يوميات ثائر من أجل الحرية
 

السلام عليكم
الف مبروك لمصر و كل مصري
اعذروني لعدم المشاركة الايام الي فاتت لان لسة النت مرجعش البيت عندي عشان السنترال اتحرق جزء منه :(
انهاردة انا في الشغل و حبيت اعمل موضوع لكل الي نزل في أيام الغضب لاني ملقتش موضوع يسجل الذكريات دي و عشان تكون ذكري لينا و لأولادنا

===========
25 يناير
نزلت شارع جامعة الدول العربية الساعة 2 الظهر و مشيت مع المتظاهرين في شارع جامعة الدول و منه لشارع البطل أحمد عبد العزيز ثم شارع التحرير ثم قصر النيل ثم ميدان التحرير و صلينا العصر هناك و مشيت الساعة 7
===========
26 يناير
لفيت من العتبة لشارع وسط البلد الداخلية لحد ما لقيت المتظاهرين قدام نقابة الصحافيين ووقفت شوية و مشيت
===========
27 يناير
مشيت مع مظاهرة من أول شارع مستشفي الصدر في العمرانية ثم نزلنا شارع الهرم
===========
28 يناير جمعة الغضب
صليت الجمعة في مصطفي محمود و اتشاهدت علي روحي و مشيت مع الجماهير الرهيبة
في ميدان الجلاء امطرونا بقنابل الغاز
علي كوبري قصر النيل تعرضت للموت اكثر من مرة سواء بالغاز او بالدهس لما العربية رشت المياه و دخلت علي المتظاهرين
و مشيت من التحرير 9 و نص بالليل لما اعمال السلب و النهب بدأت
===========
الأحد - 30 يناير
في التحرير من 10 الصبح و نمت في حديقة عمر مكرم لتاني يوم الصبح
===========
الثلاثاء - 1 فبراير
في التحرير من 10 الصبح و نمت في حديقة عمر مكرم لتاني يوم الصبح
===========
الخميس - 3 فبراير
في التحرير بعد الظهر حتي بداية حظر التجول
===========
الجمعة - 4 فبراير
أديت صلاة الجمعة في التحرير و مشيت مع بداية حظر التجول
===========
من السبت الي الاثنين
بضع ساعات في ايام متفرقة في التحرير لأني كنت بدأت ادخل في حالة احباط رهيبة و احساس ان الثورة فشلت
===========
الأربعاء - 9 فبراير
اشتركت في المظاهرة أمام مجلس الشعب و مشيت 7 عشان حظر التجول
===========
الجمعة 11 - فبراير
طول النهار في البيت نايم لاني كنت وصلت لقمة اليأس و اليوم ده كان عيد ميلاد ابني بس لغيته بسبب الحزن الشديد
بعد ما سمعت خبر التنحي طلعت زي المجنون في البلكونة اصرخ و اقول الله اكبر
بعد كدة رحت ميدان التحرير احتفل مع الناس لحد نص الليل
========================= =============

في الاخر عاوز اقولكم علي حاجة صغيرة اوي
انا معظم الايام كنت بنزل من بيتي و انا خايف جدا لكن سبحان الله اول ما تلاقي واحد جنبك و هو كمان خايف زيك لكن اول ما تمشوا جنب بعض بتحس ان جواك قوة رهيبة ماتعرفش ايه مصدرها

رد: يوميات ثائر من أجل الحرية
 

حمدالله على السلامه

يابطل

رد: يوميات ثائر من أجل الحرية
 

لا بطل و لا حاجة يا عم و الله العظيم انت متصدقش انا كنت ببقي خايف اد ايه كل مرة اخرج فيها و اكيد كان في مئات الالاف خايفين برضو
و سبحان الله الذي انتصرت مشيئته في النهاية

يا ريت الناس الي نزلت تكتب لنا راحوا فين و شافوا ايه

رد: يوميات ثائر من أجل الحرية
 

رد: يوميات ثائر من أجل الحرية