: بتعمل أيه مع الكائنات دى؟
بمرور الوقت وازدياد ثقتك في نفسك في السواقة هتتعلم كل حركات الكائنات دي وتتعامل معاهم عادي بنفس طريقتهم لدرجة انهم هيخافوا منك لان عربيتك لادا انشف من عربياتهم لو اديت واحد فيهم غلطان خبطة هيقعد يعيط علي عربية لذا الكل هيتجنبك بعد كده
اهم حاجة ثقتك في نفسك كسواق |
| الساعة الآن 10:02 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017