مصر موتورز مجتمع السيارات - ادخل وقول رايك فى احسن سيارة المانية عجباك

رأيي يا باشا ان مرسيدس عمرها ما كانت فاشلة .. مرسيدس هى النجاح بوصفه و صفته
.. انا معاك ان فيه شوية موديلات نزلتها مش لاقية نجاح زى باقى الموديلات بس ده مايخليش مرسيدس شركة فاشلة ابدا
و خلينا نتناقش نقطة نقطة كما تعودنا....

اقتباس:

المشاركة الأصلية كتبت بواسطة mtema99 (المشاركة 193987)

ياه ربنا يكرمك

بقالي كتير مدخلتش في مناقشه مع حد على العربيات

اولا: لكن عندما تكون ايه ام جى يختلف الوضع تماما

معرفش انا مش مع لبس البوصه تبقى عروسه
انا مع الجمال الرباني مش مع ال Make-Up

مش لازم نستنى ال AMG عشان الحاجه تبقى حلوه

ماشى يا باشا .. ماهى مش بوصة قوى برده يعنى .. هى اقل من مثيلاتها .. انا معاك بس مش لدرجة انها تبقى بوصة

ثانيا: ليه بس يا باشا على الاقل بيوفرا فئة و اختيار مش متوفر فى باقى الالمانى
صح ال A بتوفر

بيوفروا ايه انا شايف ان من كتر ما مرسيدس اثبتت فشلها اندمجت مع رينو نيسان زي ما احنا عارفين عشان السبب الؤرئيسي سيارات من الحجم ده تكون منافس قوي في فئاتها

بس برده مافيش منافس للفئات دى فى باقى الالمانى .. هى مشكلتها انها عربيات صغيرة او متوسطة الحجم من مرسيدس فاللى بيدور على الفخامة فى العربيات الصغيرة مش ناس كتير .... فا لو سعرها ظبط شوية هتبقى منافسة اكتر .. ده رأيي... و بعدين ماتنساش يا باشا ان بى ام بتتعاون مع بيجو فى نفس الفئة ... يبقى كدة بقى كل الالمان فاشلين ؟؟ ....

ثالثا:ازاى بقى ... عربية حجمها صغير وفخمة فى نفس الوقت .. يعنى البى ام شبابية صرفة و اللكزس IS معظم اللى راكبينها بنات ... انما ال c تنفع لكل الناس باختلاف اعمارهم و انواعهم ز ده فى حد ذاته تميز

انا معاك ان ال 3 شبابي و ال IS اغلابيتها بناتي و انا شفت ال 3 في سوق المانيا اهم سوق في اوروبا بس مش معناه ان مفيش بنات بيشتروا 3و مفيش ولاد بيشتروا IS و اما بالنسبه للشراء و قيمه العربيه تقدر سهل تشوف الفرق

ال C عيبها انها كتصميم كلاسيك قوي و من الداخل من اوسعهم على الرغم من انها اكبرهم

طيب ايه يا باشا العيب فى التصميم الكلاسيكى ... ما احنا قلنا ان ده هو سر تميزها و اكيد طبعا فيه ولاد بيشترو لكزس و فيه بنات بيشتروا بى ام بس مرسيدس جمعت بين مميزاتهم التلاتة

رابعا:لو ركبت الاتنين يا باشا هتشوف الفرق بينهم .. حتى لو كان المخطط فى الاول شئ و اللى حصل بعد كدة شيئ تانى ده مايقللش نجاح اى من العربيتين .. العربيتين ما شاء الله و كل واحدة لها ركيبة

صح مع مرور الوقت تحولت E لسياره تاكسي و اخذت مكانها ال CLS و مش بعيد مع الوقت يلغوا ال E

ملحوظه مع الجيل القادم من CLS سيدشن مع السيدان نسخه ستيشن اللي خلاص هتتلغي من ال E و ده معناه زي ما قلت انهم بيقللوا ال E مع الوقت

يا باشا انا بشوف فى صور العربيات فى المانيا ان المايباخ نفسها فيه منها تاكسى و انا بشوف ال E تاكسى من ايام الزلمكة .. مش من اول ما نزلت cls يعنى .. و استحالة طبعا انهم يلغوا E كلاس من مرسيدس اللى اكيد عاملة عندهم اعلى مبيعات و زى ما احنا عارفين ال سى ال اس تميل اكثر الى الرياضية اما ال E فتميل اكثر الى الكلاسيكية

خامسا: طبعا S65 AMG هى حلمى الذى لن يتغير .... اما بالنسبة لل S العادية فهى متفوقة بالفعل على قريناتها من بى ام و اودى و ده برده عن تجربة و التفوق ده فى مستوى الراحة و الرفاهية و الثبات و الامان ... و اعتقد ان الفئة دى من العربيات اتعملت علشان تقدم الاربع حاجات دول

فيه واحده اخدت مكانها حتى في المانيا و متفوقه عليهم في كل اللي فوق و بنفس السعر او اقل شويه يعني نقدر نقول ب 90% من السعر و 150% من التكنولوجيا و الرفاهيه و الامان
و الراحه اللي ناقص شويه الثبات وقرب قوي مع الوقت LEXUS-LS

ولو هنتكلم مع الجيل الجديد من AUDI A8 و 7-SERIES هيبان بجد الفرق فالتكنولوجيا

بص يا باشا انا معاك ان LS الجديدة تحفة لكن اللكزس مهما عملت عمرها ما هتوصل لمرسيدس.. احنا عارفين ان اللكزس اصلا اتعملت علشان تنافس مرسيدس و من يوم ما اتعملت و هى بتحاول توصلها لكن مرسيدس دايما سابقة بكذا خطوة ....
و الجيل الجديد من اودى 2011 و البى ام 2009 اما المرسيدس كان 2006 و يا دوبك لسة عامل فيس لفت السنة دى ...استنى لما تيجى موديل 2013

سادسا:كلامك مظبوط طبعا ... و البنتلى جى تى عربية لا غبار عليها و منافس قوى جدا و لكن مرسيدس سى ال تتميز بالحجم الاكبر و الاوسع و طبعا الراحة الاكتر و .. عربية ملوكى و تنفع اكتر للى سنهم كبير شوية و عاوزين يركبوا عربية رياضية مريحة بعكس البنتلى اللى تليق اكتر بالشباب

عشان تبقى صانع كويس و العربيه تبقى رقم 1 في فئتها يبقى لازم تحط في نظرك انها تنفع لكله

مثال اخر عربيه اطول من ال S سيدان القاعده الليموزين مش ال لونغ حتى رولز رويس فانتوم كوبيه

الشباب بيركبوها مش تريقه و هي ارستقراطيه مش فكره حجم اهي

يا باشا ولا حتى ناسا هتعرف تعمل عربية تنفع لكله .... لكن فيه عربية بتستقطب فئة من الناس و عربية تانية بتستقطب فئة اوسع من الناس .. و انا بصراحة عمرى ما شفت شاب راكب الدروب هيد بتاعت رولز... هى صحيح ارستقراطية بس برده موجهة لناس معينين

سابعا: قصدك على الشكل ولا الاداء و لا ايه بالظبط ؟؟؟

الاتنين و ازيد

شكل و اداء و استهلاك بنزين و ثبات و مرونه كل كل حاجه
مش بقول انها وحشه

بس هيقصادهم بجد صفر

انا بصراحة ماسقتش التانين علشان احكم لكن بجد slk عربية تحفة ....

ثامنا: تمام .. بس مش عاملاهم لوحدها ... عاملاهم بالاشتراك مع مرسيدس

مرسيدس مالهاش دور غير التصميمات

و الصراحه مش وحشين ال SL حلوه كمان

تمام يا باشا .. التصميم بس بتاع مرسيدس و المواتير يعنى بتاعت ماكلارين .. مش وحش برده :) و الحمد لله انهم عجبوك :)