حد رخص حديثا زيرو؟؟؟؟
 

اخواني الكرام حد رخص زيروا حديثا يشرح لنا خطوات الترخيص زيروا وبتتكلف كام لو 1600 سي سي مثلا ولكم تحياتييييييييييييي

رد: حد رخص حديثا زيرو؟؟؟؟
 

انا لسه مرخص الاسبوع اللى فات فيرنا 2013 .....حضرتك اول حاجه بتاخد الورق بتاع العربيه اللى بتاخده من المعرض وتروح المرور اول حاجه بتشترى ملف ترخيص زيرو ب 8 جنيه وتروح تشترى ورق فحص بيبقا عبارة عن ورقه فحص و ورقه فحص بيئة و ورقه طفايه تقريبا ب 25 ج وبعدين تشترى طفايه ب 129 ج وتديله الورق اللى معاك هيختم ورقة الطفايه و بعدين تاخد العربيه وتخش هتلاقى واحد بيرفع بصمة خليه يرفعلك بصمه واديله 10 ج (لازم ترررش) وبعدين تروح لمهندس الفحص وبرضو هتديلو بس 20 ج هيبعتك الاول تعمل استعلام مباحث وتمضى المراجع انا لما روحت اعمل استعلام مباحث الظابط عمل مكالمه عشان يتاكد ان العربيه مفيش قضايا عليها فى نص المكالمه قالى ( روح هات كرت شحن فودافون او اتصلات) المهم جبتله كرت ب 10 وبعدين هترجع لمهندس الفحص هيخلص الورق وتروح بقا بعديها تدفع التامين الاجبارى ب 118 ج للسنه الواحدة وبعدين تاخد الورق ده كله وتخش على شباك مكتوب عليه ترخيص جديد تديله الورق ده كله مه صورة بطاقتك هيديك ورقه تروح تدفع بيها فى الخزنة (ملحوظة الخزنه بتقفل الساعه 12 ..يعنى لازم تقدم الورق لشباك الترخيص قبل الساعه 12 لو جت 12 مبيخدش ورق من حد ) هتروح بقا تدفع فى الخزنه الضريبه + فلوس النمر الجديدة + الدمغات كل ده ب 385 ج للسنه الواحدة وبترجع للشباك تديله الوصل وهتستنى شويه وتاخد الرخصة والنمر وتطلع على باب المرور هتلاقى عيال كده اللى بتركب النمر هتديهم 20 بعد ما يركبو النمر بس كده ......ويبقا 1000 مبروك على الرخصة و1000 مبروك على العربيه يا باشااا

رد: حد رخص حديثا زيرو؟؟؟؟
 

كلامك سليم 100 % بس مش سليم فى بعض النقاط
وخاصه موضوع الترويش ده
انا مش مع اى حد يعمل كده
انا كنت فى مرور المحله قريب جدا واتعاملت مع المرور كتير
وقت اخذ البصمه العربيات بتقف طابور ورا بعض وبتاع البصمه بيمشى عليهم بالدور ولو مش عايز ياخد البصمه ان شالله ماخدها هوقف الدنيا ورايا والمهندس قمه فى الاحترام ولو حد طلع له جنيه هيروح فى داهيه والظباط واقفين فى كل عمليه بتتم
عارف احنا مشكلتنا فى المرور ايه اننا كلنا مستعجلين وعايزين نخلص وبناخد حق غيرنا يعنى مابنعرف نحترم الطابور ولا النظام بننتهك حق بعض علشان اسبق فى الدور هدفع رشوه علشان اخد مكان واحد واقف من بدرى بس لان الانانيه اصبحت طبع فبنحاول نخلص بدرى وبكده هتفضل الرشوه زى ماهى وهيفضل الفساد منتشر
ولن ينصلح حالنا وهنفضل محلك سر:fun_36_3_13[1]:

رد: حد رخص حديثا زيرو؟؟؟؟
 

ده يا استاذ طارق لان مرورك ذات نفسه منظم وفى طابور اصلا لكن انا مرورى البساتين موجود فى صقر قريش ده مرور زباله اصلا العربيات بتدخل تركن فى اى حته فاضيه وتفتح الكبوت وتقعد تجرى ورا مهندس البصمه عشان يجى يرفع البصمه ومبيجيش غير لما تلمحله انك هتديله فلوس واللى مساعده على كده الظباط الكبار ده انا كاتب فى كلامى ان الظابط اللى عمل استعلام المباحث قالى روح هات كرت شحن قدام الناس اللى موجوده كلها عينى عينك ولو قلتله لا عمره ما هيخلص الورق و واحد زى مهندس الفحص ده لو مدتلوش فلوس هيوقفك جنبه لغاية الساعه متعدى 12 والخزنه تقفل ..... يا استاذى ده المرور ده فيه مهازل ده امتحان الرخصة الخاصة الظابط اللى بيراقب بيبقا واقف لو اتديت 50 جنيه للموظف ولو العربيه بطلت منك بيسبك تدورها تانى لو جيت تخبط قمع بيشيله وكل ده قدام الظابط وقدام الناس كلها المشكله فيهم هما ده لو مرور محترم زى اللى بتتكلم عليه كانت الناس التزمت وتقبل تحياااتى

رد: حد رخص حديثا زيرو؟؟؟؟