تعرف حاجة عن السيارات فى ليبيا؟؟؟؟
 

انا عارف ان كتير من الناس ما يعرفوش حاجة عن ليبيا اصلا مع انها لازقة فى مصر
فما بالك بالعربيات فى ليبيا!!!!!!!!!! ما عالينا

طبعا اول حاجة فى اختلاف كبير بين قطع غيار واجزاء العربيات فى مصر عنها فى ليبيا
لان اللهجة الليبية متاثرة اكتر بالايطالى

بعض الاختلافات

كبوت العربية ------ كوفنو
المساعدين --------ميزوتورى
الدركسيون ------- استرسو
الدينامو ------- موتورينو


وكمان فى اختلاف بين العربيات اللى موجودة فى مصر وبين اللى فى ليبيا

الفيات ال 128 و 131 و 132 و كل الانواع دى مش موجودة خالص

وكمان اقدر اقولك بعض الاراء هنا عن بعض الموديلات والانواع

البيجو زبالة
الفيات رابش (خردة)
الهيونداى بعد 2002 كويسة اوى
الدايو الصالة (العفشة) تعبانة
الالمانى يا اما جديد يا اما بلاش (احسن مرسيدس مستعمل ما يعديش 7000 دينار)
وغيرها وهنكمل بكرة

هعلمكم ليبي يعنى هعلمكم ليبي


وكمان بكرة هجبلكم صور من ليبيا

باى

رد: تعرف حاجة عن السيارات فى ليبيا؟؟؟؟
 

انت ليبى ولا بتروج لرحلات سياحية لليبيا

رد: تعرف حاجة عن السيارات فى ليبيا؟؟؟؟
 

انا رحت ليبيا عدة مرات لفترات تراوحت بين اسبوعين و شهر فى رحلات عمل.
على حسب ما قدرت اجمع من معلومات (الحديث مع السائقين هناك),
معظم العربيات هناك هى كورية أو يابانية (اكتشفت بعد ذلك أن السبب الأساسى هو ان بعضها مدعم من خلال الروابط , كربطة الشباب, رابطة المهندسين و يباع بأسعار مخفضة).
مع وجود لبعض الماركات الألمانية (فولكس, مرسيدس, بى ام دبليو), و فيات (اونو, بونتو), و بيجو و بعض السيارات الصينية.
هناك بيحترموا الألمانى كفئة أولى, و بعدها كل السيارات تتساوى, لدرجة انو سمعت من سواق انو الألمانى هى العربية الوحيدة اللى تسافر بيها و انت مطمئن(كان سايق لانسر, و امل حياته انو يجيب بى ام).
و لا وجود عموما للسيارات القديمة من اى فئة, نظرا لرخص ثمن السيارات هناك, و اللى مش لاقى حاجة يعملها اسهل حاجة يجيب عربية و يشغلها تاكسى أو مواصلة( من المعتاد هناك أن تعمل سيارات الملاكى كتاكسى عادى, و المواطن الذى يرغب بجنى بعض المال ما عليه سوى ان يأخذ سيارته الى موقف معروف, أو ترعيش النور للمارة كى يخبرهم بأنه تاكسى).

رد: تعرف حاجة عن السيارات فى ليبيا؟؟؟؟
 

شكرا بيرو على المعلومات
و مستنين الصور

و شكرا فادى على المشاركة

رد: تعرف حاجة عن السيارات فى ليبيا؟؟؟؟
 

ازيكم انا جيت تانى

المرة اللى فاتت كنت مستعجل شوية

اولا انا مصرى بس عايش هنا فى طرابلس تقريبا من 6 سنين والغريب انى حبيت طرابلس اوى

ماعلينا فى ناس ممكن تختلف معايا فى الكلام دة

انا هحط شوية صور لطرابلس عشان الناس تشوفها

بالنسبة الى كلام الاخ فادى مظبوط جدا

وفى كلام كتير عايز اقولكم علية بالنسبة لليبيا والعربيات فى ليبيا بس مش عارف ابتدى ازاى

عشان كدة انا بدعو اى حد عايز اى سؤال عن ليبيا او العربيات فى ليبيا او حتى عايز يسال على ظروف العمل فى ليبيا

انة ما يترددش ويسالنى وانا هحاول اديلة المعلومات اللى هو عايزها

وباى اسيبكو مع الصور بس ياريت اعرف انزلهم فى الموضوع

رد: تعرف حاجة عن السيارات فى ليبيا؟؟؟؟
 

يا ابو نورا يا كبير الحقنى زى كل مرة وقولى ازاى انزل الصور

اخوك جديد فى الموقع وبيلطش شوية

رد: تعرف حاجة عن السيارات فى ليبيا؟؟؟؟
 

ما علينا

انا فشلت فى تحميل الصور

لكن ممكن نوضح الصورة من غير صورة

عملة ليبيا هى الدينار الليبي وهو بيساوى تقريبا 4.25 جنية مصرى (يا عينى عليك يا جنية)

مساحة ليبيا حوالى 1750000 كيلو متر مربع يعنى تقريبا ضعف مساحة مصر الا حاجات بسيطة

طرابلس هى العاصمة وبنيغازى هى المدينة الكبرى زى القاهرة والاسكندرية فى مصر مع الفارق طبعا

الشعب الليبى عموما طيب لكن المصريين هنا كتير جدا بالملايين يعنى وهما بصراحة اللى عملو سمعة مش كويسة

فى وسط الصنايعية والعمال لكن باقى المهن (محاسبين داكترة مهندسين) السمعه كويسة والحمد للة

حد يقولى ياعم بيرو انت لية بتكتب الكلام دة فى موقع المفروض انة عن السيارات

انا هرد بصراحة

مش عارف

انا لاقيت نفسى ممكن اتكلم عن ليبيا فقلت اتكلم واعرف الناس خصوصا انى قبل ما اجى هنا ليبيا يعنى

مكنتش اعرف اى حاجة زيى زى معظم المصرييت عن ليبيا

مكنتش اعرف اية العملة ولا حتى لون العلم وصدقونى مكنتش حتى اعرف العاصمة اية

يا جماعة اللى عايز يسال على حاجة يقولى

متتحشمش

متتحشمش = متكسفش

باهى ؟

باهى = ماشى